ସାଲେପୁର,୦୨/୦୧: ବିଳମ୍ବିତ ରାତିରେ କୁଳିଆ ଛକ ନିକଟରେ ବାଇକ୍କୁ ପଛପଟୁ ପିଟିଲା ଆଉ ଏକ ବାଇକ୍ । ଦୁର୍ଘଟଣା ଫଳରେ ଜଣେ ମହିଳାଙ୍କ ଅବସ୍ଥା ସଙ୍କଟାପନ୍ନ ହୋଇଥିବା ବେଳେ ଦୁଇ ଜଣ ଯୁବକ ଗୁରୁତର ହୋଇଛନ୍ତି । ଗୁରୁତର ଯୁବକ ଦ୍ୱୟ ମାହାଙ୍ଗା ଗୋତରା ଅଞ୍ଚଳର ସୁବ୍ରତ ଷଢଙ୍ଗୀ ଓ ସରୋଜ ବାରିକ ଏବଂ ସଙ୍କଟାପନ୍ନ ମହିଳା ଜଣକ ନେମାଳ ଥାନା ଓରିକଣ୍ଟା ଅଞ୍ଚଳର କମଳା ନାୟକ ବୋଲି ଜଣାପଡ଼ିଛି । କଟକ ଜିଲ୍ଲା ଚାନ୍ଦବାଲି ରାସ୍ତାର ସାଲେପୁର ଥାନା କୁଳିଆ ଛକ ନିକଟରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ଏକ ବାଇକ୍ ଜଣେ ମହିଳାଙ୍କୁ ଲିଫ୍ଟ ଦେବାପାଇଁ ଅଟକିଥିବା ବେଳେ ପଛପଟୁ ଏକ ଗ୍ଲାମର ବାଇକ୍ ଦ୍ରୁତ ଗତିରେ ଆସି ପିଟିଥିଲା । ଫଳରେ ବାଇକ୍ରେ ଥିବା ଦୁଇ ଜଣ ଯୁବକ ଗୁରୁତର ହେବା ସହ ମହିଳା ଜଣକ ସଙ୍କଟାପନ୍ନ ହୋଇପଡିଥିଲେ । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣା ସ୍ଥଳରେ ପୋଲିସ ପହଞ୍ଚି ସେମାନଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ସାଲେପୁର ମେଡିକାଲକୁ ପଠାଇଛି । ପରେ ସାଲେପୁର ମେଡିକାଲରୁ ଗୁରୁତର ମାନଙ୍କୁ ଚିକିତ୍ସାପାଇଁ କଟକ ସ୍ଥାନାନ୍ତରିତ କରାଯାଇଛି । ଘଟଣା ସ୍ଥଳରୁ ଦୁର୍ଘଟଣାଗ୍ରସ୍ତ ବାଇକକୁ ଜବତକରି ତଦନ୍ତ ଚଳାଇଥିବା ନେଇ ସାଲେପୁର ପୋଲିସ ସୂଚନା ଦେଇଛି।
