ନୂଆଦିଲ୍ଲୀ: ଗୋଟିଏ ସମୟରେ ଭାରତ ବିରୋଧରେ ନେପାଳକୁ ଛିଡ଼ା କରିବାକୁ ପ୍ରୟାସ କରିଥିଲା ଚୀନ୍ । ଏଥିପାଇଁ ନେପାଳକୁ ପ୍ରଚୁର ଆର୍ଥିକ ସହାୟତା କରିଥିଲା ଚୀନ୍ । କିନ୍ତୁ ନିଜ ଯୋଜନାରେ ସଫଳ ନହେବାରୁ ଏବେ ଚୀନ ନେପାଳର ହାତ ଛାଡ଼ିଦେଇଥିବା କୁହାଯାଉଛି । ପ୍ରାୟ ୯ ବର୍ଷ ପୂର୍ବେ ବିକାଶମୂଳକ କାର୍ଯ୍ୟ ଲାଗି ଯେଉଁ ଅର୍ଥ ଦେବ ବୋଲି ଚୀନ ପ୍ରତିଶ୍ରୁତି ଦେଇଥିଲା ତାହା କଲା ନାହିଁ ।
ଏବେ ନେପାଳ ସରକାର ନିଜ ଅର୍ଥରେ ଏହି ବିକାଶ କାର୍ଯ୍ୟ କରିବେ ବୋଲି ସ୍ଥିର କରିଛନ୍ତି । ଆରନିକୋ ହାଇଓ୍ବେ ପାଇଁ ନେପାଳକୁ ଟଙ୍କା ଦେବାକୁ କହିଥିଲା ଚୀନ । ୨୦୧୫ରେ ଚୀନ୍ ରାଷ୍ଟ୍ରପତି ନେପାଳକୁ ଏଥିପାଇଁ ୧୬ ବିଲିୟନ ଟଙ୍କା ଦେବାକୁ ପ୍ରତିଶ୍ରୁତି ଦେଇଥିଲେ । ହେଲେ ଏବେ ଅନେକ କଲ, ଅନୁରୋଧ ଏବଂ ବୈଠକ ପରେ ବି ଏହି ଅର୍ଥ ନେପାଳକୁ ମିଳିପାରି ନାହିଁ ।
ଚୀନ୍ ମୁହଁ ଫେରାଇ ନେବା ପରେ ଏବେ ନେପାଳ ଏହି ରାଜମାର୍ଗ ଲାଗି ୩.୬ ବିଲିୟନ୍ ଟଙ୍କା ଖର୍ଚ୍ଚ କରିବାକୁ ଯାଉଛି । ଆରନିକୋ ହାଇଓ୍ବେର ଏକ ବଡ଼ ଅଂଶ ଯାହାକୁ କୋଡାରୀ ହାଇଓ୍ବେ ମଧ୍ୟ କୁହାଯାଏ । ୧୯୬୦ ଦଶକରେ ଚୀନ୍ ସରକାରଙ୍କ ଦ୍ବାରା ତିଆରି ହୋଇଥିଲା । ଏପ୍ରିଲ ୨୦୧୫ରେ ନେପାଳରେ ଆସିଥିବା ଭୟଙ୍କର ଭୂମିକମ୍ପ ଫଳରେ ହାଇଓ୍ବେର ଅନେକ ଅଂଶ ଗୁରୁତର ଭାବେ କ୍ଷତିଗ୍ରସ୍ତ ହୋଇଥିଲା ।
ପୁଷ୍ପ କମଲ ଦହଲ ରାଷ୍ଟ୍ରପତି ସି ଜିନପିଙ୍ଗଙ୍କୁ ଦୁଇ ଥର କଲ କରିଥିଲେ, କିନ୍ତୁ କୌଣସି ଅର୍ଥ ମିଳିଲା ନାହିଁ । ଫଳରେ ସରକାର ୨୬ କିଲୋମିଟର କ୍ଷତିଗ୍ରସ୍ତ ରାସ୍ତାର ନିର୍ମାଣ ଲାଗି ୩.୬ ବିଲିୟନ୍ ଟଙ୍କା ଆବଣ୍ଟିତ କରିଛନ୍ତି । ସେପଟେ ସି ଜିନିପିଙ୍ଗ ବେଲ୍ଟ ଆଣ୍ଡ ରୋଡ୍ ଇନିସିଏଟିଭ (ବିଆରଆଇ) ଯୋଜନାରେ ମଧ୍ୟ ନେପାଳ ସାମିଲ ରହିଛି । ଏଥିରେ ନେପାଳ ୭ ବର୍ଷ ହେଲା ସାମିଲ ହୋଇଥିଲେ ହେଁ ଦେଶରେ ସେମିତି କିଛି ବିକାଶ ହୋଇପାରି ନାହିଁ ।
