ନୂଆଦିଲ୍ଲୀ: ଭାରତରେ ଘରୋଇ ବିମାନ ଯାତ୍ରୀଙ୍କ ସଂଖ୍ୟା ଲଗାତାର ବୃଦ୍ଧି ପାଉଛି । ଦେଶରେ ମଧ୍ୟବିତ୍ତ ବର୍ଗ ବୃଦ୍ଧି ପାଉଥିବାରୁ, ବିମାନ ଯାତ୍ରା କରୁଥିବା ଲୋକଙ୍କ ସଂଖ୍ୟା ମଧ୍ୟ ବଢ଼ୁଛି । ଏପ୍ରିଲ ମାସରେ ବିମାନ ଯାତ୍ରୀଙ୍କ ସଂଖ୍ୟା ବଢ଼ିଛି । ଭାରତୀୟ ବିମାନ ସେବା କମ୍ପାନୀଗୁଡ଼ିକ ଏପ୍ରିଲ ମାସରେ ଘରୋଇ ରୁଟରେ ୮.୪୫ ପ୍ରତିଶତ ଅଧିକ ବିମାନ ସେବା ପ୍ରଦାନ କରିଛନ୍ତି । ଏହି ସମୟ ମଧ୍ୟରେ ଏହି ବିମାନ କମ୍ପାନୀଗୁଡ଼ିକ ପ୍ରାୟ ଦେଢ଼ କୋଟି ଯାତ୍ରୀଙ୍କୁ ବିମାନ ସେବା ଯୋଗାଇଛନ୍ତି । 

ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (DGCA)ର ସଦ୍ୟତମ ତଥ୍ୟ ଅନୁଯାୟୀ, ଘରୋଇ ବିମାନ ଯାତାୟାତରେ ଇଣ୍ଡିଗୋର ସର୍ବାଧିକ ୬୪.୧ ପ୍ରତିଶତ ଅଂଶ ରହିଛି । ଏହା ପରେ ଏୟାର ଇଣ୍ଡିଆ ଗ୍ରୁପ୍ (୨୭.୨ ପ୍ରତିଶତ), ଆକାଶ ଏୟାର (୫ ପ୍ରତିଶତ) ଏବଂ ସ୍ପାଇସଜେଟ୍ (୨.୬ ପ୍ରତିଶତ) ରହିଛି । ଡିଜିସିଏ ଏହାର ମାସିକ ରିପୋର୍ଟରେ କହିଛି, ‘ଜାନୁଆରୀ-ଏପ୍ରିଲ, ୨୦୨୫ ମଧ୍ୟରେ ଘରୋଇ ବିମାନ ସେବା ପ୍ରଦାନକାରୀ ସଂସ୍ଥାଗୁଡ଼ିକ ୫ କୋଟି ୭୫ ଲକ୍ଷ ୧୩ ହାଜର ଯାତ୍ରୀଙ୍କୁ ସେବା ଦେଇଛନ୍ତି ।

ଗତ ବର୍ଷ ସମାନ ସମୟ ମଧ୍ୟରେ ଏହି ସଂଖ୍ୟା ୫ କୋଟି ୨୩ ଲକ୍ଷ ୪୬ ହଜାର ଥିଲା । ବାର୍ଷିକ ଆଧାରରେ ୯.୮୭ ପ୍ରତିଶତ ଏବଂ ମାସିକ ଆଧାରରେ ୮.୪୫  ପ୍ରତିଶତ ଅଭିବୃଦ୍ଧି ରେକର୍ଡ କରାଯାଇଛି। ଏପ୍ରିଲ ମାସରେ ଘରୋଇ ବିମାନ ଯାତ୍ରୀଙ୍କ ସଂଖ୍ୟା ୧ କୋଟି ୪୩ ଲକ୍ଷ ୧୬ ହଜାର ୧୪୩.୧୬ ଲକ୍ଷ ଥିଲା । ଗତବର୍ଷ ସମାନ ସମୟରେ ଯାତ୍ରୀଙ୍କ ସଂଖ୍ୟା ୧ କୋଟି ୩୨ ଲକ୍ଷ ଥିଲା । 

ଘରୋଇ ବିମାନ ସେବା ପ୍ରଦାନକାରୀ ସଂସ୍ଥାଗୁଡ଼ିକର 'ଅନ ଟାଇମ୍‌ ପରଫର୍ମାନ୍ସ’ (OTP) ଆଧାରରେ ଚାରୋଟି ବିମାନବନ୍ଦର - ବେଙ୍ଗାଲୁରୁ, ଦିଲ୍ଲୀ, ହାଇଦ୍ରାବାଦ ଏବଂ ମୁମ୍ବାଇକୁ ମୂଲ୍ୟାଙ୍କନ କରାଯାଇଥିଲା । ଇଣ୍ଡିଗୋର OTP 80.8 ପ୍ରତିଶତ ଥିଲା । ସେହିଭଳି ଆକାଶ ଏୟାର ଏବଂ ଏୟାର ଇଣ୍ଡିଆ ଗ୍ରୁପର ଓଟିପି ଯଥାକ୍ରମେ ୭୭.୫ ପ୍ରତିଶତ ଏବଂ ୭୨.୪ ପ୍ରତିଶତ ଥିଲା। ତଥ୍ୟ ଅନୁଯାୟୀ, ସ୍ପାଇସଜେଟର ସର୍ବନିମ୍ନ ୬୦ ପ୍ରତିଶତ ଓଟିପି ଥିଲା ।