ନୂଆଦିଲ୍ଲୀ: ଋଷିୟ ଏୟାରଲାଇନ୍ସ ସଂସ୍ଥା ଉତଏୟାରର ଏକ ବିମାନ ମଙ୍ଗଳବାର ମସ୍କୋର ଭ୍ନୁକୋଭୋ ଏୟାରପୋର୍ଟରେ ଜରୁରି ଅବତରଣ କରିଛି। ଏନେଇ ଋଷିଆର ଖବର ସରବରାହ ସଂସ୍ଥା ଆରଆଇଏ ଖବର ପ୍ରକାଶ କରିଛି।
ସୁଚନା ମୁତାବକ, ଏକ ବୋଇଂ ୭୩୭ ବିମାନ ମୋଟ ୧୭୩ ଜଣ ଯାତ୍ରୀଙ୍କୁ ନେଇ ସେଣ୍ଟ ପିଟର୍ସବର୍ଗରୁ ଉଜବେକିସ୍ତାନର ସମରକନ୍ଦ ଅଭିମୁଖେ ଯାତ୍ରା କରୁଥିଲା। ବିମାନଟି ଆକାଶପଥରେ ଉଡୁଥିବା ସମୟରେ ବିମାନର ଷ୍ଟାବିଲାଇଜରରେ ତ୍ରୁଟି ପରିଲକ୍ଷିତ ହୋଇଥିଲା। ତେଣୁ ବିମାନଟିକୁ ନିକଟରେ ଥିବା ଭ୍ନୁକୋଭୋ ଏୟାରପୋର୍ଟରେ ସୁରକ୍ଷିତ ଭାବେ ଜରୁରି ଅବତରଣ କରାଯାଇଥିଲା ବୋଲି ଆରଆଇଏ ଖବର ପ୍ରକାଶ କରିଛି।
ଏହି ଦୁର୍ଘଟଣାରେ ବିମାନର ସମସ୍ତ ଯାତ୍ରୀଙ୍କ ସମେତ ସମସ୍ତ କ୍ରୁ ମେମ୍ବର ସୁରକ୍ଷିତ ଅଛନ୍ତି ବୋଲି ରିପୋର୍ଟ ପ୍ରକାଶ ପାଇଛି।
ବିମାନ ଯାତ୍ରା ଚାହିଦା ପୂରଣ କରିବା ପାଇଁ ଋଷ ପାଖରେ ବର୍ତ୍ତମାନ ପର୍ଯ୍ୟାପ୍ତ ବିମାନ ନାହିଁ । ଋଷ ୟୁକ୍ରେନ ଯୁଦ୍ଧ ପାଇଁ ପାଶ୍ଚାତ୍ୟ ଦେଶ ଗୁଡିକ ଋଷ ଉପରେ ପ୍ରତିବନ୍ଧକ ଲଗାଇବା ପରେ ଯାତ୍ରୀ ମାନଙ୍କୁ ଉପଯୁକ୍ତ ବିମାନ ସେବା ଯୋଗାଇ ପାରୁନାହିଁ ଋଷ। ଏଣୁ ବାଧ୍ୟ ହେଇ ଋଷିଆ ଗୋଟିଏ ଗୋଟିଏ ବିମାନକୁ ଏକାଧିକ ଗନ୍ତବ୍ୟସ୍ଥଳକୁ ପଠାଉଛି। ଏହି ପରିପ୍ରେକ୍ଷିରେ ଏହି ବିମାନରେ ରକ୍ଷଣାବେକ୍ଷଣ ଅଭାବରୁ ଏପରି ହୋଇଥିବା ସନ୍ଦେହ କରାଯାଉଛି ବୋଲି ଆରଆଇଏ ପ୍ରକାଶ କରିଛି।
