ଇମ୍ଫାଲ ୧୧/୦୨: ମଣିପୁରରେ ଦୀର୍ଘ ୨୧ ମାସ ଧରି ହିଂସା ଲାଗି ରହିଥିବାବେଳେ ମୁଖ୍ୟମନ୍ତ୍ରୀ ଏନ୍. ବୀରେନ୍ ସିଂହ ରବିବାର ନିଜ ପଦରୁ ଇସ୍ତଫା ଦେଇଥିଲେ । ଏହାପରେ ଜରୁରିକାଳୀନ ସ୍ଥିତିର ମୁକାବିଲା ଲାଗି ରାଜ୍ୟରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି । ସିଂହଙ୍କ ଇସ୍ତଫା ପରେ ବିକ୍ଷୋଭ ଆଶଙ୍କା କରି ସମ୍ବେଦନଶୀଳ ଅଞ୍ଚଳରେ ବହୁ ସଂଖ୍ୟକ ପୁଲିସ କର୍ମୀ ଓ ଯବାନ ମୁତୟନ ହୋଇଛନ୍ତି । ବିଶେଷ କରି ରାଜନୈତିକ ଭାବେ ସମ୍ବେଦନଶୀଳ ଭ୍ୟାଲି ଅଞ୍ଚଳ ଉପରେ ଫୋକସ୍ କରାଯାଉଛି । କୌଣସି ପ୍ରକାର ବିଶୃଙ୍ଖଳାର ମୁକାବିଲା ଲାଗି ସେଠାରେ ମୁତୟନ ପୁଲିସ, ଯବାନମାନଙ୍କ ନିକଟରେ ଡ୍ରୋନ୍, ହ୍ୟାଣ୍ଡ ଜାମର ପ୍ରଭୃତି ରହିଛି । କିଛି ବୁଲେଟପ୍ରୁଫ୍ ଗାଡି଼ ମଧ୍ୟ ମଗାଯାଇଛି ।
ସେପଟେ ନୂଆ ମୁଖ୍ୟମନ୍ତ୍ରୀ ନିଯୁକ୍ତ ନ ହେବା ଯାଏ କାମଚଳା ମୁଖ୍ୟମନ୍ତ୍ରୀ ଭାବେ କାର୍ଯ୍ୟ କରିବେ ବୀରେନ୍ ସିଂହ । ଆଗାମୀ ଦୁଇ ଦିନ ମଧ୍ୟରେ ରାଜ୍ୟକୁ ନୂଆ ମୁଖ୍ୟମନ୍ତ୍ରୀ ମିଳିପାରନ୍ତି । ଏଥିଲାଗି ବିଜେପି ବିଧାୟକ ୱାଇ ଖେମଚାନ୍ଦ ସିଂହଙ୍କ ନାମ ଚର୍ଚ୍ଚାରେ ରହିଛି । ଖେମଚାନ୍ଦ ସିଂହ କହିଛନ୍ତି, ରାଜ୍ୟରେ ସାମାନ୍ୟ ସ୍ଥିତି ଫେରାଇ ଆଣିବା ବର୍ତ୍ତମାନ ମୁଖ୍ୟ ଚାଲେଞ୍ଜ । ଦଳର ବ୍ୟବସ୍ଥା ଅନୁସାରେ ହାଇକମାଣ୍ଡ ଯାହା ସ୍ଥିର କରିବେ ତାକୁ ଆମେ ଗ୍ରହଣ କରିବୁ । ମଣିପୁରରେ ୨୦୨୩ ମେ ମାସରୁ କୁକି ଓ ମୈତେଇ ସମୁଦାୟ ମଧ୍ୟରେ ହିଂସା ଲାଗି ରହିଛି । ସେଥିଯୋଗୁ ୨୦୦ରୁ ଅଧିକ ଲୋକେ ପ୍ରାଣ ହରାଇଛନ୍ତି । ଏହି ହିଂସା ଯୋଗୁ ବୀରେନ୍ ସିଂହଙ୍କ ଉପରେ ଚାପ ଥିଲା । ତାଙ୍କ ବିରୋଧରେ ଜନ ଅସନ୍ତୋଷ ବଢ଼ିବାରେ ଲାଗିଥିଲା ।
