ନୂଆଦିଲ୍ଲୀ: ମୋଦୀ ସରକାରଙ୍କ ଉପରେ ଆକ୍ରମଣ ତୀବ୍ର କରିବ କଂଗ୍ରେସ । ଏଥିପାଇଁ ଦଳ ଏକ ସ୍ୱତନ୍ତ୍ର ଯୋଜନା ପ୍ରସ୍ତୁତ କରିଛି । କଂଗ୍ରେସ ନିଜର ରଣନୀତିକୁ ସୁଦୃଢ଼ ଏବଂ ବିସ୍ତାର କରିବାକୁ ପ୍ରସ୍ତୁତ ହେଉଛି । ଦିଲ୍ଲୀରେ ଏକ ବଡ଼ ବୈଠକ ଲାଗି କଂଗ୍ରେସ ସାରା ଦେଶରୁ ଏହାର ସମସ୍ତ ମୁଖପାତ୍ର/ମିଡିଆ ପ୍ୟାନେଲିଷ୍ଟଙ୍କୁ ଡାକିଛି । ସେମାନଙ୍କ ସଂଖ୍ୟା ପ୍ରାୟ ୧୪୦ ହେବ । ମୋଦୀ ସରକାରଙ୍କୁ ବୈଦେଶିକ ନୀତି, ଯୁଦ୍ଧବିରତିରେ ଟ୍ରମ୍ପଙ୍କ ହସ୍ତକ୍ଷେପ ଏବଂ ବିଦେଶକୁ ପ୍ରତିନିଧିମଣ୍ଡଳ ପଠାଇବା ଉପରେ ମୁଖପାତ୍ର/ମିଡିଆ ପ୍ୟାନେଲିଷ୍ଟଙ୍କୁ ଜବାବ ଦେବାକୁ ତାଲିମ ଦେବ କଂଗ୍ରେସ ।
କଂଗ୍ରେସ ଶୁକ୍ରବାର ଏହି ବୈଠକ କରିବ । ଏଥିରେ ଜୟରାମ ରମେଶ, ପବନ ଖେରା, ସୁପ୍ରିୟା ଶ୍ରୀନେତ ଏବଂ କିଛି ବରିଷ୍ଠ ନେତା ସମ୍ବୋଧିତ କରିବେ । ରାହୁଲ ଗାନ୍ଧୀ ଏବଂ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ଼ଗେ ମଧ୍ୟ ଏହି ବୈଠକରେ ଯୋଗ ଦେବେ । ତେବେ ବର୍ତ୍ତମାନ କଂଗ୍ରେସ ଏବଂ ବିଜେପି ମଧ୍ୟରେ ଟ୍ବିଟର ଯୁଦ୍ଧ ମଧ୍ୟ ଚାଲିଛି।
ବୁଧବାର କଂଗ୍ରେସ ଏବଂ ରାହୁଲ ଗାନ୍ଧୀଙ୍କ ବିରୋଧରେ ପୋଷ୍ଟ କରିବା ନେଇ କଂଗ୍ରେସ ଯୁବ ଶାଖା ବିଜେପି ଆଇଟି ସେଲ୍ ମୁଖ୍ୟ ଅମିତ ମାଲବ୍ୟଙ୍କ ବିରୋଧରେ ପ୍ରତିବାଦ କରିଥିଲା । ଏହାର ନେତୃତ୍ୱ ନେଇଥିଲେ ଅକ୍ଷୟ ଲାକ୍ରା । ସେ କହିଛନ୍ତି ଯେ, ମାଲବ୍ୟଙ୍କ ଦ୍ୱାରା ସେୟାର କରାଯାଇଥିବା ଫଟୋରେ ରାହୁଲ ଗାନ୍ଧୀଙ୍କ ମୁହଁ ପାକିସ୍ତାନ ସେନା ମୁଖ୍ୟ ଅସୀମ ମୁନିରଙ୍କ ମୁହଁ ସହିତ ମିଶୁଛି। ଆମେ ଏହା ବିରୁଦ୍ଧରେ ପ୍ରତିବାଦ କରୁଛୁ ।
