ଭୁବନେଶ୍ଵର, ୨୪/୦୪ : ଫାଇନାନ୍ସ କମ୍ପାନୀରୁ ଟଙ୍କା ଆଣିଥିଲେ, ଋଣ ସୁଝି ନପାରି ମହିଳାଙ୍କ ଆତ୍ମହତ୍ୟା। କପ୍ତିପଦା ଥାନା ପିଙ୍ଗୁ ଗ୍ରାମରେ ଏଭଳି ଘଟଣା ଘଟିଛି। ମୃତକ ଜଣଙ୍କ ହେଉଛନ୍ତି ଗୀତାଞ୍ଜଳି ସୁରୁଳିଆ।
ସୂଚନାନୁଯାୟୀ, ପିଙ୍ଗୁ ଗ୍ରାମର ଗୀତାଞ୍ଜଳି ସୁରୁଳିଆ ଖୁଣ୍ଟା ଅଞ୍ଚଳର ୨ଟି ଫାଇନାନ୍ସ କମ୍ପାନୀରୁ ୩ଟି କିସ୍ତିରେ ଏକ ଲକ୍ଷରୁ ଉର୍ଦ୍ଧ୍ଵ ଟଙ୍କା ଋଣ ଆଣିଥିଲେ। ଋଣ ଆଣିବା ପରେ ସେହି ଟଙ୍କାକୁ ଗାଁର ରଞ୍ଜିତା ବେହେରାଙ୍କୁ ଦେଇଥିଲେ। ଟଙ୍କା ଫେରାଇବାକୁ ପ୍ରତିଶୃତି ଦେଇଥିବା ରଞ୍ଜିତା ପରବର୍ତ୍ତୀ ସମୟରେ ଫେରାର୍ ହୋଇଯାଇଥିଲେ। ଯାହାଫଳରେ ଫାଇନାନ୍ସ କମ୍ପାନୀ କିସ୍ତି ଫେରସ୍ତ ପାଇଁ ଗୀତାଞ୍ଜଳିଙ୍କୁ ତାଗିଦ୍ କରିଥିଲେ। ହେଲେ ଟଙ୍କା ସୁଝିବା ପାଇଁ ଗୀତାଞ୍ଜଳି ଅସମର୍ଥ ଥିଲେ। ଯାହାକୁ ନେଇ ସେ ମାନସିକ ଚାପରେ ରହୁଥିଲେ। ଗୁରୁବାର ସକାଳେ ଘର ନିକଟରେ ଥିବା ଗଛରେ ଫାଶୀ ଲଗାଇ ଝୁଲି ପଡିଥିଲେ। ଏହି ଖବର ପାଇ କପ୍ତିପଦା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିଛି। ପୋଲିସ ଏନେଇ ତଦନ୍ତ ଆରମ୍ଭ କରିଛି।
ଏହି ଖବରଟିକୁ ପଢନ୍ତୁ-ପୋଖରୀରେ ଗାଧୋଇବା ବେଳେ ଅଘଟଣ, ଗଭୀର ପାଣିରେ ବୁଡ଼ି ଚାଲିଗଲା ଦୁଇ ଭଉଣୀଙ୍କ ଜୀବନ
