ସମ୍ବଲପୁର,୨୪/୦୪: ସମ୍ବଲପୁର ଚିଡ଼ିଆଖାନା ଓ ଉଦ୍ଧାର କେନ୍ଦ୍ରରେ ନିମ୍ନମାନର ଖାଦ୍ୟ ଦେବା ଘଟଣାରେ ଖୋଲୁଛି ଗୁମର । କିଭଳି ନିମ୍ନମାନର ଖାଦ୍ୟକୁ ଉଚ୍ଚମାନ ଦର୍ଶାଇ ପଶୁପକ୍ଷୀଙ୍କୁ ଦିଆଯାଉଛି, ତା’ର ପ୍ରମାଣ ‘ପ୍ରମେୟ’ ହାତରେ ଲାଗିଛି । ପୋକ ସାଲୁବାଲୁ ଥିବା ମକା ଗୁଣ୍ଡ, କୁଲଥି, କୁଣ୍ଡା, ଚକଡ଼ ଏବଂ ବାଦାମ ପିଡ଼ିଆ ଦେଉଥିବା ସମୟରେ ଧରାପଡ଼ିଛନ୍ତି ଅଧିକାରୀ । ଏହାକୁ ନେଇ ପ୍ରଶ୍ନ କରିବା ପରେ ହଡ଼ବଡ଼େଇ ଯାଇ ଖାଦ୍ୟକୁ ଲୁଚାଇବାକୁ କର୍ମଚାରୀ ଚେଷ୍ଟା କରିଥିଲେ ।
ସମ୍ବଲପୁର ଚିଡ଼ିଆଖାନା ଓ ଉଦ୍ଧାର କେନ୍ଦ୍ରରେ ଥିବା ୧୭ ପ୍ରଜାତିର ୩୦୦ ପଶୁ ଓ ୧୩ ପ୍ରଜାତିର ପକ୍ଷୀଙ୍କ ପାଇଁ ମାସକୁ ୪୩୦ କ୍ୱିଣ୍ଟାଲ ଖାଦ୍ୟ ଦିଆଯାଉଛି । ଏଥିରେ ମକା ଗୁଣ୍ଡ, କୁଲଥି, କୁଣ୍ଡା, ଚକଡ଼ ଏବଂ ବାଦାମ ପିଡ଼ିଆ ରହିଛି । ହୀରାକୁଦ ବନ୍ୟପ୍ରାଣୀ ବନଖଣ୍ଡ ଅଧିକାରୀଙ୍କ ସୂଚନା ଅନୁସାରେ, କେଜି ପ୍ରତି ମକା ୨୮ଟଙ୍କା, କୁଲଥି ୪୨ ଟଙ୍କା, କୁଣ୍ଡା ୧୦ ଟଙ୍କା, ଚକଡ଼ ୨୮ ଟଙ୍କା ଏବଂ ବାଦାମ ପିଡ଼ିଆ ୫୦ ଟଙ୍କାରେ କ୍ଷେତରାଜପୁରର ଏକ ଦୋକାନରୁ କିଣାଯାଉଛି । ଯାହାକି ମାସକୁ ଅନୁମାନିକ ୧୩ ଲକ୍ଷ ୫୦ ହଜାର ଟଙ୍କାରୁ ଅଧିକ । ହେଲେ ସେହି କ୍ଷେତରାଜପୁର ବ୍ୟବସାୟୀ ‘ପ୍ରମେୟ’କୁ ଦେଇଥିବା ସୂଚନା ଅନୁସାରେ କେଜି ପ୍ରତି ମକା ୨୬ ଟଙ୍କା, କୁଲଥି ୨୨ ଟଙ୍କା, ଚକଡ଼ ୨୧ ଟଙ୍କା ଏବଂ ବାଦାମ ପିଡ଼ିଆ ୩୬ ଟଙ୍କାରେ ବିକ୍ରି ହେଉଛି । ସେ ବି ସମସ୍ତ ଖାଦ୍ୟ ଉଚ୍ଚମାନର । ଏହି ସବୁ ଖାଦ୍ୟ ‘ଏ’ ଗ୍ରେଡ୍ର ବୋଲି ଖୋଦ୍ ଚିଡ଼ିଆଖାନା କର୍ତ୍ତୃପକ୍ଷଙ୍କୁ ବିକ୍ରି କରୁଥିବା ବ୍ୟବସାୟୀ କହିଛନ୍ତି । ଯାହାକି ଚିଡ଼ିଆଖାନା କର୍ତ୍ତୃପକ୍ଷଙ୍କ ମୁଖା ଖୋଲିଦେଇଛି ।
ଅର୍ଥାତ ଯଦି ବ୍ୟବସାୟୀଙ୍କ ସୂଚନାକୁ ଧରିବା ତେବେ କେଜି ପ୍ରତି ମକାରେ ୨ ଟଙ୍କା, କୁଲଥିରେ ୨୦ ଟଙ୍କା, ଚକଡ଼ ୭ ଟଙ୍କା ଏବଂ ବାଦାମ ପିଡ଼ିଆ ୧୪ ଟଙ୍କା ଅଧିକ ଦରରେ କିଣାଯାଉଛି । ହୀରାକୁଦ ବନ୍ୟପ୍ରାଣୀ ବନଖଣ୍ଡ ଅଧିକାରୀ ଓ ବ୍ୟବସାୟୀ ସୂଚନାକୁ ଟାଲି କଲେ ଖାଦ୍ୟ ବିକ୍ରି କେଳେଙ୍କାରୀ ସତ ପ୍ରମାଣିତ ହେଉଛି । ହେଲେ ବ୍ୟବସାୟୀ ଯେଉଁ ଦର କଥା କହୁଛନ୍ତି ତାହା ଉଚ୍ଚମାନର ଖାଦ୍ୟ । ଏହି ଖାଦ୍ୟଠାରୁ ଆହୁରି ନିମ୍ନ ମାନର ଖାଦ୍ୟ ପଶୁପକ୍ଷୀଙ୍କୁ ଦିଆଯାଉଥିବା ଅଭିଯୋଗ ହୋଇଛି । ତେଣୁ ପ୍ରତି ମାସରେ ଲକ୍ଷ ଲକ୍ଷ ଟଙ୍କାର ଖାଦ୍ୟ କେଳେଙ୍କାରୀ ହେଉଥିବା ସ୍ପଟ ଜଣାପଡ଼ୁଛି ।
ଏସିଏଫ୍ ଯତୀନ୍ଦ୍ର କୁମାର ସିଂହ ଏଭଳି ଅଭିଯୋଗକୁ ଖଣ୍ଡନ କରିଛନ୍ତି । କହିଛନ୍ତି, ତୃଣଭୋଜୀ ପ୍ରାଣୀଙ୍କୁ ଦିଆଯାଉଥିବା ଖାଦ୍ୟ ଉଚ୍ଚମାନର। ଏଥିପାଇଁ ସ୍ୱତନ୍ତ୍ର ଏସଓପି ରହିଛି । ଏହାକୁ ପାଳନ କରି ଖାଦ୍ୟ ଦିଆଯାଉଛି । ଏମିତି କି, ଖାଦ୍ୟ ଦିଆଯିବା ପୂର୍ବରୁ ନିୟମିତ ଯାଞ୍ଚ କରାଯାଏ। ପ୍ରାଣୀଧନ ଚିକିତ୍ସକ ଉପସ୍ଥିତ ରହି ଯାଞ୍ଚ କରିଥାନ୍ତି ।
