ନୂଆଦିଲ୍ଲୀ,୨୦।୪: ସୁପ୍ରିମକୋର୍ଟ ଏବଂ ମୁଖ୍ୟ ବିଚାରପତିଙ୍କ ସମ୍ପର୍କରେ ସାଂସଦ ନିଶିକାନ୍ତ ଦୁବେଙ୍କ ବିବାଦୀୟ ବୟାନକୁ ନେଇ ଅବମାନନା ମାମଲା ରୁଜୁ ପାଇଁ ଦାବି ଆରମ୍ଭ ହୋଇଛି। ସୁପ୍ରିମକୋର୍ଟର ଜଣେ ଓକିଲ ଅନ୍‌ ରେକର୍ଡରେ ଆଟର୍ଣ୍ଣି ଜେନେରାଲଙ୍କୁ ଏକ ଚିଠି ଲେଖି ଅବମାନନା ମାମଲା ଦାୟର କରିବାକୁ ଅନୁମତି ମାଗିଛନ୍ତି। ଅଦାଲତ ଅବମାନନା ଆଇନର ଧାରା, ୧୯୭୧ ର ଧାରା 15(1)(b) ଏବଂ ଅବମାନନା ମାମଲା ପାଇଁ ସୁପ୍ରିମକୋର୍ଟର ୧୯୭୫ରେ ତିଆରି ନିୟମ 3(c) ଅନୁଯାୟୀ, କେବଳ ଆଟର୍ଣ୍ଣି ଜେନେରାଲ କିମ୍ବା ସଲିସିଟର ଜେନେରାଲଙ୍କ ସମ୍ମତି ପରେ ସୁପ୍ରିମକୋର୍ଟ ଅବମାନନା ମାମଲା ଆରମ୍ଭ କରାଯାଇପାରିବ। ଏପରି ପରିସ୍ଥିତିରେ, ଓକିଲ ଆଟର୍ଣ୍ଣି ଜେନେରାଲ ଆର ଭେଙ୍କଟରମଣିଙ୍କୁ ଏକ ଚିଠି ଲେଖି ନିଶିକାନ୍ତ ଦୁବେଙ୍କ ବୟାନ ବିଷୟରେ ଅବଗତ କରାଇଛନ୍ତି।

ଚିଠିରେ ଉଲ୍ଲେଖ ଅଛି ଯେ ଦୁବେ ସୁପ୍ରିମକୋର୍ଟଙ୍କୁ ସଂସଦର କାର୍ଯ୍ୟରେ ହସ୍ତକ୍ଷେପ କରିବାର ଅଭିଯୋଗ କରିଛନ୍ତି। ସେ ସୁପ୍ରିମକୋର୍ଟ ଉପରେ ଅରାଜକତା ବିସ୍ତାର କରିବାର ଅଭିଯୋଗ ମଧ୍ୟ କରୁଛନ୍ତି। ଓକିଲ ଲେଖିଛନ୍ତି, "ଯେକୌଣସି ଆଇନର ସାମ୍ବିଧାନିକତା ଯାଞ୍ଚ କରିବା ପାଇଁ ସମ୍ବିଧାନରେ ସୁପ୍ରିମକୋର୍ଟକୁ ଦାୟିତ୍ୱ ଦିଆଯାଇଛି। ନିଶିକାନ୍ତ ଦୁବେ କଥାକୁ ଭୁଲ ଉପାୟରେ ଉପସ୍ଥାପିତ କରି ସୁପ୍ରିମକୋର୍ଟକୁ ବଦନାମ କରିବାକୁ ଚେଷ୍ଟା କରୁଛନ୍ତି।"

କର୍ଣ୍ଣାଟକ ହିଜାବ ମାମଲା ଏବଂ ୱାକଫ ସଂଶୋଧନ ଆଇନ ମାମଲା ସମେତ ଅନେକ ବଡ଼ ବଡ଼ ମାମଲାର ସହ ଜଡିତ ଆଡଭକେଟ୍ ଅନ ରେକର୍ଡ କହିଛନ୍ତି ଯେ ନିଶିକାନ୍ତ ଦୁବେ ସୁପ୍ରିମକୋର୍ଟଙ୍କୁ ମନ୍ଦିର ମାମଲାରେ କାଗଜପତ୍ର ମାଗିବା ଏବଂ ମସଜିଦକୁ ଛାଡ ଦେବାର ଅଭିଯୋଗ କରିଛନ୍ତି। ଏହା କହି ସେ ସାମ୍ପ୍ରଦାୟିକ ଆଧାରରେ ସମାଜରେ ସୁପ୍ରିମକୋର୍ଟ ପ୍ରତି ଅବିଶ୍ୱାସ ସୃଷ୍ଟି କରୁଛନ୍ତି।

ଚିଠିରେ ଏହା ମଧ୍ୟ କୁହାଯାଇଛି ଯେ ଦୁବେ ପ୍ରଧାନ ବିଚାରପତି ସଞ୍ଜିବ ଖାନ୍ନାଙ୍କ ନାଁ ନେଇଛନ୍ତି ଏବଂ ତାଙ୍କୁ ଦେଶରେ ଗୃହଯୁଦ୍ଧ ପାଇଁ ଦାୟୀ କରିଛନ୍ତି। ଏପରି ସମସ୍ତ ବକ୍ତବ୍ୟ କୋର୍ଟ ଅବମାନନା ଆଇନର ଧାରା 2(c)(i) ଅନୁଯାୟୀ ସୁପ୍ରିମକୋର୍ଟଙ୍କ ଅବମାନନା ସହିତ ସମାନ। ତେଣୁ, ଆଟର୍ଣ୍ଣି ଜେନେରାଲ ନିଶିକାନ୍ତ ଦୁବେଙ୍କ ବିରୁଦ୍ଧରେ ଅବମାନନା ମାମଲା ଆରମ୍ଭ କରିବାକୁ ଅନୁମତି ଦିଅନ୍ତୁ। ଉଲ୍ଲେଖନୀୟ ଯେ, ଯେ ପୂର୍ବତନ ୟୁପି ଆଇପିଏସ ଅମିତାଭ ଠାକୁର ମଧ୍ୟ ଏହି ପ୍ରସଙ୍ଗରେ ସୁପ୍ରିମକୋର୍ଟରେ ଏକ ଆବେଦନ ଦାଖଲ କରିଛନ୍ତି। ସେ ଆଟର୍ଣ୍ଣି ଜେନେରାଲଙ୍କୁ ଅନୁମତି ପାଇଁ ଏକ ଚିଠି ମଧ୍ୟ ପଠାଇଛନ୍ତି।