ନୂଆଦିଲ୍ଲୀ: କଂଗ୍ରେସର ଛାତ୍ର ସଂଗଠନ (ଏନଏସୟୁଆଇ)ର ପ୍ରାୟ ୧୦୦ କାର୍ଯ୍ୟକର୍ତ୍ତା ଦିଲ୍ଲୀ ଏନଟିଏ କାର୍ଯ୍ୟାଳୟରେ ହୋହଲ୍ଲା କରିଛନ୍ତି । ଏପରିକି କାର୍ଯ୍ୟାଳୟ ଭିତରୁ ତାଲା ପକାଇ ଦେଇଛନ୍ତି । ନିଟ୍-ୟୁଜି ପରୀକ୍ଷାରେ ଅନିୟମିତତା ଏବଂ ପେପର ଲିକ୍ ମାମଲାକୁ କେନ୍ଦ୍ର କରି କଂଗ୍ରେସ ବିକ୍ଷୋଭ ପ୍ରଦର୍ଶନ କରିଛି । ନ୍ୟାସନାଲ ଟେଷ୍ଟିଂ ଏଜେନ୍ସି (ଏନଟିଏ) କାର୍ଯ୍ୟାଳୟରେ ଛାତ୍ର କଂଗ୍ରେସ ପକ୍ଷରୁ ଆନ୍ଦୋଳନ କରାଯାଇଛି ।
ଭାଇରାଲ୍ ହେଉଥିବା ଭିଡିଓରେ ଦେଖିବାକୁ ମିଳିଛି ଯେ, କଂଗ୍ରେସ ଛାତ୍ର ସଂଗଠନର କାର୍ଯ୍ୟକର୍ତ୍ତାମାନେ ଧାଡ଼ି ହୋଇ ଏନଟିଏ କାର୍ଯ୍ୟାଳୟରେ ପହଞ୍ଚିଛନ୍ତି ଏବଂ ସେଠାରେ ଜୋରଦାର ଆନ୍ଦୋଳନ କରିଛନ୍ତି । ଏନଟିଏ କାର୍ଯ୍ୟାଳୟରେ ପଶି ଭିତର ପଟୁ ତାଲା ପକାଇଦେଇଛନ୍ତି । ଏନଟିଏର ଦୁର୍ନୀତି ଚଳିବ ନାହିଁ ବୋଲି କଂଗ୍ରେସର ଛାତ୍ର ନେତାମାନେ ନାରା ଦେଇଛନ୍ତି ।
ଏପରିକି ‘ଏନଟିଏ ବନ୍ଦ କର, ବନ୍ଦ କର’ ନାରାରେ କମ୍ପିଛି ଏନଟିଏ ପରିସର । ଯୁବ କଂଗ୍ରେସ ପକ୍ଷରୁ ସଂସଦ ବାହାରେ ନାରାବାଜି ଏବଂ ଆନ୍ଦୋଳନ ପରେ ଏବେ କଂଗ୍ରେସର ଛାତ୍ର ସଂଗଠନ ପକ୍ଷରୁ ଆନ୍ଦୋଳନ କରାଯାଇଛି । ଆଜି ସଂସଦରେ ଉଦବୋଧନ ଦେଇ ନିଟ୍ ପରୀକ୍ଷାରେ ପେପର ଲିକ୍ର ଦୋଷୀଙ୍କୁ କଠୋର ଶାସ୍ତି ଦିଆଯିବ ବୋଲି କହିଥିଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ।