ଭୁବନେଶ୍ଵର, ୦୪/୦୧ : ଚଢାଉ ବେଳେ ପୋଲିସ ଉପରକୁ ଆକ୍ରମଣ କରିବା ଘଟଣା। କୁଖ୍ୟାତ ଅପରାଧୀ ସଫିକ୍ ଖାଁ ଗିରଫ। ଫିଲ୍ମ ଷ୍ଟାଇଲ୍ରେ କ୍ଷେତ ଭିତରୁ ଗୋଡାଇ ଗୋଡାଇ ଧରିଲା ତିଗିରିଆ ପୋଲିସ। ସଫିକ୍ ଖାଁ ନାଁରେ ବିଭିନ୍ନ ଥାନାରେ ଗୋ ଚାଲାଣ ସହ ଗଞ୍ଜେଇ କାରବାର ଆଦି ନେଇ ଏକାଧିକ ମାମଲା ରହିଛି। ଅଭିଯୁକ୍ତ ଜଣଙ୍କ ତିଗିରିଆ ଥାନା ଅନ୍ତର୍ଗତ କରଡ଼ାପଲ୍ଲୀ ଗ୍ରାମର ବୋଲି ଜଣାପଡ଼ିଛି।
ସୂଚନାନୁଯାୟୀ, ଗତ ୧୮ ତାରିଖ ଦିନ ଗଞ୍ଜେଇ କାରବାରର ଖବର ପାଇ ପୁଲିସର ଏକ ସ୍ଵତନ୍ତ୍ର ସ୍କ୍ଵାର୍ଡ ନୂଆପାଟଣା ଡାକଘର ପଛପଟରେ ଥିବା ଏକ ଦୁଇ ମହଲା ଘରେ ଚଢାଉ କରିଥିଲା। ଏହି ସମୟରେ ଉକ୍ତ ଘରେ ଥିବା ଚୋରା ଚାଲାଣକାରୀ ଦଲାଲମାନେ ପୋଲିସ ଉପରକୁ ଆକ୍ରମଣ କରିଥିଲେ। ଉଭୟ ପୋଲିସ୍ ଓ ଦଲାଲଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା। ତେବେ ଏହି ସମୟରେ କେତେକ ଅଭିଯୁକ୍ତ ଘଟଣା ସ୍ଥଳରୁ ଫେରାର ହୋଇଯାଇଥିଲେ। ଏହାପରେ ଅପରାଧୀଙ୍କୁ ଧରିବା ପାଇଁ କଟକ ଜିଲ୍ଲା ଆରକ୍ଷୀ ଅଧିକ୍ଷକ ପ୍ରତୀକ ସିଂଙ୍କ ନିର୍ଦ୍ଦେଶ କ୍ରମେ ତିଗିରିଆ ଥାନା ଏବଂ ସ୍ଵତନ୍ତ୍ର ଟିମ୍ ଗଠନ ହୋଇଥିଲା। ପୂର୍ବରୁ ପୋଲିସ ଏହି ଘଟଣାରେ ୬ ଜଣ ଅଭିଯୁକ୍ତଙ୍କୁ ଗିରଫ କରିଥିଲା। ଏବେ ଘଟଣାର ମୁଖ୍ୟ ଅଭିଯୁକ୍ତ କୁଖ୍ୟାତ ଅପରାଧୀ ସଫିକ୍ ଖାଁକୁ ପୋଲିସ ଗିରଫ କରିଛି। ତିଗିରିଆ କୋର୍ଟ ସାମ୍ନା କ୍ଷେତରେ ଲୁଚିଥିବା ବେଳେ ପୋଲିସ ଚଢାଉ କରି ସଫିକ୍ ଖାଁକୁ ଧରି କୋର୍ଟ ଚାଲାଣ କରିଛି। ଅଭିଯୁକ୍ତ ନାମରେ ଜିଲ୍ଲାର ବିଭିନ୍ନ ଥାନାରେ ମାମଲା ରହିଛି।
