କଣାସ,୨୭/୧୨: ଅଦିନିଆ ବର୍ଷା ଭାଙ୍ଗିଛି ଚାଷୀଙ୍କ ମେରୁଦଣ୍ଡ । ଲଗାଣ ବର୍ଷାରେ ସମ୍ପୂର୍ଣ୍ଣ ଉଜିଡ଼ିଛି ପୁରୀ ଜିଲ୍ଲା କଣାସ ବ୍ଲକର ଗଡ଼ସାନପୁଟ ଲୋକାପାଳ ଅଞ୍ଚଳର ଚିନା ବାଦାମ ଚାଷ । ଲକ୍ଷାଧିକ ଟଙ୍କା ଋଣ କରି ଚିନା ବାଦାମ ଚାଷ କରିଥିଲେ ଏହି ଅଞ୍ଚଳର ଚାଷୀ । ଏବେ ଅଦିନିଆ ଲଘୁଚାପ ଜନିତ ବର୍ଷା ସେ ସବୁକୁ ଉଜାଡି ଦେଇଛି । ଚିନା ବାଦାମ ବିଲରେ ଲହଢ଼ି ମାରୁଛି ବର୍ଷା ପାଣି ।
ଶହ ଶହ ଏକର ଚାଷ ଜମି ଏବେ ହୋଇଛି ସମ୍ପୂର୍ଣ ଜଳମଗ୍ନ । ଚାଷ କରି ଅନେକ ସ୍ୱପ୍ନ ଦେଖିଥିବା ଚାଷୀ ଏବେ ହତାଶ ହୋଇ ମୁଣ୍ଡରେ ହାତ ଦେଇ ବସିଛି । କେମିତି କରିବ ପରିବାର ପ୍ରତିପୋଷଣ, କେମିତି ଭରଣା ହେବ ଚାଷର କ୍ଷତିପୂରଣ । ବର୍ତ୍ତମାନ ସୁଦ୍ଧା ଚାଷୀଙ୍କ ନିକଟରେ କେହି ସରକାରୀ ଅଧିକାରୀ ପହଁଞ୍ଚି ନଥିବା ବିଷୟରେ ଚାଷୀ ଦୁଃଖର ସହ କହିଛନ୍ତି । ତେବେ ସରକାରୀ ଆର୍ଥିକ କ୍ଷତିପୂରଣକୁ ଏକ ମାତ୍ର ଭରଷା କରି ଚାହିଁ ରହିଛନ୍ତି କଣାସ ବ୍ଲକର ସମସ୍ତ ଚିନା ବାଦାମ ଚାଷୀ ।
