ଭୁବନେଶ୍ୱର,୧୦/୦୬: ପ୍ରଧାନମନ୍ତ୍ରୀ ଭାବେ ନରେନ୍ଦ୍ର ମୋଦି ତୃତୀୟ ପାଳି ଆରମ୍ଭ କରିଛନ୍ତି । ରବିବାର ସେ ଶପଥ ଗ୍ରହଣ କରିବା ସହ ନିଜ ମନ୍ତ୍ରିମଣ୍ଡଳରେ ୭୧ ଜଣଙ୍କୁ ମନ୍ତ୍ରୀ ଭାବେ ନେଇଛନ୍ତି । ଓଡ଼ିଶାରୁ ୩ ଜଣଙ୍କୁ ମନ୍ତ୍ରୀ ପଦ ମିଳିଛି । ଦିଲ୍ଲୀରେ ଚର୍ଚ୍ଚା ହେଉଛି ବରିଷ୍ଠ ସାଂସଦ ଭର୍ତ୍ତୃହରି ମହତାବ ବାଚସ୍ପତି ହୋଇପାରନ୍ତି ।
ମନ୍ତ୍ରୀ ପଦ ବଣ୍ଟନ ପରେ ଏବେ ସମସ୍ତଙ୍କ ଆଖି କିଏ ହେବେ ବାଚସ୍ପତି । ଜାତୀୟ ଗଣମାଧ୍ୟମରେ ଚର୍ଚ୍ଚା ଜୋର ଧରିଛି ଯେ, କଟକ ସାଂସଦ ଭର୍ତ୍ତୃହରି ମହତାବ ଏ ପଦରେ ବସିବେ । ଜଣେ ଅଭିଜ୍ଞ ଓ ଅନୁଭବୀ ସାଂସଦ ଭାବେ ଶ୍ରୀ ମହତାବ ଜାତୀୟ ରାଜନୀତିରେ ବେଶ ପରିଚିତ। ସବୁ ଦଳର ଓଜନିଆ ନେତାଙ୍କ ସହ ତାଙ୍କର ବେଶ ଭଲ ସଂପର୍କ । ସଂସଦୀୟ ପରମ୍ପରା ଓ କାର୍ଯ୍ୟବିଧି ଉପରେ ତାଙ୍କର ଯେତିକି ଜ୍ଞାନ ସେତିକି ଅନୁଭୂତି । ପ୍ରଧାନମନ୍ତ୍ରୀ ମୋଦି ଓ ଅମିତ ଶାହଙ୍କ ସହ ଉତ୍ତମ ସଂପର୍କରେ ଥିବା ଭର୍ତ୍ତୃହରି ଏ ପଦ ପାଇଁ ସମ୍ପୂର୍ଣ୍ଣ ଫିଟ୍ ବୋଲି ଏନ୍ଡିଏ ଅନୁଭବ କରୁଛି । ତେଣୁ ଯଦି ସବୁ କିଛି ଠିକ୍ଠାକ ରହେ, ଶ୍ରୀ ମହତାବ ବସିବେ ସମ୍ମାନଜନକ ବାଚସ୍ପତି ଆସନରେ । ଏହାଯଦି ହୁଏ ତେବେ ରବି ରାୟଙ୍କ ପରେ ଏ ସମ୍ମାନଜନକ ପଦବି ପାଇବାରେ ଶ୍ରୀ ମହତାବ ହେବେ ଦ୍ୱିତୀୟ ଓଡ଼ିଆ