ଭୁବନେଶ୍ୱର,୦୬/୦୧: ହାତରେ ଆଉ ଦୁଇ ଦିନ । ଏହାପରେ ଆରମ୍ଭ ହୋଇଯିବ ବହୁ ପ୍ରତୀକ୍ଷିତ ପ୍ରବାସୀ ଭାରତୀୟ ଦିବସ ସମ୍ମିଳନୀର ମେଗା ଆୟୋଜନ । ପ୍ରଥମଥର ପାଇଁ ଓଡ଼ିଶା ଏହି କାର୍ଯ୍ୟକ୍ରମ ଆୟୋଜନ କରିବାକୁଯାଉଛି । ଏହାକୁ ବିଶାଳ ଓ ଭବ୍ୟ କରିବାକୁ ଉଭୟ କେନ୍ଦ୍ର ଓ ରାଜ୍ୟ ସରକାର ଅବିଶ୍ୱସନୀୟ ପ୍ରସ୍ତୁତି କରିଛନ୍ତି । ବଡ଼ ବଡ଼ ହ୍ୟାଙ୍ଗର ଛିଡ଼ା ହୋଇଛି । ଜନତା ମଇଦାନକୁ ଗଲେ ଏହା ବିଦେଶର ଭ୍ରମ ସୃଷ୍ଟି କରୁଛି । ପ୍ରଧାନମନ୍ତ୍ରୀ, ରାଷ୍ଟ୍ରପତି, ସ୍ୱରାଷ୍ଟ୍ର ମନ୍ତ୍ରୀ ଓ ବୈଦେଶିକ ବ୍ୟାପାର ମନ୍ତ୍ରୀଙ୍କ ସମେତ ୧୦ଟି ରାଜ୍ୟର ମୁଖ୍ୟମନ୍ତ୍ରୀ ମଧ୍ୟ ଏହି କାର୍ଯ୍ୟକ୍ରମରେ ସାମିଲ ହେବେ ବୋଲି ସୂଚନା ମିଳିଛି । ସୋମବାର ବୈଦେଶିକ ବ୍ୟାପାର ମନ୍ତ୍ରୀ ଏସ୍.ଜୟଶଙ୍କର ଭୁବନେଶ୍ୱରରେ ପହଞ୍ଚିବେ ।
୫୦ରୁ ଅଧିକ ଓଏଏସ୍ ଅଫିସର ୧୮ ଘଣ୍ଟା ଡେରା ପକାଇଛନ୍ତି ଜନତା ମଇଦାନରେ । ବରିଷ୍ଠ ଆଇଏଏସ୍ ଓ ଆଇପିଏସ୍ ଅଧିକାରୀମାନେ ତୁହାକୁ ତୁହା ବୁଲି ଦେଖୁଛନ୍ତି । ୧୦୦୦ରୁ ଅଧିକ ଶ୍ରମିକ, ଡିଜାଇନର ଓ କର୍ମଚାରୀ ଦିନରାତି ଏକ୍ କରି ପ୍ରସ୍ତୁତିରେ ଲାଗିଛନ୍ତି । ଆତଙ୍କବାଦୀଙ୍କ ଧମକ ପାଇଁ ପୂରା ମଇଦାନର ଚାରିପାଖକୁ ସିଆର୍ପିଏଫ୍ ଓ ରାଜ୍ୟ ପୁଲିସ ଜଗିଛନ୍ତି ।
ରବିବାର ମୁଖ୍ୟ ଶାସନ ସଚିବ ମନୋଜ ଆହୁଜା ଜନତା ମଇଦାନକୁ ଯାଇ ପ୍ରସ୍ତୁତି ତଦାରଖ କରିଛନ୍ତି । ସେ କହିଛନ୍ତି, ଏବେସୁଦ୍ଧା ୩୫୦୦ ପ୍ରବାସୀ ଭାରତୀୟ ପଞ୍ଜୀକରଣ କରିଛନ୍ତି । ଓଡ଼ିଶା ପାଇଁ ଏହା ଏକ ଗୁରୁତ୍ୱପୂର୍ଣ୍ଣ କାର୍ଯ୍ୟକ୍ରମ । ପ୍ରବାସୀ ଭାରତୀୟ ଯେଭଳି ଏକ ଭଲ ଅନୁଭୂତି ନେଇ ଯିବେ ସେଥିପାଇଁ ବ୍ୟାପକ ବ୍ୟବସ୍ଥା ହୋଇଛି । ଏହା ଜରିଆରେ ପର୍ଯ୍ୟଟନର ବିକାଶ ଭଲ ସୁଯୋଗ ରହିଛି । ରାଜ୍ୟର ପର୍ଯ୍ୟଟନସ୍ଥଳୀ, ଶିଳ୍ପ ଉଦ୍ୟୋଗ ଓ କଳାର ବିକାଶ ହେବ । ଏହାଦ୍ୱାରା ବିଶ୍ୱସ୍ତରରେ ଓଡ଼ିଶାର ପ୍ରଚାର ହେବ । ଏହି କାର୍ଯ୍ୟକ୍ରମରେ ସାମିଲ ହେବାକୁ ସେ ଆହ୍ୱାନ ଦେଇଛନ୍ତି ।
ଶିଳ୍ପ ସଚିବ ହେମନ୍ତ ଶର୍ମା କହିଛନ୍ତି, ପ୍ରବାସୀ ଭାରତୀୟ ଦିବସ ପାଇଁ ଜନତା ମଇଦାନରେ ୮୦% କାମ ସରିଲାଣି । ୮ ତାରିଖରେ ଏକ ଘରୋଇ ହୋଟେଲରେ ୫୦୦ ପ୍ରବାସୀ ଭାରତୀୟଙ୍କ ସହ ଏକ ସ୍ୱତନ୍ତ୍ର ଆଲୋଚନା ହେବ । ଏହାର ବିଷୟ ରହିବ ଇନ୍ଭେଷ୍ଟ ଓଡ଼ିଶା । ଓଡ଼ିଶାରେ ପୁଞ୍ଜିନିବେଶ ପାଇଁ ଆଗ୍ରହୀ ଥିବା ପ୍ରବାସୀମାନେ ଏଥିରେ ସାମିଲ ହେବେ । ପ୍ରବାସୀମାନେ ୩୧ଟି ପର୍ଯ୍ୟଟନସ୍ଥଳୀକୁ ବୁଲିବାକୁ ଯିବେ । କିଛି ପ୍ରବାସୀ ଓଡ଼ିଆ ଭୁବନେଶ୍ୱର ଆସିଲେଣି । ସୋମବାର ସିଙ୍ଗାପୁର ଓ ଦୁବାଇରୁ ପ୍ରବାସୀ ଓଡ଼ିଆ ପହଞ୍ଚିବେ । ୭ ତାରିଖ ସୁଦ୍ଧା ଅନ୍ୟ ଦେଶରୁ ପ୍ରବାସୀ ଭାରତୀୟ ପହଞ୍ଚିଯିବେ । ଜନତା ମଇଦାନରେ ପର୍ଯ୍ୟଟନ ଓ ବିକଶିତ ଓଡ଼ିଶାକୁ ନେଇ ଦୁଇଟି ଓଡ଼ିଶା ଭିତ୍ତିକ ଅଧିବେଶନ ହେବ ବୋଲି ସେ କହିଛନ୍ତି ।
୧୦ଟି ବିଶାଳ ହ୍ୟାଙ୍ଗର ତିଆରି ହୋଇଛି । ଏଥିରେ ସ୍ୱତନ୍ତ୍ର ଭାବେ ୫ଟି ପାଭିଲିୟନ୍ ରହିଛି । ଜନତା ମଇଦାନର ହୋଟେଲ ସ୍ୱସ୍ତି ପ୍ରିମିୟମ୍ ପାଶ୍ୱର୍ ଫାଟକକୁ ଲାଗି ପ୍ରଧାନମନ୍ତ୍ରୀଙ୍କ ହୋଲ୍ଡିଂ ଏରିଆ ତିଆରି ହୋଇଛି । ଏହା ପାଖରେ ପିଏମଓ ଅଫିସ୍ ପାଇଁ ସ୍ୱତନ୍ତ୍ର ହ୍ୟାଙ୍ଗର ଅଛି । ଏହାକୁ ଲାଗି ସବୁଠୁ ବଡ଼ ହ୍ୟାଙ୍ଗରରେ ଉଦ୍ଘାଟନୀ ଓ ଉଦ୍ଯାପନୀ କାର୍ଯ୍ୟକ୍ରମ ହେବ । କାର୍ଯ୍ୟକ୍ରମରେ ଏକାଧିକ ଅଧିବେଶନ ଚାଲିବ । ଏଥିପାଇଁ ସ୍ୱତନ୍ତ୍ର ଭାବେ ଏକ ପ୍ଲେନାରୀ ହ୍ୟାଙ୍ଗର ତିଆରି ହୋଇଛି । ଏହାକୁ ଲାଗି ଆଉ ଏକ ହ୍ୟାଙ୍ଗରରେ ଥିମ୍ ପାଭିଲିୟନ୍ ରହିଛି । ଏଠାରେ ମୋଟ ୫ଟି ପାଭିଲିୟନ୍ ରହିବ । ଓଡ଼ିଶା ପାଭିଲିୟନରେ ଐତିହ୍ୟ ଓ ସ୍ଥାପତ୍ୟ କଳାର ଝଲକ୍ଠାରୁ ନେଇ ମନ୍ଦିରମାଳିନୀ ସହରର ସମୃଦ୍ଧମୟ ଇତିହାସ, ପର୍ଯ୍ୟଟନ, ନୌବାଣିଜ୍ୟ, ହସ୍ତତନ୍ତ, ତାରକସୀ କାମ, ଶିଳ୍ପ ବିକାଶ ଓ ଆଧୁନିକ ଭିତ୍ତିଭୂମି ବିକାଶକୁ ପ୍ରଦର୍ଶିତ କରାଯିବ । ଓଡିଆ ଭାଷା, ସାହିତ୍ୟ ଏବଂ ସଂସ୍କୃତି ବିଭାଗ ଏହାକୁ ପ୍ରସ୍ତୁତ କରିଛି । ଏହାର ନାଁ ରହିଛି “ଗ୍ଲୋରିୟସ ଓଡ଼ିଶା: ପ୍ରାଚୀନରୁ ଆଧୁନିକ’ । ପାଭିଲିୟନକୁ ପଟ୍ଟଚିତ୍ର, ଚାନ୍ଦୁଆ ଓ ଆଦିବାସୀ ଚିତ୍ରକଳାରେ ସୁସଜ୍ଜିତ କରାଯାଇଛି । ଶ୍ରୀଜଗନ୍ନାଥ ସଂସ୍କୃତି, କଳିଙ୍ଗ ଯୁଦ୍ଧ, ସମ୍ରାଟ ଅଶୋକଙ୍କ ଚଣ୍ଡାଶୋକରୁ ଧର୍ମାଶୋକରେ ରୂପାନ୍ତରଣ, ଐତିହ୍ୟ ବାଲିଯାତ୍ରା ଓ ଅନ୍ୟ କୀର୍ତ୍ତିରାଜି ପ୍ରଦର୍ଶିତ ହୋଇଛି ।
‘ମଣ୍ଡାଭି ଟୁ ମସ୍କଟ୍’ ପାଭିଲିୟନରେ ଗୁଜୁରାଟର ମଣ୍ଡାଭି ବନ୍ଦରରୁ ଓମାନର ମସ୍କଟ୍ ବନ୍ଦରର ସୁଦୀର୍ଘ ନୌବାଣିଜ୍ୟ ଇତିହାସ ଓ ପ୍ରସ୍ତାବିତ ରୋଡ୍ମ୍ୟାପ ବାବଦରେ ଅନେକ ତଥ୍ୟ ରହିଛି । ଜାତୀୟ ଅଭିଲେଖାଗାର ପକ୍ଷରୁ ‘ଦ ରାମାୟଣ’ ପାଭିଲିୟନ୍ ପ୍ରସ୍ତୁତ କରାଯାଇଛି । ଏଥିରେ ରାମାୟଣର ଗୌରବମୟ ଗାଥାକୁ ଡିଜିଟାଲ ମାଧ୍ୟମରେ ଦେଖିହେବ । ପ୍ରଧାନମନ୍ତ୍ରୀଙ୍କ ଅଫିସ୍ ପକ୍ଷରୁ ସ୍ୱତନ୍ତ୍ର ଭାବେ ଏକ ପାଭିଲିୟନ ପରିଚାଳିତ ହେବ । ଏହାର ନାଁ ରହିବ ‘ଇନ୍କ୍ଲୁସିଭ୍ ଇଣ୍ଡିଆ’ । ଏଥିରେ ସବୁ ସଂପ୍ରଦାୟକୁ ନେଇ କିଭଳି ବିକଶିତ ଭାରତର ପରିକଳ୍ପନା ହୋଇଛି ତାକୁ ପ୍ରଦର୍ଶିତ କରାଯାଇଛି । ଏହା ପାଖରେ ଏକ ପ୍ରଦର୍ଶନୀ ହ୍ୟାଙ୍ଗର ରହିବ । ଏଥିରେ ପଶାପାଲି ହସ୍ତତନ୍ତ, ତାରକସୀ କାରୁକାର୍ଯ୍ୟ, ଟସର ହସ୍ତତନ୍ତ, କୋଟପାଡ଼ ଓ ମାଣିଆବନ୍ଧ ହସ୍ତତନ୍ତ, ପଟ୍ଟଚିତ୍ର କାରୁକାର୍ଯ୍ୟ, ପ୍ରସ୍ତର ଶିଳ୍ପ, ହସ୍ତଚିତ୍ରିତ ପଟ୍ଟଚିତ୍ର ଶାଢ଼ୀ, ତାଳପତ୍ର ଖୋଦେଇ କାରୁକାର୍ଯ୍ୟକୁ ପ୍ରଦର୍ଶିତ କରାଯିବ । ସେହିଭଳି କେନ୍ଦ୍ର ଏମ୍ଏସ୍ଏମ୍ଇ ମନ୍ତ୍ରାଳୟ ପକ୍ଷରୁ ମଧ୍ୟ ପ୍ରଦର୍ଶନୀ ରହିଛି। ଫୁଡ୍ କୋର୍ଟରେ ଓଡ଼ିଶାର ବିଭିନ୍ନ ପ୍ରସିଦ୍ଧ ଖାଦ୍ୟ ଓ ବ୍ୟଞ୍ଜନ ଉପଲବ୍ଧ ହେବ । ଅନ୍ୟ ରାଜ୍ୟର ଖାଦ୍ୟ ମଧ୍ୟ ମିଳିବ ।
ନୂଆଦିଲ୍ଲୀର ଖ୍ୟାତନାମା ଦୀପାଳି ଡିଜାଇନ୍ସ ଆଣ୍ଡ ଏକ୍ଜିବିଟ୍ସ ପ୍ରା.ଲିଃ ସଂସ୍ଥାକୁ ଏହି କାର୍ଯ୍ୟକ୍ରମର ଇଭେଣ୍ଟ୍ ମ୍ୟାନେଜମେଣ୍ଟ୍ ଦାୟିତ୍ୱ ଦିଆଯାଇଛି । ହ୍ୟାଙ୍ଗରଠାରୁ ନେଇ ଅନ୍ୟ ଆନୁସଙ୍ଗିକ ନିର୍ମାଣରେ ଦିନରାତି ଲାଗିଛନ୍ତି । ଏହି ସଂସ୍ଥା ରାଜ୍ୟଗୋଷ୍ଠୀ କ୍ରୀଡ଼ା, ନ୍ୟାସନାଲ କ୍ରୀଡ଼ା, ଏସିଆ ପାସିଫିକ୍ କନ୍ଫରେନ୍ସ ଭଳି ଅନେକ ସମ୍ମାନଜନକ କାର୍ଯ୍ୟକ୍ରମ ଆୟୋଜନ ଦାୟିତ୍ୱ ତୁଲାଇଛି । କେନ୍ଦ୍ର ବୈଦେଶିକ ବ୍ୟାପାର ମନ୍ତ୍ରାଳୟ ପକ୍ଷରୁ ଦୀପାଳି ଡିଜାଇନସ୍କୁ ପ୍ରବାସୀ ଭାରତୀୟ ଦିବସର ଆୟୋଜନ ଦାୟିତ୍ୱ ଦିଆଯାଇଛି।
