କଟକ, ୩୦/୧୦: ହ୍ଵାଟ୍ସଆପ ଗ୍ରୁପ୍ ଜରିଆରେ ବିରାଟ ଠକେଇ । ହାଇ ରିଟର୍ଣ୍ଣର ଆଶା ଦେଖାଇ, ଇନଭେଷ୍ଟରଙ୍କୁ ଠକିଥିବା ସାଇବର ଠକ ଦଳକୁ ରାଜ୍ୟ ବାହାରୁ ଗିରଫ କରିଛି କ୍ରାଇମବ୍ରାଞ୍ଚ । ଏଭଳି ବଡ଼ ଠକେଇର ଶିକାର ହୋଇଛନ୍ତି ଜେଏସପିଏଲ କର୍ମଚାରୀ କୁନ୍ତଳା ମଜୁମଦାର । ସାଇବର ଠକମାନେ ତାଙ୍କ ଠାରୁ ୬ କୋଟି ୨୮ ଲକ୍ଷ ଟଙ୍କା ଠକି ନେଇଛନ୍ତି । ଏଥିରେ ସମ୍ପୃକ୍ତ ଥିବା ୧୭ ଜଣ ଅଭିଯୁକ୍ତଙ୍କୁ ବୁଧବାର କୋର୍ଟ ଚାଲାଣ କରାଯାଇଛି । ଗୁରୁବାର ସୁଦ୍ଧା ଆଉ ଗିରଫ ୭ ଜଣଙ୍କୁ ଓଡିଶା ଆଣାଯିବ ବୋଲି ଆଜି କ୍ରାଇମବ୍ରାଞ୍ଚ ଏଡିଜି ବିନୟାତୋଷ ମିଶ୍ର କହିଛନ୍ତି ।
ସୂଚନା ମୁତାବକ, କୁନ୍ତଳା ମଜୁମଦାର ଗତ ଜୁଲାଇ ମାସରେ କୋଟକ ଇନଭେଷ୍ଟମେଣ୍ଟ କ୍ଲବ ହ୍ଵାଟ୍ସଆପ ଗ୍ରୁପରେ ଆଡ଼ ହୋଇଥିଲେ। ଗ୍ରୁପରେ ପୁଞ୍ଜି ନିବେଶ ହେଉଥିବା ଜାଣିବା ପରେ ୬ କୋଟି ୨୮ ଲକ୍ଷ ଟଙ୍କା ବିନିଯୋଗ କରିଥିଲେ । ସେୟାରର ମୂଳ ମୂଲ୍ୟ ହଠାତ ୧୧୦ ଟଙ୍କାରେ ପହଞ୍ଚି ୨୫ କୋଟି ହୋଇଥିଲା । ସେଥିରୁ ୨୩ କୋଟି ଉଠାଇବାର ଅନୁମତି ମିଳିଥିଲା । ଅଗଷ୍ଟ ୨୧ତାରିଖରେ ଏହି ଟଙ୍କା ଉଠାଇବାକୁ ଉଦ୍ୟମ କରିବା ପରେ ଗ୍ରୁପ ଆଡ଼ମିନ ତାଙ୍କୁ ଗ୍ରୁପରୁ ହଟାଇ ଦେଇଥିଲେ । ଏହା ପରେ କାରବାର ପାଇଁ ବ୍ୟବହୃତ ଆପ୍ ମଧ୍ୟ ନିଷ୍କ୍ରିୟ ହୋଇ ଯାଇଥିଲା ।
ଏହି ଘଟଣା ପରେ କ୍ରାଇମବ୍ରାଞ୍ଚରେ ଅଭିଯୋଗ କରିଥିଲେ କୁନ୍ତଳା ମଜୁମଦାର । କ୍ରାଇମବ୍ରାଞ୍ଚ ସାଇବର ୟୁନିଟ ତଦନ୍ତ ପରେ ଜାଣିଥିଲେ ଯେ, ୧୦୦ ରୁ ଅଧିକ ବ୍ୟାଙ୍କ ଆକାଉଣ୍ଟରେ ୬ କୋଟି ୮ ଲକ୍ଷ ଟଙ୍କା ଟ୍ରାନ୍ସଫର ହୋଇଛି । ସମସ୍ତ ବ୍ୟାଙ୍କ ଆକାଉଣ୍ଟରେ ଥିବା ୧୬ ଲକ୍ଷ ୮୫ ହଜାର ଟଙ୍କା ଫ୍ରିଜ ହୋଇଛି । ଅଭିଯୋଗକାରୀ ୬ ଲକ୍ଷ ୮୦ ହଜାର ଟଙ୍କା ଫେରସ୍ତ ପାଇଛନ୍ତି । ଏବେ ସୁଦ୍ଧା ତାମିଲନାଡୁରୁ ୯ ଜଣ, ଗୁଜରାଟରୁ ୮ ଜଣ ଓ ରାଜସ୍ଥାନ ରୁ ୭ ଜଣଙ୍କୁ ଗିରଫ କରାଯାଇଛି । ଅଭିଯୁକ୍ତମାନଙ୍କ ଠାରୁ ବ୍ୟବହୃତ ବ୍ୟାଙ୍କ ଆକାଉଣ୍ଟ, ମୋବାଇଲ ଆଦି ଜବତ କରି ସେ ସବୁର ସମୀକ୍ଷା ଓ ବିଶ୍ଳେଷଣ କରି ଅକ୍ଟୋବର ୨୮ ତାରିଖରେ ୬ ଜଣ ଅଭିଯୁକ୍ତ ମାନ୍ୟବର ଉପଖଣ୍ଡ ବିଚାର ବିଭାଗୀୟ ଅଦାଲତ, ଅନୁଗୁଳରେ ହାଜର କରାଯାଇଥିଲା ଓ ଅବଶିଷ୍ଟ ୧୧ ଜଣ ଅଭିଯୁକ୍ତଙ୍କୁ ମାନ୍ୟବର ଉପଖଣ୍ଡ ବିଚାର ବିଭାଗୀୟ ଅଦାଲତ, ଅନୁଗୁଳଙ୍କ ଠାରେ ବୁଧବାର ହାଜର କରାଯିବ । ରାଜସ୍ଥାନରୁ ଆଉ ୭ ଜଣ ଅଭିଯୁକ୍ତଙ୍କୁ ଗିରଫ କରାଯାଇ ଟ୍ରାଞ୍ଜିଟ ରିମାଣ୍ଡରେ ଅଣାଯାଉଛି । ଅନ୍ୟ ଏକ ସାଇବର ଅପରାଧ କେଶ ୪୭/୨୦୨୪ ରେ ଉକ୍ତ ଟିମ ରାଜସ୍ଥାନରୁ ଜଣେ ଅଭିଯୁକ୍ତଙ୍କୁ ଗିରଫ କରିଛନ୍ତି ।
