ପାଟନା: ବିହାର ବିଧାନସଭା ନିର୍ବାଚନ ପୂର୍ବରୁ କଂଗ୍ରେସ ମହିଳାମାନଙ୍କ ପାଇଁ ଏକ ବଡ଼ ନିର୍ବାଚନୀ ପ୍ରତିଶ୍ରୁତି ଦେଇଛି। ପ୍ରଥମ ଗ୍ୟାରେଣ୍ଟି ଘୋଷଣା କରି କଂଗ୍ରେସ ନେତାମାନେ କହିଛନ୍ତି ଯେ, ଯଦି ମହାମେଣ୍ଟ ସରକାର ଗଠନ ହୁଏ, ତେବେ ମହିଳାମାନେ ପ୍ରତି ମାସରେ ୨୫୦୦ ଟଙ୍କା ପାଇବେ। ବିହାର କଂଗ୍ରେସ ସଭାପତି ରାଜେଶ କୁମାର ବୁଧବାର କହିଛନ୍ତି ଯେ, ଆମେ ମହିଳାଙ୍କ ଆର୍ଥିକ ସଫଳତା ପାଇଁ ପ୍ରସ୍ତୁତ । ଆମେ ରାଜ୍ୟର ମହିଳାମାନଙ୍କ ପାଇଁ ପ୍ରତି ମାସରେ ୨୫୦୦ ଟଙ୍କାର ଗ୍ୟାରେଣ୍ଟି ଘୋଷଣା କରୁଛୁ। ଏହି ଯୋଜନାର ନାମ 'ମାଇ ବହୀନ ମାନ ଯୋଜନା' ହେବ।
ରାଜେଶ କୁମାର କହିଛନ୍ତି ଯେ, କଂଗ୍ରେସ କ୍ଷମତାରେ ଥିବା ରାଜ୍ୟଗୁଡ଼ିକରେ ଏପରି ଯୋଜନା ପୂର୍ବରୁ ଚାଲିଛି। ଏପରି ଯୋଜନା ପ୍ରଥମେ କର୍ଣ୍ଣାଟକରେ ଆରମ୍ଭ ହୋଇଥିଲା । ହିମାଚଳ ପ୍ରଦେଶ ଏବଂ ଝାଡ଼ଖଣ୍ଡରେ ମଧ୍ୟ ଏହି ଯୋଜନା କାର୍ଯ୍ୟକାରୀ ହୋଇଛି । ବିଜେପି ବିହାରର ଜନସାଧାରଣଙ୍କୁ ସମାନ ପ୍ରତିଶ୍ରୁତି ଦେଇଥିଲା । କିନ୍ତୁ ସେମାନଙ୍କର ସରକାର ଗଠନ ହେବା ପରେ, ସେମାନେ ଏହାକୁ କାର୍ଯ୍ୟକାରୀ କରିବାକୁ ମନା କରିଦେଲେ ବୋଲି ରାଜେଶ କୁମାର ଅଭିଯୋଗ କରିଛନ୍ତି । ସେପଟେ କଂଗ୍ରେସ ଯାହା କହେ ତାହା କରେ । କର୍ଣ୍ଣାଟକ, ହିମାଚଳ ଏବଂ ଝାଡ଼ଖଣ୍ଡରେ ତାହା ଦେଖିପାରିବେ । ଆମେ ମହିଳା ସଶକ୍ତିକରଣ ପାଇଁ ନିରନ୍ତର କାମ କରୁଛୁ ବୋଲି ସେ କହିଛନ୍ତି ।
ଅନ୍ୟପଟେ ବିହାରର ମହିଳାମାନଙ୍କ ପାଇଁ ପ୍ରଥମ ଗ୍ୟାରେଣ୍ଟି ଘୋଷଣାକୁ ହେବାକୁ ନେଇ ଖୁସି ବ୍ୟକ୍ତ କରିଛନ୍ତି ମହିଳା କଂଗ୍ରେସ ଅଧ୍ୟକ୍ଷ ଅଳକା ଲାମ୍ବା । ସେ କହିଛନ୍ତି, ଏହି ଯୋଜନାର ନାଁ ‘'ମାଇ ବହୀନ ମାନ ଯୋଜନା' ଏବଂ ଏହି ଯୋଜନା ଆଧାରରେ ପ୍ରତି ମହିଳାଙ୍କୁ ମାସିକ ଅଢ଼େଇ ହଜାର ଟଙ୍କା ମିଳିବ ।
ଏହା ପୂର୍ବରୁ ଡିସେମ୍ବର ୨୦୨୪ ରେ ଆରଜେଡି ନେତା ଏବଂ ପୂର୍ବତନ ଉପମୁଖ୍ୟମନ୍ତ୍ରୀ ତେଜସ୍ୱୀ ଯାଦବ ଘୋଷଣା କରିଥିଲେ ଯେ, ଯଦି ୨୦୨୫ରେ ମହାମେଣ୍ଟ ସରକାର ଗଠନ ହୁଏ, ତେବେ ମାଇ ବହୀନ ମାନ ଯୋଜନା ମାଧ୍ୟମରେ ମହିଳାଙ୍କୁ ପ୍ରତିମାସ ୨୫୦୦ ଟଙ୍କା ଦେବେ ବୋଲି ପ୍ରତିଶ୍ରୁତି ଦେଇଥିଲେ। ତେଜସ୍ୱୀ କହିଛନ୍ତି ଯେ, ଏହି ଯୋଜନା ମାଧ୍ୟମରେ ମହିଳାମାନେ ସଶକ୍ତ ହେବେ।
