ନୂଆଦିଲ୍ଲୀ: ଭାରତୀୟ ଜନତା ପାର୍ଟି (ବିଜେପି)ର ପରବର୍ତ୍ତୀ ରାଷ୍ଟ୍ରୀୟ ଅଧ୍ୟକ୍ଷ କିଏ ହେବେ ତାକୁ ନେଇ ଚର୍ଚ୍ଚା ଲାଗି ରହିଛି । ଏସବୁ ମଧ୍ୟରେ ବିଜେପିକୁ କେବେ ନୂଆ ରାଷ୍ଟ୍ରୀୟ ଅଧ୍ୟକ୍ଷ ମିଳିବେ ସେନେଇ ସୂଚନା ମିଳିଛି । ସୂତ୍ର ଅନୁଯାୟୀ, ଭାରତୀୟ ଜନତା ପାର୍ଟି (ବିଜେପି) ମାର୍ଚ୍ଚ ୨୦ ସୁଦ୍ଧା ନୂତନ ରାଷ୍ଟ୍ରୀୟ ଅଧ୍ୟକ୍ଷ ପାଇବାର ସମ୍ଭାବନା ରହିଛି। ଜାତୀୟ ଗଣମାଧ୍ୟମରେ ପ୍ରକାଶିତ ଖବର ଅନୁଯାୟୀ, ରାଜ୍ୟ ୟୁନିଟ୍ଗୁଡ଼ିକରେ ଦଳୀୟ ନିର୍ବାଚନ ପରେ ରାଷ୍ଟ୍ରୀୟ ସଭାପତି ପାଇଁ ନିର୍ବାଚନ ହେବାକୁ ଯାଉଛି । ରାଷ୍ଟ୍ରୀୟ ସଭାପତି ପାଇଁ ନିର୍ବାଚନ ଗତ ଜାନୁଆରୀରେ ହେବାର ଥିଲା। କିନ୍ତୁ ଦିଲ୍ଲୀ ବିଧାନସଭା ନିର୍ବାଚନ ଲାଗି ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଚୟନ ବିଳମ୍ବ ହୋଇଛି । ବିଜେପି ସମ୍ବିଧାନ ଅନୁଯାୟୀ, ଅଧା ରାଜ୍ୟରେ ନିର୍ବାଚନ ପୂର୍ବରୁ ଦଳର ଜାତୀୟ ଅଧ୍ୟକ୍ଷ ପାଇଁ ନିର୍ବାଚନ କରାଯାଇପାରିବ ନାହିଁ । ଏବେ ଜଗତ ପ୍ରକାଶ ନଡ୍ଡା ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଅଛନ୍ତି । ତାଙ୍କର କାର୍ଯ୍ୟକାଳ ଶେଷ ହୋଇଥିଲେ ହେଁ ନିର୍ବାଚନକୁ ଦୃଷ୍ଟିରେ ରଖି ତାଙ୍କର କାର୍ଯ୍ୟକାଳ ବୃଦ୍ଧି କରାଯାଇଥିଲା ।
ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ତାଲିକା
୧. ଅଟଳ ବିହାରୀ ବାଜପେୟୀ: ୧୯୮୦-୧୯୮୬
୨. ଲାଲ କୃଷ୍ଣ ଆଡଭାନୀ: ୧୯୮୬-୧୯୯୦, ୧୯୯୩-୧୯୯୮, ୨୦୦୪-୨୦୦୫
୩. ମୂରଲୀ ମନୋହର ଯୋଶୀ: ୧୯୯୧-୧୯୯୩
୪. କୁଶାଭାଉ ଠାକରେ: ୧୯୯୮-୨୦୦୦
୫. ବଙ୍ଗାରୁ ଲକ୍ଷ୍ମଣ: ୨୦୦୦-୨୦୦୧
୬. କେ ଜନ କୃଷ୍ଣମୂର୍ତ୍ତି: ୨୦୦୧-୨୦୦୨
୭. ଭେଙ୍କୟା ନାଇଡୁ: ୨୦୦୨-୨୦୦୪
୮. ରାଜନାଥ ସିଂହ: ୨୦୦୫-୨୦୦୯, ୨୦୧୩-୨୦୧୪
୯. ନିତୀନ ଗଡକରୀ: ୨୦୧୦-୨୦୧୩
୧୦. ଅମିତ ଶାହ: ୨୦୧୪-୨୦୧୭, ୨୦୧୭-୨୦୨୦
୧୧. ଜେପି ନଡ୍ଡା: ୨୦୨୦- ବର୍ତ୍ତମାନ ଯାଏଁ
ସୂଚନାଯୋଗ୍ୟ, ବିଜେପି ଏପର୍ଯ୍ୟନ୍ତ ୨୮ ରାଜ୍ୟ ଏବଂ ୮ କେନ୍ଦ୍ରଶାସିତ ଅଞ୍ଚଳ ମଧ୍ୟରୁ ୧୨ ରେ ନିର୍ବାଚନ ଶେଷ କରିଛି। ବିଜେପି ଆଗାମୀ ସପ୍ତାହରେ ଆଉ ୬ ରାଜ୍ୟରେ ନିର୍ବାଚନ କରିବାର ସମ୍ଭାବନା ରହିଛି । ଜେପି ନଡ୍ଡାଙ୍କୁ ପ୍ରଥମେ ୧୭ ଜୁନ୍ ୨୦୧୯ରେ ଦଳର କାର୍ଯ୍ୟକାରୀ ରାଷ୍ଟ୍ରୀୟ ଅଧ୍ୟକ୍ଷ ଭାବରେ ନିଯୁକ୍ତ କରାଯାଇଥିଲା ଏବଂ ସେ ୨୦ ଜାନୁଆରୀ ୨୦୨୦ ପର୍ଯ୍ୟନ୍ତ ଏହି ପଦବୀରେ ରହିଥିଲେ । ୨୦ ଜାନୁଆରୀ ୨୦୨୦ରେ ସେ ଦଳର ୧୧ତମ ରାଷ୍ଟ୍ରୀୟ ସଭାପତି ଭାବରେ ନିର୍ବାଚିତ ହୋଇଥିଲେ ।
