ନୂଆଦିଲ୍ଲୀ,୨୭।୬: ରାଷ୍ଟ୍ରପତି ଦ୍ରୌପଦୀ ମୁର୍ମୁ ଗୁରୁବାର ସଂସଦର ଉଭୟ ସଦନକୁ ସମ୍ବୋଧିତ କରିଛନ୍ତି। ଏହି ସମୟରେ, ସେ ୧୯୭୫ ରେ ଲାଗୁ ହୋଇଥିବା ଜରୁରୀକାଳୀନ ସ୍ଥିତିକୁ ସମ୍ବିଧାନ ଉପରେ ସିଧାସଳଖ ଆକ୍ରମଣ ଏବଂ ଏକ ଅନ୍ଧକାର ଅଧ୍ୟାୟ ବୋଲି କହିଥିଲେ।   ତେବେ ରାଷ୍ଟ୍ରପତିଙ୍କ ସମ୍ବୋଧନ ସମୟରେ ପ୍ରଧାନମନ୍ତ୍ରୀ ମୋଦୀଙ୍କୁ ବାରମ୍ବାର ସଂସଦ ଟିଭିରେ ଦେଖାଯାଉଥିବା ନେଇ କଂଗ୍ରେସ ପ୍ରତିକ୍ରିୟା ରଖିଛି।

କଂଗ୍ରେସର ସାଧାରଣ ସମ୍ପାଦକ ଜୟରାମ ରମେଶ ସରକାରଙ୍କ ବିରୋଧରେ ଅଭିଯୋଗ କରିଛନ୍ତି। ସେ କହିଛନ୍ତି ରାଷ୍ଟ୍ରପତି ମୁର୍ମୁ ସଂସଦକୁ ସମ୍ବୋଧିତ କରିବା ସମୟରେ ପ୍ରଧାନମନ୍ତ୍ରୀ ମୋଦୀଙ୍କୁ ୭୩ ଥର ଏବଂ ବିରୋଧୀଦଳ ନେତା ରାହୁଲ ଗାନ୍ଧୀଙ୍କୁ ମାତ୍ର ୬ ଥର ଦେଖାଯାଇଛି।

ଜୟରାମ ରମେଶ ‘ଏକ୍ସ’ ରେ ପୋଷ୍ଟ କରି ଲେଖିଛନ୍ତି, ୫୧ ମିନିଟର ରାଷ୍ଟ୍ରପତିଙ୍କ ଅଭିଭାଷଣରେ କେତେଥର କାହାକୁ ଦେଖାଯାଇଥିଲା?  ନରେନ୍ଦ୍ର ମୋଦୀଙ୍କୁ ୭୩ ଥର ଏବଂ ବିରୋଧୀଦଳର ନେତା ରାହୁଲ ଗାନ୍ଧୀଙ୍କୁ ୬ଥର ଦେଖାଯାଇଥିଲା। ଏଭଳି ଭାବରେ ସରକାରଙ୍କୁ ୧୦୮ଥର ଏବଂ ବିରୋଧୀଙ୍କୁ ୧୮ ଥର ଦେଖାଯାଇଛି। ସଂସଦର ଟିଭି ଗୃହର କାର୍ଯ୍ୟ ଦେଖାଇବା ପାଇଁ ରହିଛି,  କ୍ୟାମେରାଜୀବିଙ୍କ ଆତ୍ମମୁଗ୍ଧତା ପାଇଁ ନୁହେଁ।