ସମ୍ବଲପୁର, ୨୪/୦୬: ସମ୍ବଲପୁରରେ ଜଣ୍ଡିସ ସ୍ଥିତି ଦିନକୁ ଦିନ ନିୟନ୍ତ୍ରଣକୁ ଆସିବା ପରିବର୍ତ୍ତେ ଚିନ୍ତା ବଢାଇବାରେ ଲାଗିଛି । ପ୍ରତିଦିନ ଆକ୍ରାନ୍ତଙ୍କ ସଂଖ୍ୟା ବଢିବାରେ ଲାଗିଛି । ଜଣ୍ଡିସ୍ ସ୍ଥିତି ସାଂଘାତିକ ହେବାରେ ଲାଗିଛି । ବର୍ତ୍ତମାସ ସୁଦ୍ଧା ସହରରେ ୮୨ ପାର୍ କରିଥିବା ଜିଲ୍ଲା ପ୍ରଶାସନ କହୁଥିବାବେଳେ ଏହା ଦେଢ଼ ଶହରୁ ଅଧିକ ହେବ ବୋଲି ଆକଳନ କରାଯାଉଛି । ଜଣ୍ଡିସ୍ ଆକ୍ରାନ୍ତଙ୍କ ସଂଖ୍ୟା ପ୍ରଶାସନ ଲୁଚାଇବାକୁ ଜୋରଦାର ଉଦ୍ୟମ କରୁଛି । ଚିହ୍ନଟ ହୋଇଥିବା ସମସ୍ତ ଆକ୍ରାନ୍ତ କୁମ୍ଭାରପଡ଼ା, ଶାଲିଆବଗିଚା, ପେନ୍ସନ୍ପଡ଼ା ଓ ଧୋବାପଡ଼ା ଅଞ୍ଚଳର । ସମସ୍ତ ସଂକ୍ରମିତ ୨୦ ବର୍ଷ ମଧ୍ୟରେ ରହିଛନ୍ତି। ସେମାନଙ୍କ ମଧ୍ୟରୁ ଚିକିତ୍ସା ପାଇଁ ୩ ଜଣ ନର୍ସିଂହୋମ୍ରେ ଭର୍ତ୍ତି ହୋଇଛନ୍ତି । ପୂର୍ବରୁ ବିଭିନ୍ନ ସ୍ଥାନରୁ ସଂଗ୍ରହ ହୋଇଥିବା ପିଏଚ୍ଡି ପାଣିର ନମୂନା ପରୀକ୍ଷା ରିପୋର୍ଟ ଆସିଥିବା ବେଳେ ତାହା ପଜିଟିଭ୍(ସଂକ୍ରମିତ) ଚିହ୍ନଟ ହୋଇଛି । ତେଣୁ ପାଣି ପାଇପ୍ ବଦଳାଇବାକୁ ଦାବି ହେଉଛି।
ସ୍ୱାସ୍ଥ୍ୟ ବିଭାଗ ସୂଚନା ଅନୁସାରେ, ପ୍ରଥମେ ୨୨ ଜଣ ପରେ ଏହି ସଂଖ୍ୟା ୫୯ ଜଣ ହୋଇଥିଲା । ଶୁକ୍ରବାର ଏହି ସଂଖ୍ୟା ୬୯କୁ ଛୁଇଁଥିଲା । ଶନିବାର ଆଉ ୫ ଜଣ ଓ ରବିବାର ଆଉ ୮ ଚିହ୍ନଟ ହେବା ସହ ସଂକ୍ରମିତଙ୍କ ସଂଖ୍ୟା ୮୨ରେ ପହଞ୍ଚିଛି । ବିଶେଷ କରି ଗୁପ୍ଚୁପ୍, ଚୁସକି ଓ ପିଇବା ପାଣି ଯୋଗୁଁ ସଂକ୍ରମଣ ସମସ୍ୟା ସୃଷ୍ଟି ହୋଇଛି ବୋଲି ସ୍ୱାସ୍ଥ୍ୟ ବିଭାଗ ପକ୍ଷରୁ ସୂଚନା ଦିଆଯାଇଛି । ବର୍ତ୍ତମାନ ଘରକୁ ଘର ବୁଲି ସ୍ୱାସ୍ଥ୍ୟ ବିଭାଗ ପକ୍ଷରୁ ସର୍ଭେ କରାଯାଉଥିବାରୁ ଆଗକୁ ସଂକ୍ରମିତଙ୍କ ସଂଖ୍ୟା ହ୍ରାସ ପାଇବ ବୋଲି ସ୍ୱାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି । ୨୦୧୪ ମସିହାରେ ପିଏଚ୍ଡି ପାଣି ଯୋଗୁଁ ସମ୍ବଲପୁରର ପ୍ରାୟ ୧୦ ହଜାର ଲୋକ ଜଣ୍ଡିସ୍ରେ ଆକ୍ରାନ୍ତ ହୋଇଥିଲେ । ଶତାଧିକ ବ୍ୟକ୍ତିଙ୍କ ମୃତ୍ୟୁ ହୋଇଥିଲା ।
