ଖଲ୍ଲିକୋଟ,୩୦।୧ : ଗଞ୍ଜେଇ ଚୋରା ଚାଲାଣ ବେଳେ ବ୍ରହ୍ମପୁର ଅବକାରୀ ଗୁଇନ୍ଦା ବିଭାଗ ଖଲ୍ଲିକୋଟରେ ଚଢ଼ାଉ କରି ୭୫ କେଜି ଗଞ୍ଜେଇ ସହ କାର ଓ ବାଇକକୁ ଜବତ କରିଛି । ଏଥିରେ ସମ୍ପୃକ୍ତ ୫ ଜଣଙ୍କୁ ଅବକାରୀ ପୋଲିସ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ବାଲିଗୁଡା ଥାନା ତିଲୋରୀ ଜାଗେରମାହା ଗ୍ରାମର ବାର୍ଥାଳାମୀ ଦିଗାଲ (୨୩), ଅଭିମନ୍ୟୁ ଦିଗାଲ(୩୦), ସୁଜିତ ଦିଗାଲ (୨୭), ବାଲିଗୁଡା ଥାନା ସମନବାଦଲ ଗ୍ରାମ ର କୃପାସିନ୍ଧୁ ପ୍ରଧାନ (୨୯) ଓ ଦାରିଙ୍ଗିବାଡି ଥାନା ଅଞ୍ଚଳର ପଙ୍କଜ ପ୍ରଧାନ (୨୮) । ସେମାନଙ୍କ ନିକଟରୁ ୫ ଟି ମୋବାଇଲ ଫୋନ ମଧ୍ୟ ଜବତ କରାଯାଇଛି।
କନ୍ଧମାଳ ବାଲିଗୁଡାରୁ ଗଞ୍ଜାମ କୋଦଳାକୁ ଏକ କାର ଯୋଗେ ଗଞ୍ଜେଇ ଚୋରା ଚାଲାଣ ହେଉଥିବା ଅବକାରୀ ଗୁଇନ୍ଦା ବିଭାଗ ଖବର ପାଇଥିଲା। ବ୍ରହ୍ମପୁର ଅବକାରୀ ଗୁଇନ୍ଦା ବିଭାଗ ଡ଼ିଏସପି ଶ୍ରୁତିକାନ୍ତ ରାଉତଙ୍କ ନେତୃତ୍ୱରେ ଅବକାରୀ କର୍ମଚାରୀମାନେ ଖଲ୍ଲିକୋଟ ଥାନା ଅନ୍ତର୍ଗତ ମଥୁରା ଗ୍ରାମ ନିକଟରେ ଚଢ଼ାଉ କରିଥିଲେ। ଆଗରେ ଏକ ବାଇକ ଯାଉଥିବା ବେଳେ ପଛରେ ଏକ କାରରେ ଗଞ୍ଜେଇ ଚୋରା ଚାଲାଣ ହେଉଥିଲା। କାର (ନଂ. ଓଡି ୦୨ ବିଡବ୍ଲୁ ୫୮୫୭) ରେ ଦୁଇଟି ବସ୍ତାରେ ଥିବା ୭୫ କେଜି ଗଞ୍ଜେଇ ସହିତ କାର ଓ ବାଇକ (ନଂ ଓଡି ୩୪ ଏଲ ୧୭୦୮) କୁ ଜବତ କରିଥିଲେ। ଏହି ଗଞ୍ଜେଇ ଚୋରା ଚାଲାଣରେ ସମ୍ପୃକ୍ତ ଥିବା ଅଭିଯୋଗରେ ୫ ଜଣଙ୍କୁ ଗିରଫ କରାଯାଇଥିଲା।
