ନବରଙ୍ଗପୁର, ୯/୭ : ବୁଧବାର କେନ୍ଦ୍ରୀୟ ଟ୍ରେଡ୍ ୟୁନିୟନ ପକ୍ଷରୁ ଦେଶବ୍ୟାପୀ ଧର୍ମଘଟ କରାଯାଉଛି। ଏହାକୁ ସମର୍ଥନ କରି ନବରଙ୍ଗପୁର ଜିଲ୍ଲାର ୬ଟି ଟ୍ରେଡ୍ ୟୁନିୟନ ଓ ୮ଟି ସଙ୍ଗଠନ ୧୨ଘଣ୍ଟିଆ ବନ୍ଦ ପାଳନ କରିଛି । ନବରଙ୍ଗପୁର ସହରର ଚମୁରିଆଗୁଡ଼ା ଓ ମାଝୀଗୁଡ଼ା ଛକ ତଥା ୨୬ ନମ୍ବର ଜାତୀୟ ରାଜପଥରେ ଟ୍ରେଡ୍ ୟୁନିୟନର କର୍ମକର୍ତ୍ତାମାନେ ବ୍ୟାନର ଲଗାଇ ରାସ୍ତା ଅବରୋଧ କରିଛନ୍ତି । ଫଳରେ ରାସ୍ତାର ଉଭୟ ପାର୍ଶ୍ବରେ ଗାଡ଼ି ମୋଟର ସବୁ ଅଟକି ରହିଛି। ଯାତ୍ରୀମାନେ ହନ୍ତସନ୍ତ ହେଉଛନ୍ତି। ସହରରେ ଦୋକାନ ବଜାର ବନ୍ଦ ରହିଛି ।
ଏହି ଆନ୍ଦୋଳନରେ ସିଆଇଟିୟୁ ଜିଲ୍ଲା ସମ୍ପାଦକ ରାଜେଶ ଜାନୀ, ଆଇଏନଟିୟୁସିର ଜିଲ୍ଲା ସଭାପତି ବିଘ୍ନରାଜ ନାୟକ, ଏଆଇଟିୟୁସିର ଜିଲ୍ଲାସଭାପତି ସନାତନ ସାହୁ, ଟିୟୁସିସି ଜିଲ୍ଲା ସଭାପତି ସୁଶାନ୍ତ କୁମାର ସୁନା, ଏଆଇକେଏସ୍ ଜିଲ୍ଲା ସମ୍ପାଦକ ଦେବରାଜ ନାଗ, ଡିଓ୍ବାଇଏଫଆଇ ସଦସ୍ୟ ଦୟାନିଧୂ ସୁନା, ରାଷ୍ଟ୍ରୀୟ କିଷାନ ମଜଦୁର ମହାସଙ୍ଘ ଜିଲ୍ଲା ସମ୍ପାଦକ ଭଗବାନ ବୈରାଗୀ, ଖ୍ରୀଷ୍ଟିୟାନ ମାଇନୋରେଟି ଜିଲ୍ଲାସଭାପତି ସୁଧୂର ପାତ୍ର, ଓଡ଼ିଶା ଆଦିବାସୀ ଅଧିକାର ମଞ୍ଚ ଜିଲ୍ଲାସଭାପତି ନୂଆଁ ଖାଉ ଭତ୍ରା, ଓଡ଼ିଶା କୃଷକ ସଭା ଜିଲ୍ଲା ସଭାପତି ଧରମଦାସ ଭତ୍ରା, ଜିଲ୍ଲାରାଜମିସ୍ତ୍ରୀ ସଙ୍ଘ ସଭାପତି ବିପିନ ନାଗ, କଂଗ୍ରେସ ନେତା ମୁନା ତ୍ରିପାଠୀ ପ୍ରମୁଖ ଯୋଗ ଦେଇଛନ୍ତି।
ସରକାର ଗରିବ ଖଟିଖିଆ ଶ୍ରମିକ, ଚାଷୀଙ୍କୁ ଗୁରୁତ୍ଵ ନଦେଇ ଶିଳ୍ପପତି ଓ ପୁଞ୍ଜିପତିଙ୍କ ହାତରେ ଅମୂଲ୍ୟ ସମ୍ପଦକୁ ଟେକି ଦେଇଛନ୍ତି। ନ୍ୟୁନତମ ମାସିକ ମଜୁରୀ ୨୬ହଜାର ଟଙ୍କା, ମନରେଗାରେ ଶ୍ରମିକଙ୍କୁ ୨୦୦ ଦିନ କାମ, ଶ୍ରମିକ ଓ ଚାଷୀଙ୍କ ପାଇଁ ସ୍ବାସ୍ଥ୍ୟ ଓ ଶିକ୍ଷାକୁ ଦେୟମୁକ୍ତ କରାଯାଉ। ଦେଶରେ ଘରୋଇକରଣ ବନ୍ଦ କରାଯାଉ । ଚାଷୀର ସମସ୍ତ ଉତ୍ପାଦିତ ଫସଲ କ୍ରୟ ପାଇଁ ଆଇନଗତ ଗ୍ୟାରେଣ୍ଟି ଓ ଚାଷୀଙ୍କୁ ଋଣ ଛାଡ କରାଯାଉ । ସରକାରୀ କର୍ମଚାରୀଙ୍କ ପାଇଁ ପୁରୁଣା ପେନସନ ଲାଗୁ, ରାଜ୍ୟରେ ଆଦିବାସୀ, ଦଳିତ ଓ ସଂଖ୍ୟାଲଘୁଙ୍କ ଉପରେ ଆକ୍ରମଣ ବନ୍ଦ କରାଯାଉ। ଏହି ସବୁ ପ୍ରମୁଖ ଦାବିକୁ ନେଇ ଟ୍ରେଡ୍ ୟୁନିୟନ ଓ ସଂଗଠନ ଗୁଡିକ ନବରଙ୍ଗପୁର ଜିଲ୍ଲାରେ ଗର୍ଜିଛନ୍ତି ।
