ସାଲେପୁର,୨୮/୧୨: ଲଗାତାର ଲଘୁଚାପ ଫଳରେ ଲଗାଣ ବର୍ଷାରେ ଧାନ ଫସଲ ତ କ୍ଷତି ହୋଇଛି ତାହା ସାଙ୍ଗକୁ କଞ୍ଚା ପନପରିବା ଚାଷ ମଧ୍ୟ କ୍ଷତିଗ୍ରସ୍ତ ହୋଇଛି । କଟକ ଜିଲ୍ଲା ସାଲେପୁର ବ୍ଲକ୍ ର ଚିତ୍ରୋତ୍ପଳା ଓ ମହାନଦୀର ତ୍ରୀକୋଣ ଭୂମି ଗୁଆଳି ଗାଁରେ ଅଧିକ ମାତ୍ରାରେ ବିଭିନ୍ନ ପ୍ରକାରର ପନିପରିବା ଚାଷ କରିଥାନ୍ତି ଶହ ଶହ ଚାଷୀ । ଶୀତଦିନେ ଅଧିକ ମାତ୍ରାରେ ଏଠାରେ ସବୁଜ ପନିପରିବା ଚାଷ ହୋଇଥିଲା । ଦେଖିବା କୁ ଗଲେ ଏବେ ଫୁଲ କୋବି ବେଶୀ ମାତ୍ରାରେ ଚାଷ ହୋଇଥାଏ । କେବଳ ଫୁଲ କୋବି ନୁହେଁ, ତାହା ସହିତ ଅଧିକ ଦିନ ବାଇଗଣ ଓ ରଞ୍ଜା ଜାତୀୟ ଫସଲ ଭାବେ ପୋଟଳ, ବିନ, କଲରା ଆଦି ଅଧିକ ମାତ୍ରାରେ ସେମାନେ ଚାଷ କରିଥିଲେ । ହେଲେ ଲଗାଣ ବର୍ଷା ଆଜି ସେମାନଙ୍କୁ ଦୁଃଖ କୁ ଦ୍ଵୀଗୁଣିତ କରିଛି ।
ବର୍ଷାର ପ୍ରକୋପରେ ସବୁଜିମା ଭରା କ୍ଷେତ ଯେମିତି ଶ୍ରୀହୀନ ହୋଇ ପଡ଼ିଛି । ଚାଷୀ ଆଉ ବିଲକୁ ଯିବାକୁ ଇଚ୍ଛା ପ୍ରକାଶ କରୁନି । ଯେଉଁ ଆଡ଼େ ଦେଖିଲେ ଫସଲ ଗୁଡ଼ିକ ନଷ୍ଟ ହୋଇ ଯାଇଛି । ତେବେ ଲଗାତାର ଦୁଇ ଦୁଇଟି ଲଘୁଚାପ ସାଙ୍ଗକୁ ଲଗାଣ ବର୍ଷା ପାଇଁ ବିଲରୁ ବର୍ଷା ଜଳ ନିଷ୍କାସନ ହୋଇ ପାରି ନଥିବାରୁ ଅଧିକାଂଶ ପନିପରିବା ଗଛ ନଷ୍ଟ ହୋଇଯାଇଛି । ବର୍ଷା ପରେ ଏହି ଦୁଇ ଦିନ ଖରାରେ ରଞ୍ଜା ଜାତୀୟ ପୋଟଳ ଓ ବିନ ଗଛ ଅବସ୍ଥା ପୁରା ଖରାପ । ମାଣ ମାଣ ବିଲରେ ପୋଟଳ ଓ ବିନ ଗଛ ସଂପୂର୍ଣ୍ଣ ପତ୍ର ଝାଉଳି ଶୁଖି ନଷ୍ଟ ହୋଇଯାଇଛି । ରଞ୍ଜାରୁ ମରିଯାଇଥିବା ପୋଟଳ ଓ ବିନ ଗଛକୁ କାଟି ସଫା କରୁଛନ୍ତି ଚାଷୀ।
ବାଇଗଣ କିଆରୀରେ ଫଳୁଥିବା ବାଇଗଣ ଗଛ ବର୍ଷା ମାଡ ପରେ ଏବେ ଖରାରେ ଝାଉଁଳି ପଡୁଛି ଏବଂ ବାଇଗଣ ଫଳ ଶୁଖି ପଚି ଝଡିବାରେ ଲାଗିଛି । ଯେଉଁମାନେ କୋବି ଚାଷ କରିଥିଲେ, ସେସବୁ କୋବି ଆଉ ୧୫ଦିନ ରହିଥିଲେ ବଡ ବଡ ହୋଇ ବିକ୍ରି ହେବା ପାଇଁ ବଜାରକୁ ଯାଇଥାନ୍ତା । ହେଲେ ପାଣି ବିଲରେ ଅଧିକ ଦିନ ରହିବା ଫଳରେ ଗଛ ଝାଉଁଳି ଗଲାଣି ଓ ଛୋଟ ଛୋଟ ଫୁଲ କୋବିରେ ପୋକ ଲାଗିବା ଆରମ୍ଭ କଲେଣି । ସେଥିରେ କୀଟ ନାଶକ ପକାଇ ଉଦ୍ଧାର କରିବାକୁ ଉଦ୍ୟମ କରୁଛି ଚାଷୀ । ଏହି କୋବି ଏବେ ବଜାରରେ ବିକ୍ରି ଉପଯୋଗୀ ନୁହେଁ ବୋଲି ଚାଷୀମାନେ କହିଛନ୍ତି । ତେବେ ଏକର ଏକର ପିଛା ଚାଷୀମାନେ ୩୦ ରୁ ୪୦ ହଜାର ଟଙ୍କା ଧାର ଉଦ୍ଧାର କରି ଚାଷ କରିଥିଲେ । ଅଦିନିଆ ଲଗାଣ ବର୍ଷା ସେମାନଙ୍କ ମେରୁଦଣ୍ଡ ଭାଙ୍ଗି ଦେଇଛି । କେମିତି ସେ ସବୁର ଭରଣା କରିବେ ସେ ଚିନ୍ତାରେ ପଡିଯାଇଛନ୍ତି ଚାଷୀମାନେ । ଅନ୍ୟପଟେ ଏତେ କ୍ଷତି ହେବା ପରେ ତାଙ୍କ ପାଖରେ କୌଣସି ସରକାରୀ ଅଧିକାରୀ ପହଞ୍ଚି ନାହାଁନ୍ତି । କ୍ଷୟକ୍ଷତି କିଏ ଆକଳନ କରିବ, ସରକାରୀ ସାହାର୍ଯ୍ୟ କିଏ ଦେବ ବୋଲି ଓଲଟା ପ୍ରଶ୍ନ କରିଛନ୍ତି ଚାଷୀ । ଯାହାକୁ ନେଇ ଚାଷୀ ମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।
