ଅନୁଗୁଳ, ୦୮/୦୩: ଯୁବତୀଙ୍କ ପ୍ରେମକୁ ସ୍ୱୀକାର କଲେନି ପରିବାର ଲୋକ । ଇଚ୍ଛା ବିରୋଧରେ ଅନ୍ୟ ଜଣେ ଯୁବକଙ୍କ ସହ ଚାଲିଥିଲା ବିବାହ । ହେଲେ ନିଜର ପ୍ରେମକୁ ସାକାର କରିବାକୁ ଯୋଜନା କଲେ ଯୁବତୀ । ପ୍ରେମିକ ସହିତ ହାତ ମିଳାଇ ଫୋନ୍ କରିଦେଲେ ପୁଲିସ୍କୁ। ବିବାହ ଚାଲିଥିଲା ବେଳେ ଅତର୍କିତ ଭାବେ ପୁଲିସ୍ ପହଞ୍ଚି ବାରୁ ବେଦିରୁ ଉଠି ଆସିଲେ ଯୁବତୀ । ପରିବାର ଲୋକ ଇଚ୍ଛା ବିରୋଧରେ ବାହାଘର କରୁଛନ୍ତି ବୋଲି ନିର୍ଭୀକ ହୋଇ ଅଭିଯୋଗ କଲେ । ଫଳରେ ଯୁବତୀଙ୍କୁ ଉଦ୍ଧାର କରି ଥାନାକୁ ଆଣି ପଚରାଉଚୁରା କରୁଛି ପୁଲିସ୍। ଅନୁଗୁଳ ସହର ଉପକଣ୍ଠ ଚଣ୍ଡୀଖମଣ ଶିବ ମନ୍ଦିରଠାରେ ଶୁକ୍ରବାର ଘଟିଥିବା ଏହି ଘଟଣା ଚର୍ଚ୍ଚାର ବିଷୟ ହୋଇଛି । ବର ବେଶରେ ଆସିଥିବା ଯୁବକ ଶିଶୁପାଳ ହୋଇ ଫେରିଥିବା ବେଳେ ଯୁବତୀଙ୍କୁ ଥାନାରେ ପୁଲିସ୍ ବୁଝାସୁଝା କରୁଛି ।
ସୂଚନା ମୁତାବକ, ଯୁବତୀଙ୍କ ଘର କିଶୋରନଗର ବ୍ଲକ୍ରେ । ବାପା-ମା’ର ଏହି ଜ୍ୟେଷ୍ଠ କନ୍ୟା କଳା ବିଭାଗର ସ୍ନାତକୋତ୍ତର ଛାତ୍ରୀ । ଘରକୁ ଯା’ଆସ ଭିତରେ ଗାଁ’ ପାଖ ଜଣେ ସମ୍ପର୍କୀୟ ଯୁବକଙ୍କ ସହିତ ପ୍ରେମ ସମ୍ପର୍କ ଗଢ଼ି ଉଠିଥିଲା । ସମ୍ପର୍କ ନିବିଡ଼ ହୋଇଥିଲା । ଉଭୟ ପରସ୍ପରକୁ ବିବାହ କରିବାକୁ ସ୍ଥିର କରିନେଇଥିଲେ । ମାତ୍ର ଯୁବତୀଙ୍କ ପରିବାର ଲୋକ ସେମାନଙ୍କ ପ୍ରେମକୁ ସମ୍ମତି ଜଣାଇଲେନି । ବରଂ ଯୁବତୀଙ୍କୁ ଅନ୍ୟତ୍ର ବିବାହ ପାଇଁ ବୁଝାଇଥିଲେ । ତିନି ମାସ ତଳୁ ବଅଁରପାଳ ବ୍ଲକ୍ ଅଞ୍ଚଳର ଜଣେ ଯୁବକଙ୍କ ସହିତ ବିବାହ ଲଗ୍ନ ସ୍ଥିର ହୋଇଥିଲା । ଯୁବତୀଙ୍କ ବିବାହ ଠିକ୍ ହୋଇଥିବା ଜାଣିବା ପରେ ପ୍ରେମିକ ପରିବାର ଲୋକଙ୍କୁ ଧରି ତାଙ୍କ ଘରେ ପହଞ୍ଚିଥିଲେ । ମାତ୍ର ଯୁବତୀଙ୍କ ପରିବାର ଲୋକ ରାଜି ହୋଇନଥିଲେ ।
ସେପଟେ ଯୁବତୀଙ୍କୁ ବୁଝାସୁଝା କରି ବଅଁରପାଳ ଅଞ୍ଚଳର ଯୁବକଙ୍କ ସହ ବିବାହ କରିବାକୁ କୌଣସିମତେ ରାଜି କରାଇଥିଲେ । କାଳେ ପ୍ରେମିକ ବିବାହରେ କେଁ’ ସାଜିବେ, ତେଣୁ ଗାଁ’ଠୁ ଦୂର ଅନୁଗୁଳ ସହର ଉପକଣ୍ଠ ଚଣ୍ଡୀଖମଣ ମନ୍ଦିରରେ ବିବାହ ପ୍ରସ୍ତୁତି ହୋଇଥିଲା । ମଧ୍ୟାହ୍ନରେ ବିବାହ ଭୋଜି ଚାଲିଥିଲା । ବରଯାତ୍ରୀ ପହଞ୍ଚି ସାରିଥିଲେ । ଏତିକି ବେଳେ ପ୍ରେମିକ ‘୧୧୨’କୁ ଫୋନ୍ କରି ପୁଲିସ୍କୁ ଯୁବତୀଙ୍କ ଇଚ୍ଛା ବିରୁଦ୍ଧରେ ବାହାଘର ହେଉଥିବା ଅଭିଯୋଗ କରିଥିଲେ । ଫୋନ୍ କଲ୍ ପାଇ ପୁଲିସ୍ ଚଣ୍ଡୀଖମଣ ମନ୍ଦିରରେ ପହଞ୍ଚି ପରିସ୍ଥିତି ଅନୁଧ୍ୟାନ କରିଥିଲା । ପୁଲିସ ଦେଖି ଯୁବତୀ ବେଦିରୁ ଉଠି ଆସିବା ସହ ସେ ଏହି ବିବାହରେ ରାଜି ନଥିବା ଖୋଲାଖୋଲି ପ୍ରକାଶ କରିଥିଲେ । ଫଳରେ ପୁଲିସ୍ ତାଙ୍କୁ ଉଦ୍ଧାର କରି ଥାନାକୁ ଆଣିଥିଲା । ଥାନାରେ ଯୁବତୀଙ୍କୁ ବୁଝାସୁଝା କରିବା ପରେ ତାଙ୍କ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିବା ଜଣାପଡିଛି ।
