ନୂଆଦିଲ୍ଲୀ: ଦଳୀୟ କାର୍ଯ୍ୟାଳୟ ଖାଲି କରିବାକୁ ଆପ୍କୁ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ । ନିର୍ବାଚନକୁ ନଜରରେ ରଖି ଜୁନ୍ ୧୫ ଯାଏଁ ଆମ ଆଦମୀ ପାର୍ଟିକୁ ସମୟ ଦିଆଯାଇଛି । ରାଉସ ଆଭେନ୍ୟୁ କୋର୍ଟକୁ ଆବଣ୍ଟିତ ଜମି ଉପରେ ଆପର କାର୍ଯାଳୟ ତିଆରି ହୋଇଥିବା ନେଇ ଅଭିଯୋଗ ରହିଛି । ଏହି ମାମଲାରେ ହାଇକୋର୍ଟ ମଧ୍ୟ ଘର ଖାଲି କରିବାକୁ ନିର୍ଦ୍ଦେଶ ଦେଇଥିଲେ । ପରେ ହାଇକୋର୍ଟଙ୍କ ରାୟକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଥିଲା କେଜ୍ରିଓ୍ବାଲଙ୍କ ଦର ଆପ୍ ।
ଏବେ ସୁପ୍ରିମକୋର୍ଟ ମଧ୍ୟ ଘର ଖାଲି କରିବାକୁ ଆପ୍କୁ ନିର୍ଦ୍ଦେଶ ଦେଇଛନ୍ତି । ଏହା ସହ ନୂଆ କାର୍ଯ୍ୟାଳୟ ଲାଗି ଦଳ ଆବେଦନ କରିବାରିବ ବୋଲି ସର୍ବୋଚ୍ଚ ଅଦାଲତ କହିଛନ୍ତି । ସେପଟେ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି ଯେ, ସମ୍ବନ୍ଧିତ ବିଭାଗ ଆପର ଆବେଦନ ଉପରେ ୪ ସପ୍ତାହ ମଧ୍ୟରେ ନିଷ୍ପତ୍ତି ଶୁଣାଇବ । ଆପ୍ କାର୍ଯ୍ୟାଳୟ ଥିବା ଜମି ପୂର୍ବରୁ କୋର୍ଟକୁ ଆବଣ୍ଟିତ ହୋଇଛି । ସେଠାରେ ହାଇକୋର୍ଟର କର୍ମଚାରୀଙ୍କ ଲାଗି ଆବାସ ତିଆରି ହେବ । ତେଣୁ ଆପ୍ ସେଠାରେ କାର୍ଯ୍ୟାଳୟ କରିପାରିବ ନାହିଁ ବୋଲି ସୁପ୍ରିମକୋର୍ଟ କହିଛନ୍ତି ।
ଏହା ପୂର୍ବରୁ ଫେବୃଆରୀ ୧୪ରେ ମାମଲାର ଶୁଣାଣି ସମୟରେ ସୁପ୍ରିମକୋର୍ଟ ଅସନ୍ତୋଷ ପ୍ରକାଶ କରିଥିଲେ । ସିଜେଆଇ ଡିଓ୍ବାଇ ଚନ୍ଦ୍ରଚୂଡ କହିଥିଲେ ଯେ, କାହାରିକୁ ଆଇନ ଭାଙ୍ଗିବା ଲାଗି ଅନୁମତି ଦିଆଯିବ ନାହିଁ । ଜୁନ୍ ୧୫ ଭିତରେ ଏହି କାର୍ଯ୍ୟାଳୟ ଖାଲିବାକୁ ନିର୍ଦ୍ଦେଶ ଦିଆଗଲା ।
ଯେଉଁ ସ୍ଥାନକୁ ନେଇ ଚର୍ଚ୍ଚା ଜାରି ରହିଛି ସେଠାରେ ଦିଲ୍ଲୀର ପରିବହନ ମନ୍ତ୍ରୀଙ୍କ ବାସଭବନ ଥିଲା । ହେଲେ ପରବର୍ତ୍ତୀ ସମୟରେ ଆପ୍ ସେଠାରେ ନିଜର କାର୍ଯ୍ୟାଳୟ ନିର୍ମାଣ କରିଥିଲା । ସେପଟେ ଏହି ଜମି ଆପକୁ ଆବଣ୍ଟିତ ହୋଇଥିଲା । ସେଠାରେ କୌଣସି ପ୍ରକାର ଜବରଦଖଲ କରାଯାଇନାହିଁ ବୋଲି ଦାବି କରିଥିଲା ଆମ ଆଦମୀ ପାର୍ଟି ।
