ଭୁବନେଶ୍ୱର ୦୭/୦୧: ପୂର୍ବତନ ଏମ୍ପିଙ୍କୁ ଠକେଇ କରି ଗିରଫ ହୋଇଥିବା ବିଷ୍ଣୁପ୍ରିୟା ଚାନ୍ଦ ଓରଫ ରାକ୍ଷୀ ଓରଫ ହଂସିକା ଓ ତାଙ୍କ ପାର୍ଟନର ଅନିଲ୍ ମହାନ୍ତିଙ୍କ ବିଷୟରେ ସ୍ପେଶାଲ୍ କ୍ରାଇମ୍ ୟୁନିଟ୍ ନୂଆ ତଥ୍ୟ ପାଉଛି । ଏମାନେ କେମିତି କଳାଧନ ରୋଜଗାର କରୁଥିଲେ, ସେ କଳା ଟଙ୍କାକୁ କେମିତି ଧଳା କରୁଥିଲେ ସେ ବିଷୟରେ ପୁଲିସ୍ ହାତରେ କିଛି ପ୍ରମାଣ ଲାଗିଛି । ସେଥିପାଇଁ ପୁଲିସ୍ ଆର୍ଥିକ ଗୁଇନ୍ଦା ଶାଖା (ଏଫ୍ଆଇୟୁ)ର ସହଯୋଗ ନେବ ବୋଲି କହିଛି ।
ସ୍ପେଶାଲ୍ କ୍ରାଇମ୍ ୟୁନିଟ୍ ଜାଣିବାକୁ ପାଇଛି ଯେ, ଅନିଲ୍ ଓ ହଂସିକା ଯାହା ଟଙ୍କା ରୋଜଗାର କରିଛନ୍ତି, ତାହା ୨୦୧୮ରୁ ୨୦୨୪ ମଧ୍ୟରେ। ବ୍ୟାଙ୍କ୍ ଆକାଉଣ୍ଟ୍ ଯାଞ୍ଚ ସମୟରେ ବହୁ ତଥ୍ୟ ମିଳିଛି । ଅକାଉଣ୍ଟରେ ଟଙ୍କା କାରବାର ଅପେକ୍ଷା ନଗଦ ଆକାରରେ ଅଧିକା କାରବାର ହୋଇଛି । କ୍ରେଡିଟ୍ କାର୍ଡ ଖର୍ଚ୍ଚ, ବିଦେଶ ବୁଲା, ଅନ୍ଲାଇନ୍ କାରବାର ଓ ଅନ୍ୟ ଅନ୍ଲାଇନ୍ ନିବେଶ ବିଷୟରେ ଜାଣିବା ପାଇଁ ପୁଲିସ୍ ଏଫ୍ଆଇୟୁର ସହଯୋଗ ନେବ । ଏଫ୍ଆଇୟୁର ନୋଡାଲ୍ ଅଫିସ୍ର ହେଉଛନ୍ତି ଇଓଡବ୍ଲ୍ୟୁ ଏସ୍ପି ।
ସ୍ପେଶାଲ୍ କ୍ରାଇମ୍ ୟୁନିଟ୍ ଗିରଫ ଅଭିଯୁକ୍ତଙ୍କ ବିଷୟରେ ଏଫ୍ଆଇୟୁ ଠାରୁ ଯଦି ତଥ୍ୟ ଜାଣିବାକୁ ଚାହିଁବେ, ତେବେ ନୋଡାଲ୍ ଅଫିସରଙ୍କ ଜରିଆରେ ତଥ୍ୟ ମାଗିବେ । ଏଫ୍ଆଇୟୁଠାରୁ ପୁଲିସ୍ ସେମାନଙ୍କ ଆର୍ଥିକ କାରବାର ବିଷୟରେ କିଛି ତଥ୍ୟ ପାଇବ । ତା’ଛଡ଼ା ୫ରୁ୬ ବର୍ଷ ମଧ୍ୟରେ ହଂସିକା ଓ ଅନିଲ୍ ଶହ ଶହ କୋଟି ଟଙ୍କାର ମାଲିକ କିପରି ହେଲେ ଜାଣିବା ପୁଲିସ୍ ପାଇଁ କାଠିକର ପାଠ ହେବ । ଏମାନଙ୍କ ଆର୍ଥିକ କାରବାରର ଖୋଳତାଡ଼ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) କରିବ ବୋଲି ଜଣାପଡିଛି ।
ବଡ଼ କଥା ହେଲା ଯେଉଁ ଅଫିସ୍କୁ ହଂସିକା ଯାଉଥିଲେ, ସେଠାରେ ତାଙ୍କ କାମ ହୋଇଯାଉଥିଲା । ତାଙ୍କ କାମ ନ ଅଟକାଇବା ପାଇଁ ଫୋନ୍ ବି ଆସୁଥିଲା । କିଏ ଏହି ଫୋନ୍ କରୁଥିଲେ ? ହଂସିକାଙ୍କ ସହ ତାଙ୍କର କ’ଣ ସମ୍ପର୍କ ? କିଏ ହଂସିକାଙ୍କ ଗଡ୍ ଫାଦର ପୁଲିସ୍ ତା'ର ଥଳକୂଳ ପାଉନି । ତା’ଛଡା ଅନିଲ୍ ଓ ତାଙ୍କର କିଛି ଖାସ୍ ସହଯୋଗୀ ହାଇପ୍ରୋଫାଇଲ୍ ସେକ୍ସ ର୍ୟାକେଟ୍ ଚଳାଉଥିବା ପୁଲିସ୍ ପ୍ରମାଣ ପାଇଛି । ମଡେଲ୍, ହିରୋଇନ୍ ଓ ବିଦେଶର କିଛି ମଡେଲ୍ଙ୍କୁ ମୋଟା ଅଙ୍କର ଟଙ୍କା ଦେଇ ଏହି କାରବାର କରୁଥିବା ପୁଲିସ୍ ସୂଚନା ପାଇଛି । ଏ ବିଷୟରେ ଅଧିକ ଜାଣିବା ପାଇଁ ପୁଲିସ୍ ତାଙ୍କୁ ରିମାଣ୍ଡରେ ନେବାକୁ ଆବେଦନ କରିଛି ।
ସେପଟେ ଗିରଫ ଅଭିଯୁକ୍ତମାନେ ଜାମିନ ପାଇଁ ଆବେଦନ କଲେଣି । ଏମାନଙ୍କ କଳାକୁ ଧଳା କରୁଥିବା ଜିମ୍ ବ୍ୟବସାୟୀ, ୟୁନିଟ୍-୮ର ସ୍କ୍ରାପ୍ ବ୍ୟବସାୟୀ, ରବି ଟକିଜ୍ ଅଞ୍ଚଳର ଟେର ବ୍ୟବସାୟୀମାନେ ସବୁ ପ୍ରମାଣ ନଷ୍ଟ କରିବାରେ ଲାଗିଛନ୍ତି । ଜିଏମ୍ ମାଲିକଙ୍କ ଏନ୍ଜିଓ ସଂସ୍ଥା ଜରିଆରେ ହଂସିକା ଓ ଅନିଲ୍ କଳାଟଙ୍କାକୁ ଧଳା କରୁଥିଲେ । ପୁଲିସ କର୍ମଚାରୀମାନେ ବର୍ତ୍ତମାନ ପ୍ରବାସୀ ଭାରତୀୟ ସମ୍ମିଳନୀ କାର୍ଯ୍ୟରେ ବ୍ୟସ୍ତ ରହୁଛନ୍ତି । ତେଣୁ ଏସବୁ ଖୋଳତାଡ଼ ପାଇଁ ସ୍ପେଶାଲ୍ କ୍ରାଇମ୍ ୟୁନିଟ୍କୁ ତଦନ୍ତ ଭାର ଦେଇଥିଲେ ପୁଲିସ୍ କମିଶନର । ୟୁନିଟ୍ ପାଖରେ ସମୟ ଓ କର୍ମଚାରୀ ଅଭାବ ହେତୁ ମାମଲା ଏବେ କ୍ରାଇମ୍ବ୍ରାଞ୍ଚ ହାତକୁ ଯିବ ବୋଲି ଜଣାପଡିଛି ।
ସୂଚନା ମୁତାବକ, ପୂର୍ବତନ ଏମ୍ପି ତଥା ଏକ ବଡ଼ ଏନ୍ଜିଓ ସଂସ୍ଥା ମାଲିକ ମଧ୍ୟ ହଂସିକାଙ୍କ ଶିକାର ହୋଇଥିଲେ । ପ୍ରଧାନମନ୍ତ୍ରୀଙ୍କ ବ୍ୟକ୍ତିଗତ ସଚିବଙ୍କ ଝିଅ ଓ ଜ୍ୱାଇଁ ଭାବି ଏନ୍ଜିଓ ସଂସ୍ଥା ମାଲିକ ହଂସିକା ଓ ଅନିଲଙ୍କୁ ଆତିଥ୍ୟ ଦେଇଥିଲେ । ଏନ୍ଜିଓ ସଂସ୍ଥାକୁ ୫୦ କୋଟି ଡୋନେସନ୍ କରାଇ ଦେବାକୁ କହିଥିଲେ ହଂସିକା । କିଛିଦିନ ପରେ ଡୋନେସନ୍ କରାଇ ଦେଇଥିଲେ । ସେଥିପାଇଁ ହଂସିକା ୨୦% କମିଶନ ମାଗିଥିଲେ । ହେଲେ ଏନ୍ଜିଓ ସଂସ୍ଥା ମାଲିକ ମନା କରିଥିଲେ । ହଂସିକା ତାଙ୍କୁ ଫଟୋ ଓ ଭିଡିଓ ଦେଖାଇ ବ୍ଲାକ୍ମେଲିଂ କରିଥିଲେ । ଉପାୟ ନ ପାଇ ଏନ୍ଜିଓ ସଂସ୍ଥା ମାଲିକଙ୍କ କର୍ମଚାରୀ ଏତଲା ଦେଇଥିଲେ । ପୁଲିସ୍ ଦୁଇ ଜଣଙ୍କୁ ଗିରଫ କରିଥିଲା ।
