ପୁରୀ,୨୭/୦୩: ଅଭିନେତ୍ରୀ ରାଣୀ ପଣ୍ଡାଙ୍କୁ ଯାତ୍ରା ମଞ୍ଚରେ ପାଣି ବୋତଲ ମାଡ଼ ହୋଇଛି । ସତ୍ୟବାଦୀରେ ଏଭଳି ଘଟଣା ଘଟିଛି । ଜଣେ ଆଗ୍ନିକ ଏହି କାଣ୍ଡ ଘଟାଇଛନ୍ତି । ଲୋକଙ୍କ ମାଡ଼ରେ ଆଗ୍ନିକ ଜଣଙ୍କ ଆହତ ହୋଇଛନ୍ତି ।
ସୂଚନା ଅନୁଯାୟୀ, ରାଣୀ ମଙ୍ଗଳବାର ସତ୍ୟବାଦୀ ଥାନା ଅଧୀନ କାଞ୍ଜିଆ ଅଞ୍ଚଳକୁ ଯାତ୍ରା ମଞ୍ଚରେ ନିମନ୍ତ୍ରିତ ଅତିଥି ଭାବେ ଆସିଥିଲେ । କାର୍ଯ୍ୟକ୍ରମ ଜାରି ରହିଥିବାବେଳେ ଅଧା ପାଣି ବୋତଲ ମାଡ଼ କରିଥିଲେ ଆଗ୍ନିକ । ଏହି ସମୟରେ ଲୋକେ ଆଗ୍ନିକ ଜଣଙ୍କୁ କାବୁ କରି ନିସ୍ତୁକ ପିଟିଥିଲେ । ସତ୍ୟବାଦୀ ଥାନା ପୁଲିସ୍ ପହଞ୍ଚି ସଂପୃକ୍ତ ଆଗ୍ନିକଙ୍କୁ ଉଦ୍ଧାର କରିଥିଲା । ସେ ତାଳବଣିଆ ଥାନା ଅଧୀନ ମଧୁବନ ଅଞ୍ଚଳର ଶକ୍ତିପ୍ରସାଦ ସାହୁ ବୋଲି ଜଣାପଡ଼ିଛି ।ଶକ୍ତି ରାୟଗଡ଼ା ଜିଲ୍ଲାରେ ଫାୟାର ମ୍ୟାନ୍ ଥିବା କହିଛନ୍ତି ସତ୍ୟବାଦୀ ଥାନା ଆଇଆଇସି ବିଜୟ କେତନ ବେହେରା । ପରବର୍ତ୍ତୀ ସମୟରେ ଘଟଣାର ସମାଧାନ ହୋଇଯାଇଥିବାରୁ ସମ୍ପୃକ୍ତ ଆଗ୍ନିକଙ୍କୁ ଛାଡ଼ି ଦିଆଯାଇଥିବା ପୁଲିସ୍ କହିଛି ।
