ପାଟନା: ଇଣ୍ଡି ମେଣ୍ଟରେ ସାମିଲ ହେବାକୁ ନୀତୀଶ କୁମାରଙ୍କ ଲାଗି ଦ୍ବାର ଖୋଲା ଅଛି ବୋଲି ଆରଜେଡି ମୁଖ୍ୟ ଲାଲୁ ପ୍ରସାଦ ଯାଦବ କହିବା ପରେ ବିହାର ମୁଖ୍ୟମନ୍ତ୍ରୀଙ୍କ ପ୍ରତିକ୍ରିୟା ମିଳିଛି । ସାମ୍ବାଦିକ ଏନେଇ ପଚାରିବାରୁ ନୀତୀଶ କୁମାର ହାତ ଯୋଡ଼ିବା ସହ ସ୍ମିତହାସ୍ୟ ଦେଇଛନ୍ତି । ଆଉ କହିଛନ୍ତି ‘ଆପଣମାନେ କଣ କହୁଛନ୍ତି ?’ । ଏକ ସାକ୍ଷାତକାରରେ ଲାଲୁ ଯାଦବ କହିଥିଲେ ‘ନୀତୀଶ କୁମାରଙ୍କ ଲାଗି ଆମ ଦ୍ବାର ଖୋଲା ରହିଛି । ତାଙ୍କୁ ମଧ୍ୟ ଦ୍ବାର ଖୋଲିଦେବା ଦରକାର । ଫଳରେ ଉଭୟ ପକ୍ଷର ଲୋକଙ୍କୁ ଯିବା ଆସିବା କରିବାରେ ସୁବିଧା ହେବ ।’
ଲାଲୁ ଯାଦବଙ୍କ ଏହି ମନ୍ତବ୍ୟ ପରେ ପୁଣି ଥରେ ନୀତୀଶ କୁମାରଙ୍କ ପଟ ପରିବର୍ତ୍ତନକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି । ବିହାରରେ ଦୁଇ ବରିଷ୍ଠଙ୍କ ମଧ୍ୟରେ ପୁଣି ଥରେ ମେଣ୍ଟ ନେଇ ଆଶଙ୍କା ପ୍ରକାଶ ପାଇଛି । ଯାଦବ ଏବଂ କୁମାର ‘ବଡ଼ ଭାଇ, ଛୋଟ ଭାଇ’ ଭାବରେ ମଧ୍ୟ ବେଶ ଜଣାଶୁଣା । ଜେଡିୟୁ ନେତା ନୀତୀଶ କୁମାର ଗତ ଦଶନ୍ଧୀରେ ଆରଜେଡି ସହ ଦୁଇ ଥର ମେଣ୍ଟ କରିଛନ୍ତି ଏବଂ ଅଲଗା ହୋଇଛନ୍ତି ।
୨୦୨୪ରେ ମହାମେଣ୍ଟରୁ ଅଲଗା ହୋଇ ନୀତୀଶ କୁମାର ବିଜେପି ନେତୃତ୍ବାଧୀନ ଏନଡିଏରେ ସାମିଲ ହୋଇଥିଲେ । ସେପଟେ ଲାଲୁଙ୍କ ବୟାନକୁ ନେଇ ତାଙ୍କ ପୁଅ ଏବଂ ପୂର୍ବତନ ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବ କହିଛନ୍ତି, ମିଡିଆକୁ ଖୁସି କରାଇବାକୁ ସେ ଏଭଳି କହିଥାଇପାରନ୍ତି ।
ବିହାରର ନୂଆ ରାଜ୍ୟପାଳ ଆରିଫ ଖାନଙ୍କ ଶପଥ ଗ୍ରହଣ ଉତ୍ସବରେ ତେଜସ୍ବୀ ଯାଦବ କହିଛନ୍ତି, ସେ (ଲାଲୁ) ଯାହା କିଛି କହିଛନ୍ତି କେବଳ ଆପଣମାନଙ୍କ(ସାମ୍ବାଦିକ) ପ୍ରଶ୍ନର ଉତ୍ତର ଦେବାକୁ ଯାଇ କହିଛନ୍ତି । ସେ ଯାହା ହେଉ ନୂଆବର୍ଷରେ ନୀତୀଶ କୁମାରଙ୍କ ନେତୃତ୍ବାଧୀନ ଏନଡିଏ ସରକାରର ପତ୍ତନ ହେବ । ନୀତୀଶ କୁମାର ମୁଷ୍ଟିମେୟ ଲୋକଙ୍କ ଗହଣରେ ରହି ସରକାର ଚଳାଉଛନ୍ତି ଏବଂ ସେ ଏକାକୀ ରାଜ୍ୟ ଚଳାଇବା ପାଇଁ ସକ୍ଷମ ନୁହଁନ୍ତି ବୋଲି ତେଜସ୍ବୀ ଯାଦବ ଦାବି କରିଛନ୍ତି ।
ଅନ୍ୟପଟେ ଜେଡିୟୁ ନେତା ଏବଂ କେନ୍ଦ୍ରମନ୍ତ୍ରୀ ଲଲନ ସିଂହ ଲାଲୁ ଯାଦବଙ୍କ ଦାବିକୁ ଖଣ୍ଡନ କରିଛନ୍ତି । ଏନଡିଏ ଶକ୍ତିଶାଳୀ ଥିବା ବେଳେ ଜେଡିୟୁ ଏବଂ ବିଜେପି ଏକ ଅଛନ୍ତି । ଲୋକେ ଯାହା ଚାହିଁବେ କହିପାରିବେ, କାରଣ ଏହା ଏକ ମୁକ୍ତ ଦେଶ ବୋଲି ଲଲନ ସିଂହ କହିଛନ୍ତି ।
