ବୈପାରୀଗୁଡା,୦୮/୦୧: ଆମଟିଗୁଡା ହତ୍ୟା ମାମଲାର ପର୍ଦାଫାଶ କଲା ବୈପାରୀଗୁଡା ପୋଲିସ । ଏ ହତ୍ୟା ମାମଲାରେ ପାଞ୍ଚ ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚଲାଣ କରାଯାଇଛି । ଗିରଫ ଅଭିଯୁକ୍ତ ମାନେ କାତପୋଡା ଗାଁର ମାଧବ ଖରା, ଆମଟିଗୁଡା ଗାଁର ନରସିଂହ ହନ୍ତାଳ, ଡମ୍ବୁରୁଧର ନାୟକ, ରଘୁ ମୁଦୁଲି ଏବଂ ହରି ହନ୍ତାଳ ବୋଲି ଜଣାପଡ଼ିଛି । କୋରାପୁଟ ଜିଲ୍ଲା ବୈପାରୀଗୁଡା ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଜାନୁଆରୀ ୧ ତାରିଖରେ ବୈପାରୀଗୁଡା ଥାନା ଅନ୍ତର୍ଗତ ବୋଦାପୁଟ ପଞ୍ଚାୟତର ଆମଟିଗୁଡା-କାତପୋଡା ରାସ୍ତା ମଝିରେ ସଦନ ପାଙ୍ଗିଙ୍କୁ ଟାଙ୍ଗିଆରେ ହତ୍ୟା କରାଯାଇଥିଲା । ସଦନ ପାଙ୍ଗିଙ୍କ ଝିଅ ନୟାନା ପାଙ୍ଗି ବୈପାରୀଗୁଡା ଥାନାରେ ଏତଲା ଦେବା ପରେ ହତ୍ୟାକାରୀକୁ ଧରିବାରେ ପୋଲିସ ସଫଳ ହୋଇଛି । ଏହି ହତ୍ୟାରେ ସମ୍ପୃକ୍ତ ଥିବା ୫ ଜଣ ଅଭିଯୁକ୍ତଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଛି । ଏ ନେଇ ଗଣ ମାଧ୍ୟମକୁ ସୂଚନା ଦେଇଛନ୍ତି ବୈପାରୀଗୁଡା ଆଇଆଇସି ଦୀପାଞ୍ଜଳି ପ୍ରଧାନ ।
