ନୂଆଦିଲ୍ଲୀ,୭।୧: ନୂଆ ବର୍ଷର ପ୍ରଥମ ସପ୍ତାହରେ ବ୍ଲାଡିମିର ପୁଟିନ୍ଙ୍କ ସୈନିକକୁ ୟୁକ୍ରେନ୍ ବିରୋଧରେ ମିଳିଛି ବଡ଼ ସଫଳତା। ଋଷ ପ୍ରତିରକ୍ଷା ମନ୍ତ୍ରଣାଳୟ ମଙ୍ଗଳବାର ଦାବି କରିଛି ଯେ, ତା’ର ସୈନିକ ଋଷର ପଶ୍ଚିମ ସହର କୁର୍ସ୍କରେ ୟୁକ୍ରେନ୍ ସୈନିକଙ୍କୁ ପଛଘୁଞ୍ଚା ଦେବାରେ ସଫଳ ହୋଇଛି। ଋଷ କହିଛି, ଏହି ସହର ଉପରେ ଗତ ୫ ମାସ ହେବ ୟୁକ୍ରେନ୍ କବଜା କରିଥିଲା। ରବିବାର ନୂଆ ଭାବରେ ଯୁଦ୍ଧ ଆରମ୍ଭ ହୋଇଛି ଓ ୧୨ ଘଣ୍ଟାରେ ଋଷ ସେନା ୟୁକ୍ରେନ୍କୁ କୁର୍ସ୍କରେ ହରାଇ ଦେଇଛି। ଏହି ସହରକୁ ୟୁକ୍ରେନୀୟଙ୍କଠାରୁ ସ୍ବାଧୀନ କରାଇବାରେ ଉତ୍ତର କୋରିଆ ସୈନିକ ମଧ୍ୟ ଋଷ ପାଇଁ ଲଢୁଥିଲେ।
ଋଷ ପ୍ରତିରକ୍ଷା ମନ୍ତ୍ରଣାଳୟ ମଙ୍ଗଳବାର କହିଛି, ତା’ର ସୈନିକ ଋଷର କୁର୍ସ୍କ ଅଞ୍ଚଳରେ ୟୁକ୍ରେନ୍ ସୈନିକଙ୍କୁ ଲଗାତାର ଭାବରେ ହରାଇ ଦେଇଛନ୍ତି। ଗତ ବର୍ଷ ଅଗଷ୍ଟରେ ମାସରେ ଏହି ସହର ଉପରେ ୟୁକ୍ରେନ୍ ସୈନିକ ଲଗାତାର ଆକ୍ରମଣ କରିବାରେ ଲାଗିଥିଲେ। ଫଳରେ ୟୁକ୍ରେନ୍ ଆକ୍ରମଣ କାରଣରୁ ହଜାର ହଜାର ଋଷ ଲୋକଙ୍କୁ ଅଞ୍ଚଳ ଖାଲି କରିବାକୁ ପଡିଥିଲା। ୟୁକ୍ରେନ୍ର ଋଷ ସହର ଉପରେ ଦଖଲ ପରେ ଋଷ ଗତ ୫ ମାସ ହେବ ଯୁଦ୍ଧ ଲଢୁଛି। ଋଷକୁ ସେଠାରେ ନିଜର ଅଞ୍ଚଳକୁ ଖାଲି କରିବା ପାଇଁ ଉତ୍ତର କୋରିଆର ସାହାଯ୍ୟ ନେବାକୁ ପଡିଥିଲା।
ଋଷର କୁର୍ସ୍କ ସହରରେ ୫ ମାସ ହେବ ଚାଲିଥିବା ଏହି ଲଢେଇରେ ସବୁଠାରୁ ଅଧିକ କ୍ଷତି ଉତ୍ତର କୋରିଆର ହୋଇଛି। ୟୁକ୍ରେନ୍ ସନାର ସୂଚନା ଅନୁସାରେ, ଯୁଦ୍ଧ ବେଳେ ୧୦ ହଜାରରୁ ଅଧିକ ଉତ୍ତର କୋରିଆ ସୈନିକ ନିହତ ହୋଇଛନ୍ତି। ଅନେକ ରିପୋର୍ଟ ଅନୁସାରେ, ଯୁଦ୍ଧ ବେଳେ ଉତ୍ତର କୋରିଆର ବହୁ ସୈନିକଙ୍କୁ ଋଷ ସୈନିକଙ୍କ ଦ୍ବାରା ଜୀବନ ହରାଇବାକୁ ପଡିଛି। କାରଣ କୋରିଆର ସୈନିକ ଋଷ ଓ ୟୁକ୍ରେନ୍ ସୈନିକଙ୍କୁ ଚିହ୍ନିବାରେ ସଫଳ ହୋଇନଥିଲେ।
