ପୁରୀ,୨୭/୧୨: ଚଳିତ ମାସ ୨୮ ତାରିଖରେ ଶ୍ରୀମନ୍ଦିର ଭିତରେ ହେବାକୁ ଥିବା ବ୍ୟାରିକେଡ୍ ଓ ର୍ୟାମ୍ପର ପରୀକ୍ଷା ମୂଳକ ଦର୍ଶନ ବ୍ୟବସ୍ଥାକୁ ସ୍ଥଗିତ ରଖାଯାଇଛି । ବଡ଼ ଦିନ ଛୁଟି, ନୂଆବର୍ଷ ଓ ଗଙ୍ଗା ସାଗର ଯାତ୍ରୀଙ୍କ ଭିଡ଼କୁ ଲକ୍ଷ୍ୟରେ ରଖି ପରୀକ୍ଷା ମୂଳକ ଦର୍ଶନ ବ୍ୟବସ୍ଥା କରିବା ନିଷ୍ପତ୍ତିରୁ ପ୍ରଶାସନ ଓହରି ଯାଇଛି । ଏହା ଜାନୁଆରୀ ୨୦ ପରେ ପ୍ରାୟତଃ ୨୨ ତାରିଖ ବେଳକୁ କରାଯିବାକୁ ପରବର୍ତ୍ତୀ ନିଷ୍ପତ୍ତି ନିଆଯାଇଥିବା ଗୁରୁବାର ସୂଚନା ଦେଇଛନ୍ତି ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ।
ମନ୍ତ୍ରୀ କହିଛନ୍ତି, ୨୮ ତାରିଖରେ ଶ୍ରୀମନ୍ଦିରରେ ନୂଆ ଧାଡ଼ି ଦର୍ଶନ ବ୍ୟବସ୍ଥାକୁ ପରୀକ୍ଷା ମୂଳକ ଭାବେ କରିବାକୁ ନିଷ୍ପତ୍ତି ହୋଇଥିଲା । ମାତ୍ର ୨୮ରୁ ଶ୍ରଦ୍ଧାଳୁଙ୍କ ଭିଡ଼ ଶ୍ରୀମନ୍ଦିରରେ ବଢ଼ିବ । ଆସନ୍ତା ପହିଲା ବେଳକୁ ଭିଡ଼ ସର୍ବୋଚ୍ଚ ସ୍ତରରେ ପହଞ୍ଚିବ । ତେଣୁ ଏହି ସମୟରେ ପରୀକ୍ଷା ମୂଳକ ନୂଆ ଦର୍ଶନ ବ୍ୟବସ୍ଥା କରିବା ଠିକ୍ ହେବନି । ଏହାକୁ ଆଖି ଆଗରେ ରଖି ଶ୍ରୀମନ୍ଦିର ମୁଖ୍ୟ ପ୍ରଶାସକ, ଜିଲ୍ଲାପାଳ, ଏସ୍ପି, ବିଧି ବିଭାଗର ଅଧିକାରୀଙ୍କ ଉପସ୍ଥିତିରେ ଗୁରୁବାର ଏକ ବୈଠକ ହୋଇଥିଲା । ଚଳିତ ମାସ ୧୮ରୁ ଜାନୁଆରି ୨୦ ତାରିଖ ଗଙ୍ଗା ସ୍ନାନ ସରିବା ପର୍ଯ୍ୟନ୍ତ ଶ୍ରଦ୍ଧାଳୁଙ୍କ ଭିଡ଼ ସମ୍ଭାବନା ଥିବାରୁ ଶ୍ରୀମନ୍ଦିରରେ ପରୀକ୍ଷା ମୂଳକ ଦର୍ଶନ ବ୍ୟବସ୍ଥା ନକରି ପରେ କରାଯିବ । ଶୃଙ୍ଖଳିତ ଦର୍ଶନ ବ୍ୟବସ୍ଥା ନିମନ୍ତେ ଯେଉଁ ଷ୍ଟ୍ରକ୍ଚର ହେବା କଥା ହୋଇସାରିଛି ।
ଏହାକୁ ଆସନ୍ତା ମାସ ୨୨ ତାରିଖ ବେଳକୁ ନୂଆ ଦର୍ଶନ ବ୍ୟବସ୍ଥା କରାଯିବ । ଯାତ୍ରୀଙ୍କ ଭିଡ଼ ସମୟରେ ଯେପରି ସମସ୍ୟା ନହେବ ଓ ପରେ ଯେପରି ଗୋଟିଏ ବ୍ୟବସ୍ଥା ୩୬୫ ଦିନ ପର୍ଯ୍ୟନ୍ତ ଚାଲିବ ତାହାକୁ ଲକ୍ଷ୍ୟ ରଖାଯାଇଛି । ସୂଚନାଥାଉକି, ଶ୍ରୀମନ୍ଦିର ନାଟମଣ୍ଡପରେ ସରକାର ଶୃଙ୍ଖଳିତ ଦର୍ଶନ ବ୍ୟବସ୍ଥା କରିବା ନିମନ୍ତେ ୬ ଥାକିଆ କାଠ ବ୍ୟାରିକେଡ୍ ଓ ର୍ୟାମ୍ପ ବ୍ୟବସ୍ଥା କରାଯିବାକୁ ଯୋଜନା ପ୍ରସ୍ତୁତ କରିଛନ୍ତି । ୬ଟି ଧାଡ଼ି ମଧ୍ୟରୁ ୩ଟି ଦିବ୍ୟାଙ୍ଗ, ବୟସ୍କ, ମହିଳା ଓ ଶିଶୁଙ୍କ ନିମନ୍ତେ ସଂରକ୍ଷିତ ରଖାଯିବ । ବାକି ୩ଟିରେ ସାଧାରଣ ଶ୍ରଦ୍ଧାଳୁ ଠାକୁର ଦର୍ଶନ କରିବାକୁ ଯିବେ । ସାତପାହାଚ ଦେଇ ଶ୍ରଦ୍ଧାଳୁମାନେ ନାଟମଣ୍ଡପରେ ପଶିବା ପରେ ବ୍ୟାରିକେଡ୍ ଭିତର ଦେଇ ଠାକୁର ଦର୍ଶନ କରିବେ । ପରେ ଗାରଦ ଦ୍ୱାର ଓ ଘଣ୍ଟିଦ୍ୱାରରେ ପ୍ରସ୍ଥାନ କରିବେ । ଏହି ବ୍ୟାରିକେଡରେ ର୍ୟାମ୍ପ ରହିବ । ର୍ୟାମ୍ପର ଗରୁଡ଼ ସ୍ତମ୍ଭ ପାଶ୍ୱର୍ ଉଚ୍ଚ ଓ ବାହାର କାଠ ପାଶ୍ୱର୍ ନିଚା ରହିବ । ଫଳରେ ପଛରେ ରହୁଥିବା ଶ୍ରଦ୍ଧାଳୁ ଠାକୁର ଦର୍ଶନ କରିବାରେ ହିନସ୍ତା ହେବେନି ।
