କୋଣାର୍କ, ୩୦/୧୦: କୋଣାର୍କ ସୂର୍ଯ୍ୟ ମନ୍ଦିରରେ ଜଣେ ପର୍ଯ୍ୟଟକ ଆହତ ହୋଇଛନ୍ତି । ଆହତ ରୂପା ସର୍ଦ୍ଦାର (୧୫ବର୍ଷ) ଜଣେ ବଙ୍ଗୀୟ ପର୍ଯ୍ୟଟକ ବୋଲି ଜଣାପଡ଼ିଛି । ମୁଖ୍ୟ ଫାଟକରେ ତାଲା ପଡ଼ି ରହୁଥିବାରୁ ଆମ୍ବୁଲାନ୍ସକୁ ଗେଟ୍ ବାହାରେ ଦୀର୍ଘ ସମୟ ଧରି ଅପେକ୍ଷା କରିବାକୁ ପଡୁଥିବା ଦେଖିବାକୁ ମିଳିଛି।  ବୁଧବାର ପୂର୍ବାହ୍ନରେ ଏଭଳି ଘଟଣା ଦେଖିବାକୁ ମିଳିଛି।

ସୂଚନା ମୁତାବକ, ରୂପା ସର୍ଦ୍ଦାର ଜଣେ ବଙ୍ଗୀୟ ପର୍ଯ୍ୟଟକ ସୂର୍ଯ୍ୟ ମନ୍ଦିର ବୁଲୁଥିବା ବେଳେ କୌଣସି କାରଣକୁ ନେଇ ଅସୁସ୍ଥ ହେବା ସହ ଅଚେତ ହୋଇ ପଡ଼ି ଯାଇଥିଲେ । ଏହା ଦେଖି ତୁରନ୍ତ ତାଙ୍କ ପରିବାର ଲୋକ ଓ ସ୍ଥାନୀୟ ଲୋକ ଆମ୍ବୁଲାନ୍ସକୁ ଫୋନ୍ କରିଥିଲେ । ହେଲେ ମୁଖ୍ୟ ଫାଟକରେ ତାଲା ପଡ଼ିବା ଯୋଗୁଁ ଆମ୍ବୁଲାନ୍ସ ବାହାରେ ଅଟକି ରହିଥିଲା । ବହୁ ବିଳମ୍ବରେ ସୁରକ୍ଷା କର୍ମୀ ମାନେ ଆସି ତାଲା ଖୋଲିଥିଲେ । ତାଲା ଖୋଲିବା ପରେ ଆହତ ପର୍ଯ୍ୟଟକ ଜଣକୁ ମେଡିକାଲ ନିଆଯାଇଥିଲା । ତେବେ ଅଣଓଡ଼ିଆ କର୍ମଚାରୀଙ୍କ ମନମାନି ଯୋଗୁଁ ସୂର୍ଯ୍ୟ ମନ୍ଦିରରେ ବ୍ୟାପକ ଅନିୟମିତତା ହେଉଥିବା ସାଧାରଣରେ ଅଭିଯୋଗ ହୋଇଛି। ତୁରନ୍ତ ବିଭାଗୀୟ ଉଚ୍ଚ କର୍ତ୍ତୃପକ୍ଷ, ଜିଲ୍ଲାପାଳ ଦୃଷ୍ଟି ଦେବାକୁ ଦାବି ହୋଇଛି।