ରାମେଶ୍ୱରମ୍, ୦୯/୦୨ (ଶୁଭ୍ରଜିତ୍ ବଳିଆରସିଂହ): ସମୁଦ୍ରର ଅଥଳ ଜଳରାଶି ଉପରେ ତିଆରି ହୋଇଛି ରେଳ ବ୍ରିଜ୍ । ରାମେଶ୍ୱରମ୍ ଦ୍ୱୀପରୁ ଭାରତର ମୁଖ୍ୟ ଭୂଖଣ୍ଡକୁ ଯୋଡି଼ଛି ଏହି ବ୍ରିଜ୍ ।
ସମୁଦ୍ରର ଜଳରାଶିରେ ୨ କିଲୋମିଟରରୁ ଅଧିକ ଲମ୍ବର ତିଆରି ହୋଇଛି ଏହି ‘ପମ୍ବନ ବ୍ରିଜ୍’ । ସମୁଦ୍ରରେ ବଡ଼ ଜାହାଜ ଆସିବା ମାତ୍ରେ ଉପରକୁ ଉଠିଯିବ ଏହି ବ୍ରିଜ୍ । ପୁଣି ଜାହାଜ ଯିବା ପରେ ତଳକୁ ଖସିଯିବ । ଏହା କେବଳ ଭାରତରେ ନୁହେଁ, ଏସିଆରେ ପ୍ରଥମ ବ୍ରିଜ୍ । ଯାହାକି ଭର୍ଟିକାଲ ଲିଫ୍ଟ ମେକାନିଜିମ୍ର ଜ୍ଞାନ କୌଶଳରେ ନିର୍ମାଣ ହୋଇଛି । ଏହା ଉପରେ ରେଳର ଟ୍ରାଏଲ୍ ରନ୍ ସରିଛି । ଆଇଆଇଟି ଚେନ୍ନାଇ, ଆଇଆଇଟି ବମ୍ବେ ସୁରକ୍ଷା ଯାଞ୍ଚ କରି ସବୁଜ ସଙ୍କେତ ଦେଇଛନ୍ତି । ସ୍ପେନ୍ ଟେକ୍ନୋଲୋଜି ସହ ଭାରତୀୟ କାରିଗରୀ କୌଶଳରେ ନିର୍ମିତ ଏହି ବ୍ରିଜ୍ ଏବେ ଲୋକାର୍ପଣ ଅପେକ୍ଷାରେ । ଖୁବ୍ ଶୀଘ୍ର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହାକୁ ଲୋକାର୍ପଣ କରିବେ । ବ୍ରିଜ୍ ଫଳରେ ରାମେଶ୍ୱରମ୍କୁ ପର୍ଯ୍ୟଟକଙ୍କ ଗମନାଗମନ ସୁବିଧା ହେବ । ପର୍ଯ୍ୟଟନ କ୍ଷେତ୍ର ସମୃଦ୍ଧ ସହ ନୌବାଣିଜ୍ୟର ଅଭିବୃଦ୍ଧିରେ ସହାୟକ ହେବ ।
୧୯୧୪ରେ ତାମିଲ୍ନାଡୁ଼ର ରାମେଶ୍ୱରମ୍ ପମ୍ବନରେ ବ୍ରିଟିଶ୍ମାନେ ପମ୍ବନ ବ୍ରିଜ୍ ନିର୍ମାଣ କରିଥିଲେ । ଏମିତି ଜ୍ଞାନ କୌଶଳରେ ନିର୍ମାଣ କରିଥିଲେ ଯାହା ରେଳ ଚଳାଚଳ ସହ ଟ୍ରାକ୍ ତଳେ ଜାହାଜ ମଧ୍ୟ ଯିବା ଆସିବା କରିପାରୁଥିଲା । ଏହି ବ୍ରିଜ୍ଟି ରୋଲିଂ ଲିଫ୍ଟିଙ୍ଗ୍ ଟେକ୍ନୋଲୋଜିର ଥିଲା । ଯାହାକୁ ୧୦ ଜଣ ଲୋକ ହାତରେ ହ୍ୟାଣ୍ଡେଲ୍ ବ୍ୟବହାର କରି ଏହି ବ୍ରିଜ୍କୁ ଉଠାଉ ଥିଲେ । ଏହାକୁ ଉଠାଇବାକୁ ୪୫ ମିନିଟ୍ ସମୟ ଲାଗୁଥିଲା ।
୧୯୬୪ରେ ପମ୍ବନ ବ୍ରିଜ୍ ଏକ ବଡ଼ ବାତ୍ୟାର ସାମ୍ନା କରିଥିଲା । ଏହାକୁ ମରାମତି କରି ଏହା ଉପରେ ରେଳ ଚଳାଚଳ କରୁଥିଲା । ଅନେକ ପ୍ରାକୃତିକ ବିପର୍ଯ୍ୟୟକୁ ସାମ୍ନା କରି ଦୁର୍ବଳ ହେବାପରେ ୨୦୨୨ ମସିହାରେ ସେତୁକୁ ସଂପୂର୍ଣ୍ଣ ଭାବେ ବନ୍ଦ କରି ଦିଆଯାଇଥିଲା । ଏହାରି ପାଖରେ ସମାନ୍ତରାଳ ଭାବେ ସ୍ପେନ୍ ଟେକ୍ନୋଲୋଜିରେ ତିଆରି ହୋଇଛି ସଂପୂର୍ଣ୍ଣ କମ୍ପ୍ୟୁଟରାଇଜ୍ଡ ନୂଆ ପମ୍ବନ ବ୍ରିଜ୍ । ବହୁ ମାନବ ସମ୍ବଳର ଆବଶ୍ୟକତା ନାହିଁ । ସୁଇଚ୍ ଚିପିବା ମାତ୍ରେ ମାତ୍ର ୫ ମିନିଟ୍ ୩୦ ସେକେଣ୍ଡରେ ଲିଫ୍ଟିଙ୍ଗ୍ ହୋଇ ଉପରକୁ ସିଧା ଉଠିଯାଉଛି ଏହି ବ୍ରିଜ୍ ।
୨.୧୦ କିମି ଦୈର୍ଘ୍ୟ ବିଶିଷ୍ଟ ଏହି ବ୍ରିଜ୍ ପମ୍ବନ ଷ୍ଟେସନ୍ରୁ ମଣ୍ଡପମ୍ ରେଳ ଷ୍ଟେସନ୍କୁ ସଂଯୋଗ କରିଛି । ବ୍ରିଜ୍ ନିର୍ମାଣରେ ବ୍ୟୟ ହୋଇଛି ୫୧୩ କୋଟି ଟଙ୍କା । ବ୍ରିଜ୍ରେ ୩୩୩ଟି ଖମ୍ବ ରହିଛି । ନିର୍ମାଣରେ ୫ ହଜାର ୭୭୨ ମେଟ୍ରିକ୍ ଟନ୍ର ଷ୍ଟେନ୍ଲେସ୍ ଷ୍ଟିଲ୍, ୩ ଲକ୍ଷ ୩୮ ହଜାର ୧୪ଟି ସିମେଣ୍ଟ ବ୍ୟାଗ୍ର ବ୍ୟବହାର ହୋଇଛି । ଲିଫ୍ଟଟି ୧୭ ମିଟର ଉପରକୁ ଉଠିବ । ଏହି ବ୍ରିଜ୍ ଉପରେ ଘଣ୍ଟା ପିଛା ୭୫ କିଲୋମିଟର ବେଗରେ ରେଳ ଯାତାୟାତ କରିପାରିବ । ନିର୍ମାଣ କାର୍ଯ୍ୟରେ ୩୦୦ କାରିଗରଙ୍କ ସହ ୬୦ଜଣ ଇଞ୍ଜିନିୟର ନିୟୋଜିତ ହୋଇଥିଲେ । ରେଳ ବିକାଶ ନିଗମ ଏହାର ଦାୟିତ୍ୱ ନେଇଛି ।
ରେଳ ବିକାଶ ନିଗମର ବରିଷ୍ଠ ଡିଜିଏମ୍ଙ୍କ ଆର୍.ଶ୍ରୀନିବାସନ୍ କହିଛନ୍ତି ଯେ ପୁରୁଣା ବ୍ରିଜ୍ ସଂପୂର୍ଣ୍ଣ ଭାବେ ଅସୁରକ୍ଷିତ ହୋଇପଡ଼ିଛି । ଇତିହାସକୁ ସାଇତି ରଖିବା ପାଇଁ ଆମେ ସମାନ ଢଙ୍ଗରେ ନୂଆ ଜ୍ଞାନ କୌଶଳ ବ୍ୟବହାର କରି ନୂଆ ବ୍ରିଜ୍ ନିର୍ମାଣ କରିଛୁ ।
ରେଳ ବିକାଶ ଲିମିଟେଡ୍ର ଆବାସିକ ଯନ୍ତ୍ରୀ କେ.ଭେଲ ମୁରୁଗନ୍ କହିଛନ୍ତି, ଯେତେବେଳେ ଜାହାଜ ଏହି ବ୍ରିଜ୍ ତଳେ ଯିବ ସେ ସମୟରେ ଏହା ଉପରକୁ ଉଠିବ । ଜଣେ ବ୍ୟକ୍ତି କମ୍ପ୍ୟୁଟରରେ ସୁଇଚ୍ ଚିପିବା ମାତ୍ରେ ଏହା ସିଧା ଉପରକୁ ଉଠିବ । ଆଉ ସୁଇଚ୍ ଚିପିବା ମାତ୍ରେ ତଳକୁ ଖସି ରେଳ ଟ୍ରାକ୍ ସହ ମିଶିଯିବ । ଜାହାଜ ଯିବା ପାଇଁ ଭାରତୀୟ ତଟରକ୍ଷୀ ବାହିନୀ ପକ୍ଷରୁ ଏକ ଅନୁମତି ପତ୍ର ଆମ ପାଖକୁ ଇ-ମେଲ୍ ଦ୍ୱାରା ଆସିବ । ଆମେ ରେଳ ଚଳାଚଳକୁ ଦୃଷ୍ଟିରେ ରଖି ସମୟ ଅନୁସାରେ ବ୍ରିଜ୍କୁ ଉପରକୁ ଉଠାଇବୁ । ଏହାପରେ ଜାହାଜ ଗୋଟିଏ ପଟରୁ ଅନ୍ୟ ପଟକୁ ସହଜରେ ଯାଇପାରିବ
