ନୂଆଦିଲ୍ଲୀ: ପ୍ରୟାଗରାଜ ମହାକୁମ୍ଭରେ ଜାନୁଆରୀ ୨୯ ମୌନୀ ଅମାବାସ୍ୟାରେ ହୋଇଥିବା ଦଳାଚକଟା ମାମଲାରେ ଉତ୍ତର ପ୍ରଦେଶର ଯୋଗୀ ସରକାରଙ୍କୁ ଆହ୍ଲାବାଦ ହାଇକୋର୍ଟରୁ ବଡ଼ ଆଶ୍ୱସ୍ତି ମିଳିଛି। ଦଳାଚକଟା ଘଟଣା ସମ୍ପର୍କରେ ଦାଖଲ ହୋଇଥିବା ଜନସ୍ୱାର୍ଥ ମାମଲାର ସମାଧାନ କରିଛନ୍ତି ଆହ୍ଲାବାଦ ହାଇକୋର୍ଟ।
ସୋମବାର ଆହ୍ଲାବାଦ ହାଇକୋର୍ଟରେ ହୋଇଥିବା ଶୁଣାଣିରେ, ୟୁପି ସରକାର ସୂଚନା ଦେଇଛନ୍ତି ଯେ, ନ୍ୟାୟିକ କମିଶନଙ୍କ ତଦନ୍ତ ପରିସରକୁ ବିସ୍ତାର କରାଯାଇଛି। ପିଆଇଏଲ ବା ଜନସ୍ବାର୍ଥ ମାମଲାରେ ଦାବି କରାଯାଇଥିବା ପଏଣ୍ଟ ଗୁଡ଼ିକୁ ମଧ୍ୟ ତଦନ୍ତରେ ସାମିଲ କରାଯାଇଛି। ତଦନ୍ତ ପାଇଁ ନ୍ୟାୟିକ କମିଶନଙ୍କୁ ମଧ୍ୟ ଗୋଟିଏ ମାସ ଅତିରିକ୍ତ ସମୟ ଦିଆଯାଇଛି।
ଏହି ଆଧାରରେ ଆହ୍ଲାବାଦ ହାଇକୋର୍ଟ ପିଆଇଏଲର ସମାଧାନ କରିଛନ୍ତି। ଆହ୍ଲାବାଦ ହାଇକୋର୍ଟ ବାର ଆସୋସିଏସନର ପୂର୍ବତନ ସାଧାରଣ ସମ୍ପାଦକ ସୁରେଶ ଚନ୍ଦ୍ର ପାଣ୍ଡେ ଏହି ଜନହିତକର ଆବେଦନ ଦାଖଲ କରିଥିଲେ। ମୁଖ୍ୟ ବିଚାରପତି ଅରୁଣ ଭସାଲି ଏବଂ ବିଚାରପତି କ୍ଷିତିଜ ଶୈଳେନ୍ଦ୍ରଙ୍କ ଖଣ୍ଡପୀଠରେ ଏହି ମାମଲାର ଶୁଣାଣି ହୋଇଛି। କୋର୍ଟ କହିଛନ୍ତି ଯେ, ଆବେଦନକାରୀ ନ୍ୟାୟିକ କମିଶନଙ୍କ ସମ୍ମୁଖରେ ତାଙ୍କର ମତାମତ ଉପସ୍ଥାପନ କରିପାରିବେ।
ଯଦି ନ୍ୟାୟିକ କମିଶନଙ୍କ ରିପୋର୍ଟରେ ସନ୍ତୁଷ୍ଟ ନ ହୁଅନ୍ତି, ତେବେ ପୁଣି ଥରେ କୋର୍ଟକୁ ଆସିପାରିବେ। ଗତ ଶୁଣାଣିରେ ଆହ୍ଲାବାଦ ହାଇକୋର୍ଟ ୟୁପି ସରକାରଙ୍କ ଠାରୁ ସୂଚନା ମାଗିଥିଲେ। କୋର୍ଟ ୟୁପି ସରକାରଙ୍କୁ ପଚାରିଥିଲେ ଯେ ନ୍ୟାୟିକ କମିଶନଙ୍କ ତଦନ୍ତ ପରିସରକୁ ବିସ୍ତାର କରାଯାଇପାରିବ କି?
ଏଥିରେ ମୃତକଙ୍କ ସଂଖ୍ୟା ଚିହ୍ନଟ କରିବା ଏବଂ ଦଳାଚକଟା ସହିତ ଜଡିତ ଅନ୍ୟାନ୍ୟ ଅଭିଯୋଗ ଗୁଡ଼ିକର ତଦନ୍ତ କରିବା ଅନ୍ତର୍ଭୁକ୍ତ ହୋଇପାରେ କିମ୍ବା ନ ହୋଇପାରେ। ନ୍ୟାୟିକ ତଦାରଖରେ ତଦନ୍ତ କରାଯିବା ଏବଂ ଘଟଣା ପରେ ନିଖୋଜ ହୋଇଥିବା ଲୋକଙ୍କ ସଠିକ୍ ବିବରଣୀ ପ୍ରଦାନ କରାଯିବା ପାଇଁ ଏକ ଜନହିତକର ଆବେଦନ ଦାୟର କରାଯାଇଥିଲା।
କୋର୍ଟ କହିଥିଲେ ଯେ ଏପର୍ଯ୍ୟନ୍ତ କମିଶନଙ୍କ ନିର୍ଦ୍ଦେଶରେ ଦଳାଚକଟାର ଅନ୍ୟାନ୍ୟ ପ୍ରାସଙ୍ଗିକ ବିବରଣୀର ତଦନ୍ତ ଅନ୍ତର୍ଭୁକ୍ତ ନୁହେଁ। ପିଆଇଏଲରେ ନିଖୋଜ ଲୋକଙ୍କୁ ଠାବ କରିବା, ଦଳାଚକଟାରେ ପୀଡିତଙ୍କ ସଠିକ୍ ଗଣନା, ଏକ ତଦାରଖ କମିଟି ଗଠନ ଇତ୍ୟାଦି ଅନେକ ଦାବି କରାଯାଇଥିଲା।
