ଖଲ୍ଲିକୋଟ - ଖଲ୍ଲିକୋଟ ସହରରେ ବାରହା ଆତଙ୍କ। ଖଲ୍ଲିକୋଟର ପୂର୍ବତନ ବିଧାୟିକା ସୂର୍ଯ୍ୟମଣୀ ବୈଦ୍ୟଙ୍କ ଘର ସାମ୍ନାରେ ଘଟିଛି ଦୁର୍ଘଟଣା। ରାସ୍ତା ପାର ହେଉଥିବା ଏକ ବାରହାକୁ ଧକ୍କା ଦେଇ ତଳେ ପଡିଯିବାରୁ ଜଣେ ସ୍କୁଟି ଚାଳକଙ୍କ ମୃତ୍ୟୁ ଘଟିଥିବା ଜଣାପଡ଼ିଛି। ମିଳିଥିବା ସୂଚନା ଅନୁଯାୟୀ, ଖଲ୍ଲିକୋଟ ବିଧାୟିକା ସୂର୍ଯ୍ୟମଣୀ ବୈଦ୍ୟଙ୍କ ବାସଭବନ ସମ୍ମୁଖରେ ଆଜି ରାତି ପ୍ରାୟ ୯ଟା ସମୟରେ ଏକ ବାରହା ଆସିକା - ଭୁବନେଶ୍ୱର ମୁଖ୍ୟ ରାସ୍ତା ପାର ହେଉଥିଲା।
ଏହି ସମୟରେ କୋଦଳାର ସୁନୀଲ ମଲ୍ଲିକ (୩୮) ଏକ ସ୍କୁଟି ଯୋଗେ କୋଦଳାରୁ ଖଲ୍ଲିକୋଟ ଅଭିମୁଖେ ଆସୁଥିବା ବେଳେ , ରାସ୍ତା ପାର ହେଉଥିବା ବାରହା ସହ ଧକ୍କା ହୋଇଥିଲା। ଧକ୍କା ପରେ ବାରହାଟି ସେଠାରୁ ଚାଲି ଯାଇଥିବା ବେଳେ ସ୍କୁଟି ଚାଳକ ସୁନୀଲ ମଲ୍ଲିକ ଗୁରୁତର ଆହତ ହୋଇ ରାସ୍ତା ଉପରେ ମୁର୍ମୁଷୁ ଅବସ୍ଥାରେ ପଡି ରହିଥିଲେ।
ସେହି ରାସ୍ତାରେ ଆସୁଥିବା କିଛି ବାଇକ ଆରୋହୀ ତାଙ୍କୁ ଉଦ୍ଧାର କରି ଖଲ୍ଲିକୋଟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଆଣିଥିଲେ। କିନ୍ତୁ ଡାକ୍ତର ଏଠାରେ ସୁନୀଲଙ୍କୁ ମୃତ ଘୋଷଣା କରିଥିଲେ। ମୃତ ସୁନୀଲ କୋଦଳାରୁ ସ୍କୁଟି ଯୋଗେ ଖଲ୍ଲିକୋଟ ରେଳ ଷ୍ଟେସନ ଆସୁଥିବା ବେଳେ ଏହି ଦୁର୍ଘଟଣା ଘଟିଥିବା ଜଣାପଡ଼ିଛି।
