ନୂଆଦିଲ୍ଲୀ,୧୭/୦୪: କେନ୍ଦ୍ର ସରକାର କୋଚିଙ୍ଗ ସେଣ୍ଟରଗୁଡ଼ିକୁ ନିର୍ଦ୍ଦେଶ ଦେଇଛନ୍ତି ଯେ, କୌଣସି ଭ୍ରମାତ୍ମକ ଦାବି କରନ୍ତୁ ନାହିଁ, ଯେପରିକି ନିଶ୍ଚିତ ସଫଳତାର ଗ୍ୟାରେଣ୍ଟି। ଏପରିକି ଛାତ୍ରଛାତ୍ରୀ ଏବଂ ଅଭିଭାବକଙ୍କ ଠାରୁ ମିଳୁଥିବା ଅନୈତିକ କାର୍ଯ୍ୟପନ୍ଥାର ଅଭିଯୋଗ ମଧ୍ୟରେ ଉପଭୋକ୍ତାମାନଙ୍କୁ ଗୁରୁତ୍ବପୂର୍ଣ୍ଣ ସୂଚନା ନ ଲୁଚାଇବାକୁ କହିଛନ୍ତି।

ସରକାରଙ୍କ ପକ୍ଷରୁ ବିଭିନ୍ନ କୋଚିଂ ସେଣ୍ଟରକୁ ଦିଆଯାଇଥିବା ନିର୍ଦ୍ଦେଶରେ ଉଲ୍ଲେଖ କରାଯାଇଛି ଯେ, ସର୍ବୋଚ୍ଚ ପ୍ରତିଷ୍ଠାନରେ ନିଯୁକ୍ତି ଏବଂ ଚୟନ ଗ୍ୟାରେଣ୍ଟି ଦେଇ ଆଇନ ଏବଂ ନିର୍ଦ୍ଦେଶାବଳୀ ଉଲ୍ଲଂଘନ କରିବା, JEE/NEET ରେ ରାଙ୍କ ନିଶ୍ଚିତ କରିବା, ଗ୍ରାହକ ଅଧିକାର ଉଲ୍ଲଂଘନ କରିବା, ଭ୍ରମାତ୍ମକ ବିଜ୍ଞାପନ ଦେବା ଏବଂ ପ୍ରତିଶ୍ରୁତି ଦେଇ ସେବା ନଯୋଗାଇବା, ଫି ଫେରସ୍ତ ନକରି ପ୍ରବେଶକୁ ବାତିଲ କରିବା ଭଳି ଅନୁଚିତ ବାଣିଜ୍ୟ ଅଭ୍ୟାସ ବନ୍ଦ କରିବାକୁ କୁହାଯାଇଛି।

କୋଚିଂ ସେଣ୍ଟର ଏକ ଲାଭଦାୟକ ବ୍ୟବସାୟ ହୋଇଥିବା ବେଳେ, ଏହା ଉପଭୋକ୍ତା ସଂରକ୍ଷଣ ଅଧିନିୟମ ୨୦୧୯ର ପାଳନ କରିବା ବାଧ୍ୟତାମୂଳକ ଅଟେ। କେନ୍ଦ୍ରୀୟ ଉପଭୋକ୍ତା ସଂରକ୍ଷଣ ପ୍ରାଧିକରଣ (ସିସିପିଏ) ଏକ ବୟାନରେ କହିଥିଲା ଯେ, ଆଇଆଇଟି-ଜେଇଇ ଏବଂ ଏନ୍‌ଇଇଟି ଭଳି ପରୀକ୍ଷାର ଫଳାଫଳ ନିକଟରେ ଘୋଷଣା ପରେ ଦେଖିବାକୁ ମିଳିଛି ଯେ, କୋଚିଂ ସେଣ୍ଟରଗୁଡ଼ିକ 'କୋଚିଂ କ୍ଷେତ୍ରରେ ବିଭ୍ରାନ୍ତିକର ବିଜ୍ଞାପନ ନିଷେଧ, ୨୦୧୪' ରେ ଉଲ୍ଲେଖିତ ନିର୍ଦ୍ଦେଶାବଳୀକୁ ପାଳନ କରୁନାହାଁନ୍ତି।

ସିସିପିଏ କହିଛି ଯେ," କୋଚିଂ ସେଣ୍ଟରଗୁଡ଼ିକ ନିଶ୍ଚିତ ସଫଳତାର ପ୍ରତିଶ୍ରୁତି ଦେବାରୁ ଦୂରେଇ ରହିବା ଉଚିତ। କୋଚିଂ ସେଣ୍ଟରଗୁଡ଼ିକ ସେମାନଙ୍କର ବିଜ୍ଞାପନରେ ଛାତ୍ରଙ୍କ ନାମ, ରାଙ୍କ, କୋର୍ସ ଏବଂ କୋର୍ସ ପାଇଁ ଦେୟ ଦିଆଯାଇଥିଲା କି ନାହିଁ ପ୍ରମୁଖ ବିବରଣୀ ସ୍ପଷ୍ଟ ଭାବରେ ପ୍ରକାଶ କରିବା ଉଚିତ। ଏଥିସହିତ ଗୁରୁତ୍ବପୂର୍ଣ୍ଣ ସୂଚନା ଗୁଡ଼ିକୁ ବୈଧାନିକ ସତର୍କତାରେ ଉଲ୍ଲେଖ କରି ମୁଖ୍ୟ ଫର୍ଦ୍ଦରେ ଦର୍ଶାଇବା ବାଧ୍ୟତାମୂଳକ ଅଟେ। ଏହା ଦ୍ବାରା ଉପଭୋକ୍ତା ବା ଅଭିଭାବକ ମାନେ ଯେପରି କୌଣସି ଦ୍ବନ୍ଦରେ ପଡ଼ିବେ ନାହିଁ।"

କୋଚିଂ କ୍ଷେତ୍ରରେ ବିଭ୍ରାନ୍ତିକର ବିଜ୍ଞାପନ ରୋକିବା ପାଇଁ ନିର୍ଦ୍ଦେଶାବଳୀ, ୧୩ ନଭେମ୍ବର ୨୦୨୪ ରେ ଜାରି କରାଯାଇଥିଲା। ଏହି ନିର୍ଦ୍ଦେଶାବଳୀ କୋଚିଂ ସେଣ୍ଟରଗୁଡ଼ିକୁ ସେମାନଙ୍କର ସେବାର ପ୍ରଚାର ପାଇଁ ମିଥ୍ୟା କିମ୍ବା ବିଭ୍ରାନ୍ତିକର ଦାବି ଏବଂ ବିଜ୍ଞାପନ ଦେବା ଏବଂ ପ୍ରତାରଣାମୂଳକ କିମ୍ବା ଅନୁଚିତ କାର୍ଯ୍ୟରୁ ଲିପ୍ତ ନହେବାକୁ ପ୍ରତିବନ୍ଧକ କରିଥିଲା। ଏହି ନିର୍ଦ୍ଦେଶାବଳୀ ଛାତ୍ରମାନଙ୍କର ଶୋଷଣକୁ ରୋକିବା ଏବଂ ମିଥ୍ୟା ପ୍ରତିଶ୍ରୁତି ଦ୍ୱାରା ସେମାନଙ୍କୁ ଭ୍ରମିତ ନ କରିବା କିମ୍ବା ଅନୁଚିତ ଚୁକ୍ତିନାମାରେ ବାଧ୍ୟ ନ କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପକୁ ପ୍ରତିନିଧିତ୍ୱ କରେ। 

"ଏହି କ୍ଷେତ୍ରରେ ସ୍ୱଚ୍ଛତା ଏବଂ ନିରପେକ୍ଷତା ବୃଦ୍ଧି କରିବା ପାଇଁ ନିର୍ଦ୍ଦେଶାବଳୀ ପ୍ରସ୍ତୁତ କରାଯାଇଛି, ଯାହା ଛାତ୍ରଛାତ୍ରୀ ଏବଂ ସେମାନଙ୍କ ପରିବାରକୁ ସଠିକ୍ ଏବଂ ସତ୍ୟ ସୂଚନା ଉପରେ ଆଧାରିତ ସୂଚନାମୂଳକ ନିଷ୍ପତ୍ତି ନେବାରେ ସାହାଯ୍ୟ କରିବ। ଏହି ନିର୍ଦ୍ଦେଶାବଳୀ ପ୍ରଚଳିତ ନିୟମାବଳୀକୁ ପରିପୂରକ କରିଥାଏ ଏବଂ କୋଚିଂ କ୍ଷେତ୍ରରେ ବିଜ୍ଞାପନ ପରିଚାଳନା କରୁଥିବା ନିୟାମକ ଢାଞ୍ଚାକୁ ଆହୁରି ମଜବୁତ କରିଥାଏ ବୋଲି ସିସିପିଏ କହିଛି।