ପୁରୀ, ୨୪/୧୨: ଶ୍ରୀମନ୍ଦିର ନାଟମଣ୍ଡପରେ ଚଳିତ ୨୭ ଓ ୨୮ ତାରିଖରେ ନୂଆ ବ୍ୟାରିକେଡ୍ ଓ ର୍ୟାମ୍ପ ଦେଇ ପରୀକ୍ଷାମୂଳକ ଦର୍ଶନ ବ୍ୟବସ୍ଥା କରାଯିବ । ଏନେଇ ସୋମବାର ପ୍ରତିହାରୀ ନିଯୋଗ ସହ ସମନ୍ୱୟ ବୈଠକ ପରେ ସୂଚନା ଦେଇଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢ଼ୀ ।
ଶ୍ରୀ ପାଢ଼ୀ କହିଛନ୍ତି, ଶ୍ରୀମନ୍ଦିରର ସମସ୍ତ ପ୍ରମୁଖ ନିଯୋଗଙ୍କ ସହ ପରବର୍ତ୍ତୀ ସମୟରେ ପରାମର୍ଶ ବୈଠକ କରିବାକୁ ଜିଲ୍ଲାପାଳଙ୍କ ଅଧ୍ୟକ୍ଷତାରେ ଏକ କମିଟି କରାଯାଇଛି । କମିଟିରେ ଏସ୍ପି, ଶ୍ରୀମନ୍ଦିର କମାଣ୍ଡର, ନୀତି ପ୍ରଶାସକ ମଧ୍ୟ ରହିଛନ୍ତି । ନୂଆ ବ୍ୟାରିକେଡ୍ ଦର୍ଶନ ବ୍ୟବସ୍ଥାରେ କିଛି ବି ଅସୁବିଧା ନଜର ଆସିଲେ ଏହାକୁ ପରବର୍ତ୍ତୀ ସମୟରେ ସୁଧାର କରାଯିବ । ଭକ୍ତମାନେ ଯେପରି ସୁବିଧାରେ ମହାପ୍ରଭୁଙ୍କ ଦର୍ଶନ କରିବେ ଓ ସୁଖଦ ଅନୁଭବ ନେଇ ଯିବେ ତାହାକୁ ଲକ୍ଷ୍ୟରେ ରଖି ଏହି ବ୍ୟବସ୍ଥା କରାଯାଉଛି । ତେଣୁ ପରୀକ୍ଷାମୂଳକ ଦର୍ଶନ ବ୍ୟବସ୍ଥା ପରେ ସ୍ଥାୟୀ ଭାବେ ପହିଲା ପରେ ଦିନ ସ୍ଥିର କରି ଲାଗୁ କରାଯିବ । ମାତ୍ର ଏହି ବ୍ୟବସ୍ଥା ନିଶ୍ଚିତ କରାଯିବ । ବ୍ୟାରିକେଡ୍ ବ୍ୟବସ୍ଥା ନିମନ୍ତେ ନାଟମଣ୍ଡପରେ ଥିବା ହୁଣ୍ଡି ସ୍ଥାନାନ୍ତର କରିବାକୁ ପଡ଼ିବ ।
ଶ୍ରୀମନ୍ଦିର ନିୟମ ମୁତାବକ ହୁଣ୍ଡି କରିବା, ସ୍ଥାନାନ୍ତର ଓ ହଟାଇବାକୁ ହେଲେ ରାଜ୍ୟ ସରକାରଙ୍କ ବିଧି ବିଭାଗର ଅନୁମତି ଆବଶ୍ୟକ ପଡ଼ିବ। ସରକାରଙ୍କଠାରୁ ଏନେଇ ଅନୁମତି ନିଆଯାଇ ହୁଣ୍ଡି ସ୍ଥାନାନ୍ତର କରାଯିବ । ସେହିପରି ନୂଆ ଦର୍ଶନ ବ୍ୟବସ୍ଥାକୁ କାର୍ଯ୍ୟକାରୀ କରିବା ନିମନ୍ତେ ଏକ ଏସ୍ଓପି (ଷ୍ଟାଣ୍ଡାର୍ଡ ଅପରେଟିଂ ସିଷ୍ଟମ)କୁ ମଧ୍ୟ ପାଳନ କରାଯିବ । ନାଟମଣ୍ଡପରେ ବ୍ୟାରିକେଡ୍ ଦର୍ଶନ ବ୍ୟବସ୍ଥା କରାଯିବା ଦ୍ୱାରା ଭିତର କାଠ ଦର୍ଶନ ବ୍ୟବସ୍ଥାକୁ ସଙ୍କୁଚିତ କରିବା ପାଇଁ ଚେଷ୍ଟା ହେଉଥିବା ଅନେକ ଆଶଙ୍କା ପ୍ରକାଶ କରିଛନ୍ତି । ମାତ୍ର ଶ୍ରଦ୍ଧାଳୁଙ୍କ ଭିତରକାଠ ଦର୍ଶନ ବ୍ୟବସ୍ଥା ବନ୍ଦ ହେବ ନାହିଁ । ନୂଆ ବ୍ୟାରିକେଡ ବ୍ୟବସ୍ଥା ହେଲେ ଏହା ଭିତରକାଠ ଦର୍ଶନ ବିଧି ବ୍ୟବସ୍ଥାରେ କୌଣସି ହାନି ପହଞ୍ଚାଇବ ନାହିଁ । ପୂର୍ବଭଳି ନୀତି ନିର୍ଦ୍ଧାରିତ ସମୟରେ ଶ୍ରଦ୍ଧାଳୁମାନେ ଭିତର କାଠ ପର୍ଯ୍ୟନ୍ତ ଯାଇ ମହାପ୍ରଭୁଙ୍କ ଦର୍ଶନ କରିପାରିବେ ବୋଲି ମୁଖ୍ୟ ପ୍ରଶାସକ କହିଛନ୍ତି ।
ଜଣେ ପ୍ରାଶାସନିକ ଅଧିକାରୀ କହିଛନ୍ତି, ଶ୍ରୀମନ୍ଦିର ନାଟମଣ୍ଡପରେ ହେଉଥିବା ୬ଥାକିଆ ବ୍ୟାରିକେଡ୍ ଓ ର୍ୟାମ୍ପ ଦର୍ଶନ ବ୍ୟବସ୍ଥାରେ ୩ଟି ଲାଇନ୍ ମହିଳା, ଶିଶୁ, ବୟସ୍କ ଓ ଦିବ୍ୟାଙ୍ଗ ନିମନ୍ତେ ଏବଂ ବାକି ୩ଟି ପୁରୁଷଙ୍କ ନିମନ୍ତେ ଉନ୍ମୁକ୍ତ ରହିବ । ଶ୍ରଦ୍ଧାଳୁମାନେ ସାତପାହାଚ ନେଇ ନାଟମଣ୍ଡପରେ ଠାକୁର ଦର୍ଶନ କରିବା ପରେ ଗାରଦ ଦ୍ୱାର ଓ ଘଣ୍ଟି ଦ୍ୱାର ଦେଇ ପାଟଅଗଣାକୁ ବାହାରିବେ ।
