ଗୁଣପୁର, ୧୫| ୨ : ଗୁଣପୁରରେ ଚାଞ୍ଚଲ୍ୟ। ରାତି ଅଧରେ ଗୁଣପୁର ସହରରେ ଯୁବକଙ୍କୁ ହତ୍ୟା ଉଦ୍ୟମ। ଯୁବକଙ୍କୁ ଆକ୍ରମଣ କରିବା ସହ ପଥରରେ ଛେଚି ଛେଚି ହତ୍ୟା ଉଦ୍ୟମ କଲା ଦୁର୍ବୃତ୍ତ। ଯୁବକ ଜଣଙ୍କ ଅଚେତ ହୋଇଯିବାରୁ ମରିଗଲା ଭାବି ଚାଲିଗଲା ଦୁର୍ବୃତ୍ତ। ସିସିଟିଭିରେ କଏଦ ହେଲା ଆକ୍ରମଣ ବେଳର ଛାତିଥରା ଦୃଶ୍ୟ। ଏହି ଘଟଣାଟି ଗତ ୧୨ ତାରିଖ ରାତି ସାଢେ ୧୨ଟାରେ ଘଟିଛି। ଗୁରୁବାର ଦିନ ସକାଳେ ସ୍ଥାନୀୟ ଲୋକେ ରାସ୍ତା ଉପରେ ଗୁରୁତର ଯୁବକଙ୍କୁ ଦେଖି ଡାକ୍ତରଖାନାରେ ଭର୍ତ୍ତି କରିଛନ୍ତି। 

ସୂଚନାନୁଯାୟୀ, ଗତ ବୁଧବାର ରାତି ପ୍ରାୟ ୧୨ଟା ୪୦ରେ ଗୁଣପୁର ସହରର ହଳଦିଆ ନାଳ ନିକଟରେ ଥିବା ଏସ୍.ବି.ଆଇ ଏଟିଏମ୍ ସମ୍ମୁଖରେ ଜଣେ ଯୁବକଙ୍କୁ ହତ୍ୟା ଉଦ୍ୟମ ହୋଇଥିଲା। ନୀଳ ସାର୍ଟ ପିନ୍ଧିଥିବା ଜଣେ ଯୁବକ ଅନ୍ୟ ଜଣେ ଯୁବକଙ୍କୁ ଲାତ ଗୋଇଠା ମାରିବା ସହ ପଥରରେ ଛେଚି ଛେଚି ହତ୍ୟା ଉଦ୍ୟମ କରିଥିଲା। ମାଡ଼ ଖାଇଥିବା ଯୁବକ ଜଣଙ୍କ ଅଚେତ ହୋଇଯିବାରୁ ମରିଗଲା ଭାବି ଆକ୍ରମଣକାରୀ ଘଟଣାସ୍ଥଳରୁ ଚାଲିଯାଇଥିଲା। ଯୁବକଙ୍କ ମୁଣ୍ଡରେ ଶକ୍ତ ଆଘାତ ଲାଗିବାରୁ ରକ୍ତସ୍ରାବ ହେଉଥିଲା। ଗୁରୁବାର ଦିନ ସକାଳେ ସ୍ଥାନୀୟ ଲୋକେ ଗୁରୁତର ଯୁବକଙ୍କୁ ଦେଖି ଆମ୍ଵୁଲାନ୍ସ ଯୋଗେ ଗୁଣପୁର ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ। ଏହି ଘଟଣା ବେଳର ସମସ୍ତ ଦୃଶ୍ୟ ସିସିଟିଭିରେ କଏଦ ହୋଇଛି।

ଗୁରୁତର ଯୁବକ ଜଣଙ୍କ ଗୁଡାରି ଥାନା ଅନ୍ତର୍ଗତ ଗୁରୁଠା ଗ୍ରାମର ମୀନ ଶବରଙ୍କ ପୁଅ କୃଷ୍ଣ ଶବର (୩୮ ବର୍ଷ) ବୋଲି ଜଣାପଡ଼ିଛି। ଆକ୍ରମଣକାରୀଙ୍କ ପରିଚୟ ମିଳିପାରି ନାହିଁ। ଗୁରୁତର ଯୁବକଙ୍କ ଅବସ୍ଥା ସଙ୍କଟାପନ୍ନ ଥିବାରୁ ତାଙ୍କୁ ବ୍ରହ୍ମପୁର ବଡ ମେଡିକାଲକୁ ସ୍ଥାନାନ୍ତରିତ କରାଯାଇଛି। ଆକ୍ରମଣକାରୀଙ୍କ ବିଷୟରେ ଜଣାପଡ଼ିନାହିଁ କିମ୍ଵା ଆକ୍ରମଣ ପଛର କାରଣ ଜଣାପଡ଼ିନାହିଁ। ଏନେଇ ଥାନାରେ କୌଣସି ଅଭିଯୋଗ ହୋଇନାହିଁ। ତେବେ ବିଚ୍ ରାସ୍ତାରେ ସହର ଭିତରେ ଏଭଳି ନାରକୀୟ କାଣ୍ଡ ଘଟିଥିବାରୁ ପୋଲିସ ନିଜ ଆଡ଼ୁ ମାମଲା ରୁଜୁ କରି ତଦନ୍ତ କରିବାକୁ ଦାବି ହୋଇଛି। 

ଏହି ଖବରଟିକୁ ପଢନ୍ତୁ-Mo Bus: ଆଉ ଏକ ମୁଣ୍ଡ ନେଲା ମୋ ବସ୍; ଚକା ତଳେ ଚାଲିଗଲା ମହିଳାଙ୍କ ଜୀବନ