ନୂଆଦିଲ୍ଲୀ,୭।୪: ମିଆଁମାରରେ ଆସିଥିବା ପ୍ରଳୟଙ୍କାରୀ ଭୂକମ୍ପ ସାରା ବିଶ୍ବକୁ କରିଛି ଭୟଭୀତ। ଏବେ ଚୀନ୍ ପ୍ରତି ରହିଛି ବଡ଼ ବିପଦ। ଗ୍ରାସିପାରେ ଏଭଳି ଏକ ମହାଭୂକମ୍ପ। ଫାଟିଯିବ ମାଟି, ଭୁଶୁଡିବ ଆକାଶ ଛୁଆଁ ବିଲ୍ଡିଂ। ଏନେଇ ଚୀନ୍ ଭୂ-ବିଜ୍ଞାନୀମାନେ କରିଛନ୍ତି ପୂର୍ବାନୁମାନ। ସେମାନେ ଦାବି କରିଛନ୍ତି ଏଠାରେ ଯେକୌଣସି ସମୟରେ ୮ ତୀବ୍ରତାରେ ଆସିପାରେ ଭୂମିକମ୍ପ । ଯଦି ଏହି ଭବିଷ୍ୟବାଣୀ ସତ ହୁଏ,ତେବେ ଚୀନର ଅନେକ ଅଞ୍ଚଳ ସମ୍ପୂର୍ଣ୍ଣ ଧ୍ୱଂସ ହୋଇଯିବ। କେବଳ ସେତିକି ନୁହେଁ ପ୍ରଭାବିତ ହେବ ହିମାଳୟ ଅଞ୍ଚଳ। ଫଳରେ ଉତ୍ତର ଭାରତରେ ମଧ୍ୟ ଆସିପାରେ ପ୍ରଳୟଙ୍କାରୀ ଭୂକମ୍ପ।
ସାଉଥ୍ ଚାଇନା ମର୍ଣ୍ଣିଂ ପୋଷ୍ଟ ଅନୁଯାୟୀ, ବେଜିଂ ଭୂମିକମ୍ପ ଏଜେନ୍ସିର ବରିଷ୍ଠ ଇଞ୍ଜିନିୟର ଝୁ ହୋଙ୍ଗବିନଙ୍କ ଟିମ୍ ୧୫୦ ବର୍ଷର ଭୂମିକମ୍ପ ଉପରେ ଆଧାରିତ ଏକ ରିପୋର୍ଟ ପ୍ରସ୍ତୁତ କରିଛନ୍ତି। ଏଥିରେ କୁହାଯାଇଛି ଗତ ୧୫୦ ବର୍ଷ ମଧ୍ୟରେ ପୂର୍ବ ଏସିଆର ପାମିର-ବାଇକାଲ ଭୂକମ୍ପୀୟ ବେଲ୍ଟରେ ୧୨ ଥର ଶକ୍ତିଶାଳୀ ଭୂମିକମ୍ପ ଅନୁଭୂତ ହୋଇଛି। ଏହି ରିପୋର୍ଟ ଚୀନ ସରକାରଙ୍କ ଚିନ୍ତା ବଢାଇ ଦେଇଛି। ରିପୋର୍ଟରେ କୁହାଯାଇଛି ଏଥିମଧ୍ୟରୁ କେବଳ ଚୀନ୍ରେ ୫ଟି ଭୂମିକମ୍ପ ଅନୁଭୂତ ହୋଇଥିଲା। ଏବେ, ଏହାର ଷଷ୍ଠ ଚକ୍ର ଯୋଗୁଁ, ଚୀନ୍ ଚାରିପାଖରେ ଭୂମିକମ୍ପର ଝଟକା ଅନୁଭୂତ ହେବ। ସିଚୁଆନ୍, ୟୁନାନ୍ ଏବଂ ହିମାଳୟ ଅଞ୍ଚଳରେ ଭୂମିକମ୍ପ ହୋଇପାରେ। ଏହି ଭୂମିକମ୍ପର ତୀବ୍ରତା ରିକ୍ଟର ସ୍କେଲରେ ୮ ରହିବ। ଭୂମିକମ୍ପର ମୁଖ୍ୟ କାରଣ ହେଉଛି ଏଠାରେ ଟେକ୍ଟୋନିକ୍ ପ୍ଲେଟଗୁଡ଼ିକ ମଧ୍ୟରେ ଘର୍ଷଣ ବଢିଯାଇଛି।
ରିପୋର୍ଟ ପ୍ରସ୍ତୁତ କରିଥିବା ବୈଜ୍ଞାନିକମାନେ କହିଛନ୍ତି ,ଚଳିତ ବର୍ଷ ଏକ ଶକ୍ତିଶାଳୀ ଭୂମିକମ୍ପ ଆସିପାରେ। ଏପରି ସ୍ଥିତିରେ, ଚୀନ୍ର ହଜାର ହଜାର କୋଠା ମାଟିରେ ମିଶିଯିବ। ମିଆଁମାରରେ ଭୂମିକମ୍ପ ପରେ ଏହି ଭବିଷ୍ୟବାଣୀ ଚୀନ୍ ସରକାରଙ୍କ ପାଇଁ ସତର୍କର ଘଣ୍ଟି। ତେବେ, ଚୀନ୍ର ସରକାରୀ ବୈଜ୍ଞାନିକମାନେ କହିଛନ୍ତି, ଚଳିତ ବର୍ଷ ଏଭଳି କିଛି ଘଟିବ ବୋଲି ଏପର୍ଯ୍ୟନ୍ତ କୌଣସି ସଙ୍କେତ ନାହିଁ। ୨୦୦୮ ମସିହାରେ ଚୀନର ସିଚୁଆନ ପ୍ରଦେଶରେ ଏକ ଭୂମିକମ୍ପ ଅନୁଭୂତ ହୋଇଥିଲା। ଯଦି ଏହି ପୂର୍ବାନୁମାନ ସହ ହୁଏ ଚୀନ୍ ସହ ହିମାଳୟ ଅଞ୍ଚଳରେ ବିନାଶ ଆସିପାରେ। ଏହାଦ୍ବାରା ଭାରତର ଉତ୍ତର ପୂର୍ବ ରାଜ୍ୟ, ଉତ୍ତରାଖଣ୍ଡ, ନେପାଳର ସୀମା ଓ ଅରୁଣାଚଳ ପ୍ରଦେଶ ଭଳି ଅଞ୍ଚଳରେ ଅନେକ କ୍ଷୟକ୍ଷତି ହୋଇପାରେ। ନିକଟରେ, ମିଆଁମାରରେ ୭.୬ ତୀବ୍ରତାର ଏକ ଶକ୍ତିଶାଳୀ ଭୂମିକମ୍ପ ହୋଇଥିଲା, ଯେଉଁଥିରେ ପର୍ଯ୍ୟନ୍ତ ୩୦୦୦ ଲୋକଙ୍କର ମୃତ୍ୟୁ ହୋଇସାରିଛି। ତଥାପି, କୁହାଯାଉଛି ଯେ ଶହ ଶହ ଲୋକ ଏବେ ବି ଭଗ୍ନାବଶେଷ ତଳେ ଚାପି ହୋଇ ରହିଛନ୍ତି।
