ନୂଆଦିଲ୍ଲୀ ୨୪/୦୪: ଜମ୍ମୁ-କାଶ୍ମୀର ସ୍ଥିତ ପହଲଗାମରେ ଆତଙ୍କବାଦୀ ହମ୍ଲା ସାରା ଦେଶକୁ ସ୍ତବ୍ଧ ଓ କ୍ଷୁବ୍ଧ କରିଛି । ପ୍ରତ୍ୟେକ ଭାରତୀୟ ଦୋଷୀଙ୍କୁ ଦଣ୍ଡ ଓ ନ୍ୟାୟ ଦାବି କରୁଛନ୍ତି । ଇତିମଧ୍ୟରେ ପାକ୍ ଅଭିନେତା ଫୱାଦ ଖାନ୍ଙ୍କ ଅପ୍କମିଙ୍ଗ ଫିଲ୍ମ ‘ଅବୀର ଗୁଲାଲ’କୁ ସୋସିଆଲ ମିଡିଆ ୟୁଜର୍ ବିରୋଧ କରୁଛନ୍ତି । ଲୋକେ ଏହି ଫିଲ୍ମକୁ ବହିଷ୍କାର ପାଇଁ ଦାବି କରୁଛନ୍ତି ।
ଗତ ୨୨ ତାରିଖରେ ଅଭିନେତ୍ରୀ ବାନି କପୁର ଫିଲ୍ମ ‘ଅବୀର ଗୁଲାଲ’କୁ ନେଇ ସୋସିଆଲ ମିଡିଆରେ ଏକ ପୋଷ୍ଟ୍ ଶେୟାର କରିଥିଲେ । ଫିଲ୍ମଟି ଆସନ୍ତା ମେ’ ୯ ତାରିଖରେ ମୁକ୍ତିଲାଭ କରିବ ବୋଲି ସେ ଏଥିରେ କହିଥିଲେ । କିନ୍ତୁ ପହଲଗାମ ଆତଙ୍କବାଦୀ ହମ୍ଲା ପରେ ଲୋକେ ଫିଲ୍ମକୁ ବ୍ୟାନ୍ ଲାଗି ଦାବି କରୁଛନ୍ତି । ଜଣେ ୟୁଜର୍ ଲେଖିଛନ୍ତି ‘ଆମେ କ’ଣ ଏବେ ବି ଭାରତୀୟ ସିନେମାରେ ପାକିସ୍ତାନୀ କଳାକାରଙ୍କ ପକ୍ଷରେ ଅଛୁ? ଆମେ କ’ଣ ଏବେ ବି ‘ଅବୀର ଗୁଲାଲ’ ଭଳି ଫିଲ୍ମକୁ ଭାରତରେ ନିର୍ମାଣ ଓ ରିଲିଜ୍ର ଅନୁମତି ଦେବା, ଯେଉଁଥିରେ ପାକ୍ କଳାକାର କାମ କରୁଛନ୍ତି?’
ଅନ୍ୟ ଜଣେ ଲେଖିଛନ୍ତି ‘ଅବୀର ଗୁଲାଲ’ ଭାରତରେ ରିଲିଜ୍ ହେବା ଉଚିତ୍ ନୁହେଁ । ଅନେକ ୟୁଜର୍ ଭାରତରେ ଫିଲ୍ମକୁ ବ୍ୟାନ୍ କରିବାକୁ ଦାବି କରିଛନ୍ତି । ୨୦୧୬ ମସିହାର ଉରୀ ଆତଙ୍କୀ ହମ୍ଲାର ତୁଳନା ଏବେ ପହଲଗାମ ଆତଙ୍କୀ ହମ୍ଲା ଓ ଫୱାଦ ଖାନ୍ଙ୍କ ଫିଲ୍ମ ସହ କରାଯାଉଛି । ଉରୀ ଆକ୍ରମଣର ୧ ମାସ ପରେ ‘ଏ ଦିଲ୍ ହୈ ମୁଶ୍କିଲ’ ରିଲିଜ୍ ହୋଇଥିଲା, ଯେଉଁଥିରେ ଫୱାଦ ଖାନ୍ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିଲେ । ସୂଚନାଯୋଗ୍ୟ, ଉରୀ ଘଟଣା ପରେ ପାକ୍ କଳାକରଙ୍କୁ ଭାରତୀୟ ଫିଲ୍ମରେ କାମ କରିବା ଉପରେ ପ୍ରତିବନ୍ଧକ ଲାଗୁ ହୋଇଥିଲା।
