ନୀଳଗିରି,୧୨/୪ : ନୀଳଗିରି ଥାନା ଅଧିନରେ ଥିବା ଅଯୋଧ୍ୟା ଫାଣ୍ଡି ଥାନାରେ ପରିଣତ ହେବ। ଏନେଇ ବାଲେଶ୍ଵର ସାଂସଦ ଦେଇଥିବା ଏକ ପ୍ରସ୍ତାବରେ ଏବେ ତଦନ୍ତ ହେବ। ଏନେଇ ଡିଜି ବାଲେଶ୍ଵର ଏସପିଙ୍କୁ ଏକ ନିର୍ଦ୍ଦଶନାମା ଦେଇଥିବା ଜଣାପଡିଛି।
ସୂଚନାଯୋଗ୍ୟ, ଅଯୋଧ୍ୟା ଅଞ୍ଚଳରେ ଥିବା ଫାଣ୍ଡି ଭଉଁରିଆବାଡ଼, ଅଯୋଧ୍ୟା, କାଂଶ, ନରସିଂହପୁର, ମଛୁଆ ଭଳି ପଞ୍ଚାୟତର ହଜାର ହଜାର ପରିବାରଙ୍କ ସମସ୍ୟାର ସମାଧାନ କରିଆସୁଛି। ଖାଲି ସେତକ ନୁହେଁ ସୋନ ନଦୀରେ ବାଲି ଚୋରି, ପାଖରେ ଥିବା ପଥର ଓ ମୋରମ ଲୁଟ ହେଉଥିବା ବେଳେ ସୀମାନ୍ତ ଜିଲ୍ଲା ମୟୁରଭଞ୍ଜରୁ ଚୋରାକାଠ ଓ ମଦ ଚାଲାଣ ହେଉଛି। ଆଇନ ଶୃଙ୍ଖଳା ସଜାଡ଼ିବା ପାଇଁ ଅଯୋଧ୍ୟାରେ ଫାଣ୍ଡିରେ କର୍ମଚାରୀ ଅଭାବ ଥିବାରୁ ବେଇଆନ କାର୍ଯ୍ୟ ରୋକିବାରେ ବିଫଳ ହୋଇଛି। ସେହିପରି ହିତାଧିକାରୀମାନେ ଫାଣ୍ଡିରେ ସେଭଳି ନ୍ୟାୟ ପାଇ ପାରୁ ନାହାଁନ୍ତି। ସେମାନଙ୍କୁ ନୀଳଗିରି ଥାନାକୁ ଯିବାକୁ ପଡୁଛି। ତେଣୁ ଅଯୋଧ୍ୟା ଫାଣ୍ଡିକୁ ଥାନାରେ ପରିଣତ କରିବାକୁ ବାଲେଶ୍ଵର ସାଂସଦ ପ୍ରତାପ ଷଡ଼ଙ୍ଗୀ ଗତ ମାର୍ଚ୍ଚ ମାସ ୭ ତାରିଖରେ ରାଜ୍ୟ ସରକାର ଓ ପୋଲିସ ଡିଜିଙ୍କୁ ଏକ ପ୍ରସ୍ତାବ ଦେଇଥିଲେ। ରାଜ୍ୟ ସରକାରଙ୍କ ନିର୍ଦ୍ଦେଶ କ୍ରମେ ଡିଜି ଏହି ଘଟଣାକୁ ଗୁରୁତର ସହ ନେଇ ବାଲେଶ୍ଵର ଏସପିଙ୍କୁ ତୁରନ୍ତ ତଦନ୍ତ କରି ସରକାରଙ୍କୁ ରିପୋର୍ଟ ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି। ତେବେ ଅଯୋଧ୍ୟା ଅଞ୍ଚଳରେ ଜନସଂଖ୍ୟା ଓ ଆଖପାଖ ପାରିପାର୍ଶ୍ଵିକ ସ୍ଥିତିକୁ ନେଇ ଅଯୋଧ୍ୟା ଫାଣ୍ଡିକୁ ଥାନାରେ ରୂପାନ୍ତର କରିବାକୁ ବହୁଦିନରୁ ଦାବି ହୋଇ ଆସୁଥିଲା।
ଏହି ଖବରଟିକୁ ପଢନ୍ତୁ- ଭିଜିଲାନ୍ସ ଜାଲରେ ଚିତ୍ରକୋଣ୍ଡା ସହକାରୀ କାର୍ଯ୍ୟନିର୍ବାହୀ ଯନ୍ତ୍ରୀ, କାର୍ ଓ ଘରୁ ମିଳିଲା ନଗଦ ୧୮ ଲକ୍ଷ ୫୭ ହଜାର ଟଙ୍କା
