ନୂଆଦିଲ୍ଳୀ: ଇଣ୍ଡିଆ ମେଣ୍ଟ କ୍ଷମତାକୁ ଆସିଲେ ସେ ଆଉ ଜେଲ୍ ଯିବେ ନାହିଁ ବୋଲି ଜାତୀୟ ରାଜଧାନୀ ଦିଲ୍ଲୀରେ କହିଛନ୍ତି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ । ଦଳୀୟ କାଉନସିଲରଙ୍କୁ ସମ୍ବୋଧିତ କରିବା ଅବସରରେ କେଜ୍ରିଓ୍ବାଲ କହିଛନ୍ତି ଯେ, ସୁପ୍ରିମକୋର୍ଟରୁ ବେଲ୍ ମିଳିବା କୌଣସି ଚମତ୍କାରିତାଠୁ କମ୍ ନୁହେଁ । ଭଗବାନଙ୍କ ଦୟାରୁ ତାଙ୍କୁ ୨୦ ଦିନର ଅନ୍ତରୀଣ ଜାମିନ ମିଳିଛି ବୋଲି କହିଛନ୍ତି କେଜ୍ରିଓ୍ବାଲ ।
ସେ ଆହୁରି କହିଛନ୍ତି ଯେ, ‘ଆପ ନେତାଙ୍କୁ ଲୋକେ ଭଲ ପାଉଛନ୍ତି କିନ୍ତୁ ବିଜେପି ଭୟ କରୁଛି । ଜୁନ୍ ୨ରେ ମୋତେ ଜେଲ ଯିବାକୁ ପଡ଼ିବ । ଜୁନ୍ ୪ରେ ଆସିବାକୁ ଥିବା ନିର୍ବାଚନ ଫଳାଫଳ ମୁଁ ଜେଲ୍ରେ ରହି ଦେଖିବି । ଯଦି ଇଣ୍ଡିଆ ମେଣ୍ଟ କ୍ଷମତାକୁ ଆସେ ତେବେ ମୁଁ ଜୁନ୍ ୫ରେ ଜେଲ୍ରୁ ବାହାରିବି । ଜେଲ୍ ଯିବା ପରେ ଆପଣମାନଙ୍କ କାର୍ଯ୍ୟ କରିବାର ଉତ୍ସାହ ମୋତେ ସାହସ ଦେଇଛି । ସେମାନେ ଆମକୁ ଭାଙ୍ଗିବାକୁ ବହୁତ ଚେଷ୍ଟା କରିଛନ୍ତି କିନ୍ତୁ ଆନପଣମାନେ କେଉଁଆଡ଼େ ଯାଇନାହାନ୍ତି । ସେମାନେ ଜେଲ୍ରେ ମୋତେ ୧୫ ଦିନ ଯାଏଁ ଇନସୁଲିନ୍ ଦେଲେ ନାହିଁ । ସେମାନେ ମୋତେ ବାରମ୍ବାର ଅପମାନ ଦେବାକୁ ଚେଷ୍ଟା କରିଛନ୍ତି ।’
କେଜ୍ରିଓ୍ବାଲ କହିଛନ୍ତି ଯେ , ତାଙ୍କ ସେଲ୍ରେ ଦୁଇଟି ସିସିଟିଭି ଲାଗିଥିଲା । ୧୩ ଜଣ ଅଧିକାରୀ ଏହାକୁ ମନିଟରିଂ କରୁଥିଲେ । ସିସିଟିଭି ଫୁଟେଜ୍କୁ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟକୁ ପଠାଯାଉଥିଲା । ମୋଦୀ ମୋ ଉପରେ ନଜର ରଖିଥିଲେ । ମୋ ଉପରେ ମୋଦୀଙ୍କ ଏତେ ରାଗ କାହିଁକି ମୁଁ ଜାଣିନାହିଁ ବୋଲି ସେ କହିଛନ୍ତି ।
ସୂଚନାଯୋଗ୍ୟ, ଦିଲ୍ଲୀ ଅବକାରୀ ଦୁର୍ନୀତି ସହ ଜଡ଼ିତ ମନି ଲଣ୍ଡରିଂ ମାମଲାରେ ଅରବିନ୍ଦ କେଜ୍ରିଓ୍ବାଲ ଜୁନ୍ ୧ ଯାଏଁ ଅନ୍ତରୀଣ ଜାମିନ ପାଇଛନ୍ତି । ଲୋକସଭା ନିର୍ବାଚନରେ ପ୍ରଚାର ଲାଗି ତାଙ୍କୁ ଏହି ଜାମିନ ପ୍ରଦାନ କରିଛନ୍ତି ସୁପ୍ରିମକୋର୍ଟ । ଜୁନ୍ ୨ରେ ତାଙ୍କୁ ପୁଣି ତିହାର ଜେଲ୍ ଫେରିକାବୁ ପଡ଼ିବ । ଜୁନ୍ ୧ରେ ଲୋକସଭା ନିର୍ବାଚନ ଶେଷ ହେବାକୁ ଥିବା ବେଳେ ଜୁନ୍ ୪ରେ ଫଳାଫଳ ଘୋଷଣା ହେବ ।
