ବେଙ୍ଗାଲୁରୁ,୦୬/୦୧: ସମଗ୍ର ବିଶ୍ବକୁ ଦୋହଲାଇ ଦେଇଥିବା କୋରୋନା ଭାଇରସ୍ ପରେ ଏବେ କାୟା ମେଲାଉଛି HMPV ଭୂତାଣୁ । ଭାରତରେ ଏଣ୍ଟ୍ରୀ ମାରିଛି ଏହି ଭାଇରସ । ଚୀନର କବାଟ ବାଡେଇବା ପରେ ଏବେ ଭାରତର ଏହି ଭୂତାଣୁ ପ୍ରବେଶ କରିଛି । ବେଙ୍ଗାଲୁରୁରେ HMPV ଦୁଇଟି ମାମଲା ସାମ୍ନାକୁ ଆସିଛି । ଏହି ରିପୋର୍ଟ ସାମ୍ନାକୁ ଆସିବା ପରେ ଲୋକଙ୍କ ମଧ୍ୟରେ ଛନକା ପଶିଛି ।
ବେଙ୍ଗାଲୁରୁର ଏକ ହସ୍ପିଟାଲରେ ୨ ଜଣ ଶିଶୁଙ୍କ ମଧ୍ୟରେ ଭାଇରସ ଚିହ୍ନଟ ହୋଇଛି । ଜଣେ ୩ ମାସ ଓ ଜଣେ ୮ ମାସର ଛୁଆ ଦେହରୁ HMPV ଭୂତାଣୁ ଚିହ୍ନଟ ହୋଇଛି । ୩ମାସର ଶିଶୁ ହସ୍ପିଟାଲରୁ ଡିସର୍ଚାଜ ହୋଇଛି । ୮ମାସର ଶିଶୁ ଚିକିତ୍ସାଧୀନ ରହିଛି । କର୍ଣ୍ଣାଟକ ସ୍ବାସ୍ଥ୍ୟ ବିଭାଗ କହିଛି ଯେ ଆମେ ଏହାକୁ ଲ୍ୟାବରେ ପରୀକ୍ଷା କରିନାହୁଁ । ଏକ ଘରୋଇ ଡାକ୍ତରଖାନାରେ ଏହି ମାମଲାର ଏକ ରିପୋର୍ଟ ଆସିଛି । ଭାରତରେ ଏହା HMPV ଭାଇରସ୍ ପ୍ରଥମ ମାମଲା । ଏହା ସାଧାରଣତଃ ପିଲାମାନଙ୍କଠାରେ ଚିହ୍ନଟ ହୁଏ । ସମସ୍ତ ଫ୍ଲୁ ନମୂନାରେ HMPV ୦.୭% ଥାଏ । ଦୁଇଟି ମାମଲା ଚିହ୍ନଟ ପରେ ଜରୁରୀ ବୈଠକ ଡାକିଛନ୍ତି କର୍ଣ୍ଣାଟକ ସରକାର ।
ଏ ପର୍ଯ୍ୟନ୍ତ କୌଣସି ସରକାରୀ ନିଶ୍ଚିତତା ନଥିବା କର୍ଣ୍ଣାଟକ ସ୍ବାସ୍ଥ୍ୟ ବିଭାଗ କହିଛି । ଘରୋଇ ଡାକ୍ତରଖାନାର ଏହି ରିପୋର୍ଟ ଉପରେ ସନ୍ଦେହ କରିବାର କୌଣସି କାରଣ ନାହିଁ । ଏହା ଏକ ସାଧାରଣ ଭୂତାଣୁ । ଏହାର କୌଣସି ଟିକା ବାହାରି ନାହିଁ । ଏହାର ଲକ୍ଷଣ ଥଣ୍ଡା ପରି । ଚୀନର ହ୍ୟୁମାନ ମେଟା ନିମୋ ଭାଇରସକୁ ( HMPV) ନେଇ ପ୍ରଥମେ ଖବର ପ୍ରକାଶ ପାଇଥିଲା । ଭାରତ ପ୍ରତି ବିପଦ ନଥିବା କହିଥିଲେ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ । ଏହି ଭୂତାଣୁର ଷ୍ଟ୍ରେନ କଣ ତାହା ଜଣାପଡିନାହିଁ । ଚୀନରେ ଦ୍ରୁତ ଗଚତିରେ ବଢିବାରେ ଲାଗିଛି ଏହି ଭାଇରସ ।
HMPV ଭୂତାଣୁ କଣ - ଚୀନରେ ବର୍ତ୍ତମାନ ଏହି ଭାଇରସ ଆତଙ୍କ ଖେଳାଇଛି । ଏବେ ଭାରତରେ ପ୍ରବେଶ କରିଛି । ଯାହାକୁ ନେଇ ଭୟଭୀତ ଲୋକେ । ୨୦୦୧ରେ ଏହି ଭୂତାଣୁ ପ୍ରଥମ ଥର ଠାବ ହୋଇଥିଲା । ଏହା କୋରୋନା ପରି । କାଶ ଛିଙ୍କ ସହ ପାଟି ଓ ନାକରୁ ବାହାରୁଥିବା ତରଳ କଣିକା ଦ୍ବାରା ବ୍ୟାପିଥାଏ । ଆକ୍ରାନ୍ତଙ୍କଠାରେ କାଶ, ଜ୍ବର, ନାକ ବନ୍ଦଦ, ନିଶ୍ବାସ-ପ୍ରଶ୍ବାସ ବେଳେ କଷ୍ଟ ହୋଇଥିବା ପରି ଲକ୍ଷଣ ଦେଖିବାକୁ ମିଳେ । ଏଥିରେ ଆକ୍ରାନ୍ତଙ୍କ ନିମୋନିଆ ହେବା ସହ ରିପୋର୍ଟରେ ଫୁସଫୁସ ଧଳା ଦେଖାଯାଉଛି । ରୋଗ ପ୍ରତିରୋଧକ ଶକ୍ତି କମିଯାଉଛି । ୫ ବର୍ଷରୁ କମ ପିଲା ଅଧିକ ଆକ୍ରାନ୍ତ ହେଉଛନ୍ତି । ଏଥିରୁ ମୁକ୍ତି ପାଇଁ ବାରମ୍ବାର ହାତ ଧୋଇବା ସହ ଆକ୍ରାନ୍ତଙ୍କଠାରୁ ଦୂରତା ରକ୍ଷା କରିବାକୁ ପରାମର୍ଶ ଦିଆଯାଉଛି ।
