ନୂଆଦିଲ୍ଲୀ୦୩/୧୨: ମଧ୍ୟପ୍ରଦେଶ, ଛତିଶଗଡ଼, ରାଜସ୍ଥାନ ଓ ତେଲଙ୍ଗାନାର ବିଧାନସଭା ନିର୍ବାଚନ ଫଳାଫଳ ସାମ୍ନାକୁ ଆସିବ । ସକାଳ ୭ଟାରୁ ଭୋଟ୍ ଗଣତି ପ୍ରକ୍ରିୟା ଆରମ୍ଭ ହେବ । କେଉଁ ଦଳ କେତେ ଆଗୁଆ କିମ୍ବା ପଛୁଆ ତାହା ଉପରେ ଦେଶବାସୀଙ୍କର ଅହରହ ନଜର ରହିବ । ମଧ୍ୟାହ୍ନ ସୁଦ୍ଧା ଚିତ୍ର ସ୍ପଷ୍ଟ ହେବା ନେଇ ଆଶା କରାଯାଉଛି । ବିଭିନ୍ନ ଏଜେନ୍ସି କରିଥିବା ଏକ୍ଜିଟ୍ ପୋଲ୍ ବା ବୁଥବାହୁଡ଼ା ଆକଳନ ସବୁ ରାଜ୍ୟରେ କଡ଼ା ମୁକାବିଲା ହେବା ନେଇ ଦର୍ଶାଇଥିଲା । ମିଜୋରାମରେ ଦିନକ ପରେ ଅର୍ଥାତ୍ ସୋମବାର ଭୋଟ୍ ଫଳ ପ୍ରକାଶ ପାଇବ । ଆସନ୍ତା ବର୍ଷ ସାଧାରଣ ନିର୍ବାଚନ ହେବାକୁ ଥିବାରୁ ଏହି ୫ଟି ରାଜ୍ୟର ଜନାଦେଶ ବିଜେପି, କଂଗ୍ରେସ ସମେତ ପ୍ରମୁଖ ଆଞ୍ଚଳିକ ଦଳ ପାଇଁ ବେଶ୍ ଗୁରୁତ୍ୱ ବହନ କରେ ।
ଖବର ମୁତାବକ, ରବିବାର ସକାଳ ୮ଟାରୁ ସରକାରୀ କର୍ମଚାରୀ, ବରିଷ୍ଠ ନାଗରିକ ଏବଂ ଭିନ୍ନକ୍ଷମ ଭୋଟରଙ୍କ ପୋଷ୍ଟାଲ ବ୍ୟାଲଟ୍ର ଗଣତି ଆରମ୍ଭ କରାଯିବ । ଏହା ଶେଷ ହେବା ପରେ ଅନ୍ୟ ଭୋଟ୍ଗୁଡ଼ିକୁ ଗଣାଯିବ । ଏଥିପାଇଁ ସମସ୍ତ ବ୍ୟବସ୍ଥା ସରିଛି । ପ୍ରମୁଖ ସ୍ଥାନରେ ସୁରକ୍ଷା ବି ବଢ଼ାଯାଇଛି । ୫ ରାଜ୍ୟରେ ନଭେମ୍ବର ୭ରୁ ୩୦ ପର୍ଯ୍ୟନ୍ତ ମତଦାନ ହୋଇଥିଲା । ନଭେମ୍ବର ୭ରେ ମିଜୋରାମରେ ମତଦାନ ହୋଇଥିଲା ବେଳେ ଛତିଶଗଡ଼ରେ ନଭେମ୍ବର ୭ ଓ ୩୦ରେ ଦୁଇଟି ପର୍ଯ୍ୟାୟରେ ଭୋଟିଂ ହୋଇଥିଲା ।
ସେହିଭଳି ନଭେମ୍ବର ୧୭ରେ ମଧ୍ୟପ୍ରଦେଶ, ରାଜସ୍ଥାନରେ ୨୫ ଓ ତେଲଙ୍ଗାନାରେ ୩୦ରେ ମତଦାନ ଅନୁଷ୍ଠିତ ହୋଇଥିଲା । ଭୋଟ୍ ଫଳ ଜାଣିବା ପାଇଁ ନିର୍ବାଚନ କମିଶନଙ୍କ ଅଫିସିଆଲ୍ ୱେବ୍ସାଇଟ୍, ବିଭିନ୍ନ ନ୍ୟୁଜ ଚ୍ୟାନେଲ୍ ଏବଂ ଉତ୍ସର୍ଗୀକୃତ ଇଲେକ୍ସନ୍ ରେଜଲ୍ଟ ପୋର୍ଟାଲ୍ ଉପରେ ନଜର ରଖାଯାଇ ପାରିବ । ନଭେମ୍ବର ୩୦ରେ ଆସିଥିବା ଏକ୍ଜିଟ୍ ପୋଲ୍ ରିପୋର୍ଟ ଅନୁସାରେ ରାଜସ୍ଥାନ ଓ ମଧ୍ୟପ୍ରଦେଶରେ ବିଜେପି ଏବଂ ଛତିଶଗଡ଼ ଓ ତେଲଙ୍ଗାନାରେ କଂଗ୍ରେସ ସରକାର ଆସିବା ନେଇ କୁହାଯାଇଛି । ମିଜୋରାମରେ ଝୁଲା ବିଧାନସଭା ନେଇ ଅନୁମାନ ଲଗାଯାଇଛି । ୮ ପ୍ରମୁଖ ସଂସ୍ଥା ଏବଂ ସର୍ଭେ ଏଜେନ୍ସିଙ୍କ ରିପୋର୍ଟକୁ ଆଧାର କରି ଏହା କୁହାଯାଇଛି।
