ଭୁବନେଶ୍ୱର ୨୧/୦୫ : ତେଜିଲା ସଂରକ୍ଷଣ ରାଜିନୀତି l ଓବିସି ପିଲାଙ୍କୁ ଶିକ୍ଷା କ୍ଷେତ୍ରରେ ୨୭ ପ୍ରତିଶତ ସଂରକ୍ଷଣ ଦାବିରେ ବିଜେଡି କରିଛି ଆନ୍ଦୋଳନ । ରାଜଭବନ ଆଗରେ ବିଜୁ ଜନତା ଦଳର ପକ୍ଷରୁ ଧାରଣା ଦିଆଯାଇଛି । ଦୀର୍ଘ ଦିନ ପରେ ଏକ ବଡ଼ ଆନ୍ଦୋଳନରେ ବହୁ ସଂଖ୍ୟାରେ ବିଜେଡି ନେତା, କର୍ମକର୍ତ୍ତା ସାମିଲ ହୋଇଥିଲେ । ଏହି ପ୍ରତିବାଦ ସଭାରେ ବିଜେଡି ନେତାମାନେ କହିଲେ, ଯାହାର ସଂଖ୍ୟା ଯେତେ ତାହାର ଭାଗ ସେତେ ହେବା ଦରକାର ।

ଓବିସିଙ୍କୁ ୨୭ ପ୍ରତିଶତ ସଂରକ୍ଷଣ ପ୍ରଦାନ କରିବାକୁ ଦାବି କରି ଆସୁଛି ବିଜେଡି । କିଛି ଦିନ ତଳେ ରାଜ୍ୟ ସରକାର ଶିକ୍ଷା କ୍ଷେତ୍ରରେ ଓବିସିଙ୍କୁ ୧୧.୨୫ ପ୍ରତିଶତ ସଂରକ୍ଷଣ ପ୍ରଦାନ କରିବାକୁ ନିଷ୍ପତ୍ତି ନେଇଥିଲେ । ମାତ୍ର ଏହା ପଛୁଆ ବର୍ଗଙ୍କୁ ଧୋକା ବୋଲି ବିଜେଡି ନେତା କହିଛନ୍ତି । ସରକାରୀ କଲେଜ ଓ ବିଶ୍ୱବିଦ୍ୟାଳୟରେ ଯେଉଁଠି ସିଟ୍ ଖାଲି ପଡୁଛି, ସେଠି ସଂରକ୍ଷଣ ଦିଆଯାଇଛି । ଏଥିରେ କ’ଣ ଫାଇଦା ମିଳିବ ? ଓବିସି ଛାତ୍ରଛାତ୍ରୀଙ୍କୁ ମେଡିକାଲ, ଇଞ୍ଜିନିୟରିଂ କ୍ଷେତ୍ରରେ ସଂରକ୍ଷଣ କାହିଁକି ଦିଆଯାଉନି ? ତେଣୁ ଓବିସିମାନଙ୍କୁ ଶିକ୍ଷା କ୍ଷେତ୍ରରେ ୨୭ ପ୍ରତିଶତ ସଂରକ୍ଷଣ ଦେବାକୁ ଦଳ ଦାବି କରିଛି ବିଜେଡି । କେବଳ ଶିକ୍ଷା ନୁହେଁ, ବୃତ୍ତିଗତ ଶିକ୍ଷାରେ ସଂରକ୍ଷଣ ଦିଆଯାଉ । ଚାକିରି କ୍ଷେତ୍ରରେ ସଂରକ୍ଷଣ ନ ମିଳିଲେ କିଛି ଲାଭ ମିଳିବନି ବୋଲି ବିଜୁ ଜନତା ଦଳର ନେତାମାନେ କହିଥିଲେ । ସରକାର ଯଦି ଦାବି ନ ଶୁଣନ୍ତି ତେବେ ଆଗକୁ ଏ ଆନ୍ଦୋଳନ ଆହୁରି ତୀବ୍ର ଓ ବ୍ୟାପକ ହେବ ବୋଲି ବିଜେଡି କହିଛି । 

ବିଜେଡିର ସଂରକ୍ଷଣ ଆନ୍ଦୋଳନରେ ବରିଷ୍ଠ ନେତା ରଣେନ୍ଦ୍ର ପ୍ରତାପ ସ୍ୱାଇଁ, ଅରୁଣ ସାହୁ, ପ୍ରମିଳା ମଲ୍ଲିକ, ପ୍ରତାପ ଜେନା, ପ୍ରତାପ କେଶରୀ ଦେବ, ଦେବୀ ରଂଜନ ତ୍ରିପାଠୀ, ସେଂହାଗିନୀ ଛୁରିଆ, ବ୍ୟୋମକେଶ ରାୟ, ସୁଲୋଚନା ଦାସ ପ୍ରମୁଖ ସାମିଲ ହୋଇଥିଲେ l ଶେଷରେ ବିଜେଡିର ପ୍ରତିନିଧି ଦଳ ରାଜଭବନ ଯାଇ ରାଜ୍ୟପାଳଙ୍କୁ ସ୍ମାରକ ପତ୍ର ଦେଇଛନ୍ତି l