ନୂଆଦିଲ୍ଲୀ: ତାମିଲଗା ଭେଟ୍ଟ୍ରି କାଝାଗମ (ଟିଭିକେ)ର ପ୍ରତିଷ୍ଠାତା ଏବଂ ଅଭିନେତାରୁ ରାଜନେତା ହୋଇଥିବା ବିଜୟଙ୍କୁ ‘Y’ ବର୍ଗର ସୁରକ୍ଷା ପ୍ରଦାନ କରିଛି ଗୃହ ମନ୍ତ୍ରଣାଳୟ ।  ‘Y’ ବର୍ଗରରେ ବ୍ୟକ୍ତିଗତ ସୁରକ୍ଷା ଅଧିକାରୀ (PSO) ଏବଂ ସଶସ୍ତ୍ର ଗାର୍ଡ ଅନ୍ତର୍ଭୁକ୍ତ । ସପଟେ ବିଜୟଙ୍କୁ ସୁରକ୍ଷା ପ୍ରଦାନ କରାଯିବାକୁ ନେଇ ରାଜ୍ୟରେ ରାଜନୈତିକ ବିତର୍କ ସୃଷ୍ଟି ହୋଇଛି । ସରକାରଙ୍କ  ନିଷ୍ପତ୍ତି ପଛରେ ଥିବା ସମୟ ଏବଂ ଉଦ୍ଦେଶ୍ୟ ଉପରେ ପ୍ରଶ୍ନ ଉଠାଇଛି AIADMK । ଦଳର ବରିଷ୍ଠ ନେତା କେ.ପି. ମୁନୁସାମୀ ଶୁକ୍ରବାର ଚିନ୍ତା ପ୍ରକାଶ କରି କହିଛନ୍ତି ଯେ, ଏହି ସୁରକ୍ଷା ୨୦୨୬ ତାମିଲନାଡୁ ବିଧାନସଭା ନିର୍ବାଚନ ପୂର୍ବରୁ ବିଜୟଙ୍କୁ ପ୍ରଲୋଭିତ କରିବା ପାଇଁ ବିଜେପି ଦ୍ୱାରା ଏକ ରଣନୈତିକ ପ୍ରୟାସ ହୋଇପାରେ। 

ମୁନୁସାମୀ ସୂଚିତ କରିଛନ୍ତି ଯେ, ‘ବିଜୟ, ଯିଏ ଫେବୃଆରୀ ୨୦୨୪ ରେ ତାଙ୍କର ରାଜନୈତିକ ଦଳ ଆରମ୍ଭ କରିଥିଲେ । ସେ ବହୁ ସଂଖ୍ୟାରେ ଜନସମାବେଶ କରୁଛନ୍ତି ଏବଂ ରାଜ୍ୟର ରାଜନୈତିକ କ୍ଷେତ୍ରରେ ଜଣେ ପ୍ରମୁଖ ବ୍ୟକ୍ତିତ୍ୱ ଭାବରେ ଉଭା ହେଉଛନ୍ତି । ଏଥିପାଇଁ କେନ୍ଦ୍ର ତାଙ୍କୁ ସୁରକ୍ଷା ଦେଉଥିଲେ ମୁଁ ଖୁସି । ଯଦି ତାଙ୍କୁ ବିଜେପି ପାଇଁ ଭୋଟ୍‌ ହାସଲ କରିବାକୁ ସୁରକ୍ଷା ଦିଆଯାଉଛି ତେବେ ଏହାକୁ ବିରୋଧ କରାଯିବ ଆବଶ୍ୟକ ।’

ସେପଟେ ତାମିଲନାଡୁ ବିଜେପି ମୁଖ୍ୟ କେ ଆନ୍ନାମଲାଇ ନିଷ୍ପତ୍ତିକୁ ସମର୍ଥନ କରି କହିଛନ୍ତି ଯେ, ଏକାଧିକ ଗୁଇନ୍ଦା ସଂସ୍ଥା ବିଜୟଙ୍କ ଜୀବନ ପ୍ରତି ସମ୍ଭାବ୍ୟ ବିପଦ ଥିବା ନେଇ ସୂଚନା ଦେବା ପରେ ତାଙ୍କୁ ସୁରକ୍ଷା ପ୍ରଦାନ କରାଯାଇଛି । ଅଭିନେତା-ରାଜନେତା ବିଜୟଙ୍କ ବର୍ଦ୍ଧିତ ପ୍ରଭାବ ଏବଂ ସାର୍ବଜନୀନ ଯୋଗଦାନ ସତ୍ତ୍ୱେ ତାଙ୍କୁ ପର୍ଯ୍ୟାପ୍ତ ସୁରକ୍ଷା ଯୋଗାଇବାରେ ବିଫଳ ହେବାରୁ ଶାସକ ଡିଏମକେ ସରକାରଙ୍କୁ ସମାଲୋଚନା କରିଛନ୍ତି ଆନ୍ନାମଲାଇ । 

ଲୋକପ୍ରିୟ ତାମିଲ ଚଳଚ୍ଚିତ୍ର ତାରକା ବିଜୟ ଗତ ବର୍ଷ ତାମିଲଗା ଭେଟ୍ଟ୍ରି କାଝାଗମ ଆରମ୍ଭ କରି ଆନୁଷ୍ଠାନିକ ଭାବରେ ରାଜନୀତିରେ ପ୍ରବେଶ କରିଥିଲେ । ତାଙ୍କ ଦଳ ବର୍ତ୍ତମାନ ରାଜ୍ୟକୁ ଶାସନ କରୁଥିବା ଡିଏମକେ ଏବଂ କେନ୍ଦ୍ରରେ ବିଜେପି ଉଭୟର ବିକଳ୍ପ ଭାବରେ ନିଜକୁ ସ୍ଥାନୀତ କରିଛି। ବିଜୟଙ୍କ ବିପୁଳ ପ୍ରଶଂସକ ଏବଂ ଭିଡ଼ ତିଆରି କରିବାର କ୍ଷମତାକୁ ଦୃଷ୍ଟିରେ ରଖି ରାଜନୀତିରେ ତାଙ୍କର ଆଗାମୀ ପଦକ୍ଷେପ ଉପରେ ସମସ୍ତେ ନଜର ରଖିଛନ୍ତି । ଏହା ପୂର୍ବରୁ ବିଜୟ ବିଶିଷ୍ଟ  ରାଜନୈତିକ ସମୀକ୍ଷକ ପ୍ରଶାନ୍ତ କିଶୋରଙ୍କୁ ଭେଟିଥିଲେ ଏବଂ ପରବର୍ତ୍ତୀ କାର୍ଯ୍ୟପନ୍ଥା ଉପରେ ଆଲୋଚନା ହୋଇଥିବା ଜଣାପଡ଼ିଛି ।