ଭୁବନେଶ୍ୱର, ୩୧।୧: ଡବଲ୍ ଇଞ୍ଜିନ ସରକାର ଆସିବା ପରେ ଦୀର୍ଘ ଦିନ ହେବ ଲାଗି ରହିଥିବା ବିବାଦର ସମାଧାନ ହୋଇଛି । ଝଲସିବ ଭୁବନେଶ୍ୱର ରେଳ ଷ୍ଟେସନ । ବିଶ୍ୱର ବଡ଼ ବଡ଼ ମହାନଗରୀର ରେଳ ଷ୍ଟେସନକୁ ଦେବ ଟକ୍କର । ନିର୍ମାଣ ହେବ ଏଲିଭେଟେଡ୍ ଡ୍ରାଇଭ୍ ୱେ । ରେଳ ଷ୍ଟେସନକୁ ଯାତ୍ରୀମାନେ କାରରେ ଯାଇ ପ୍ରଥମ ମହଲାରେ ଓହ୍ଲାଇବେ । ଏସ୍କାଲେଟର୍ ଓ ଲିଫ୍ଟ ଯୋଗେ ଯେ କୌଣସି ପ୍ଲାଟଫର୍ମରେ ପହଞ୍ଚିବା ହେବ ସହଜ । ଯାତ୍ରୀମାନଙ୍କ ପାଇଁ ରେଲୱେ ଷ୍ଟେସନରେ ରହିବ ବିଶ୍ୱସ୍ତରୀୟ ଅତ୍ୟାଧୁନିକ ସୁବିଧା । ଏବେ ସ୍ମାର୍ଟ୍ ସିଟି ଭୁବନେଶ୍ୱରରେ ଗଢ଼ି ଉଠିବ ସ୍ମାର୍ଟ ରେଲୱେ ଷ୍ଟେସନ । ଏବେ ଭୁବନେଶ୍ୱର ଷ୍ଟେସନର ୧ ନମ୍ବର ପ୍ଲାଟଫର୍ମରୁ ମାଷ୍ଟରକ୍ୟାଣ୍ଟିନ ପର୍ଯ୍ୟନ୍ତ ନିର୍ମାଣକୁ ଅନୁମତି ଦେଇଛନ୍ତି ରାଜ୍ୟ ସରକାର । ଅନୁମତି ମିଳିବା ପରେ ଭୁବନେଶ୍ୱର ଷ୍ଟେସନକୁ ଯିବା ପାଇଁ ଏଲିଭେଟେଡ୍ ଡ୍ରାଇଭ୍ ୱେ ନିର୍ମାଣ କାମ ଆଗେଇବ । ଫଳରେ ଷ୍ଟେସନକୁ ଯାତ୍ରୀମାନେ କାରରେ ଯାଇ ପ୍ରଥମ ମହଲାରେ ଓହ୍ଲାଇବେ । ପ୍ରଥମ ମହଲାରୁ ନିର୍ଦ୍ଦିଷ୍ଟ ପ୍ଲାଟଫର୍ମକୁ ଏସ୍କାଲେଟର୍ କିମ୍ବା ଲିଫ୍ଟ ଯୋଗେ ପହଞ୍ଚିପାରିବେ ।
ଦୀର୍ଘ ଦିନ ହେବ ମାତ୍ର ୧.୨୩ ଏକର ଜମି ନେଇ ଲାଗି ରହିଥିଲା ସମସ୍ୟା । ଯାହାର ସମାଧାନ ହେବା ପରେ ଭୁବନେଶ୍ୱର ହେବ ବିଶ୍ୱସ୍ତରୀୟ ଷ୍ଟେସନର ମାନ୍ୟତା । ଏଲିଭେଟେଡ୍ ଡ୍ରାଇଭ୍ ୱେ ନିର୍ମାଣ ପାଇଁ ଅନୁମତି ମିଳିବା ପରେ ବିଡିଏ ଦ୍ୱାରା ଆବଣ୍ଟିତ ଜମିରେ ଏଲିଭେଟେଡ୍ ପ୍ରବେଶ ଏବଂ ପ୍ରସ୍ଥାନ ପଥ ନିର୍ମାଣ ହେବ । ଏହି ପଦକ୍ଷେପ ପୂର୍ବତଟ ରେଳପଥ ଏବଂ ବିଡିଏ ମଧ୍ୟରେ ସହଭାଗିତାରେ କାମ ହେବ । ଏହା ସହିତ ଷ୍ଟେସନ ପରିସରରେ ପାର୍କିଂ କ୍ଷେତ୍ର ଏବଂ ବାଣିଜ୍ୟିକ ସ୍ଥାନଗୁଡ଼ିକର ବିକାଶ କରାଯିବ । ୨୦୨୫ ଅଗଷ୍ଟରୁ ନୂଆ ରୂପରେ ଦେଖିବାକୁ ମିଳିବ ଭୁବନେଶ୍ୱର ରେଳ ଷ୍ଟେସନ । ଭୁବନେଶ୍ୱରରେ ନିର୍ମାଣ ହେବାକୁ ଯାଉଥିବା ଏହି ସ୍ମାର୍ଟ ଷ୍ଟେସନର ବିକାଶରେ ଖର୍ଚ୍ଚ ହେବ ୪୧୯ କୋଟି ଟଙ୍କା । ମାଷ୍ଟରକ୍ୟାଣ୍ଟିନ ଛକକୁ ଏକ ମଲ୍ଟି ମୋଡାଲ ହବ୍ରେ ପରିଣତ କରିବାକୁ ପ୍ରସ୍ତୁତ ହୋଇସାରିଛି ନକ୍ସା । ଆଗକୁ ରେଳ ଷ୍ଟେସନରେ ମାର୍କେଟ୍ କମ୍ପେ୍ଲକ୍ସ ତଥା ଆଖି ଝଲସାଇବା ଭଳି ମଲ୍ କରିବାକୁ ଯୋଜନା କରୁଛି ବିଡିଏ । ଯାତ୍ରୀମାନେ ବିଶ୍ୱସ୍ତରୀୟ ଅତ୍ୟାଧୁନିକ ସୁବିଧା ପାଇବେ ।
ବିମାନବନ୍ଦର ଟର୍ମିନାଲ ଭଳି ଡିଜାଇନ୍ ଥିବା ଯାତ୍ରୀ ଚଳପ୍ରଚଳ କ୍ଷେତ୍ର, ପୃଥକ ପ୍ରବେଶ ଏବଂ ପ୍ରସ୍ଥାନ ସ୍ଥାନ, ବ୍ୟାଗେଜ୍ ସୁରକ୍ଷା ଯାଞ୍ଚ କ୍ଷେତ୍ର, ସୂଚନା କେନ୍ଦ୍ର, ଫୁଡ୍ ପ୍ଲାଜା, ୱେଟିଙ୍ଗ୍ ଏରିଆ ପ୍ରତୀକ୍ଷା ଅଞ୍ଚଳ ତିଆରି ହେବ । ଭୁବନେଶ୍ୱର ରେଳ ଷ୍ଟେସନର ପୁନଃବିକାଶ ଭାରତୀୟ ରେଳ ଅମୃତ ଷ୍ଟେସନ ଯୋଜନାର ଅର୍ନ୍ତଭୁକ୍ତ । ବିଶ୍ୱର ବଡ଼ ବଡ଼ ମହାନଗରୀଗୁଡ଼ିକର ରେଳ ଷ୍ଟେସନରେ ଖଞ୍ଜା ଯାଇଥିବା ସମସ୍ତ ସୁବିଧା ସୁଯୋଗ ଏଠାରେ ମିଳିବ । ଦୁଇ ଗୁଣରୁ ଅଧିକ ହେବ ଯାତ୍ରୀ ସେବା କ୍ଷମତା । ବର୍ତ୍ତମାନ ଭୁବନେଶ୍ୱର ଷ୍ଟେସନରେ ଦୈନିକ ପାଖାପାଖି ୭୦ରୁ ୮୦ ହଜାର ଲୋକଙ୍କ ଚଳାଚଳ ଥିବାବେଳେ ଏହା ୧ ଲକ୍ଷ ୪୪ ହଜାରକୁ ବୃଦ୍ଧି ପାଇବ ବୋଲି କୁହାଯାଇଛି । ଆଗାମୀ ଦିନରେ ଭୁବନେଶ୍ୱର ଷ୍ଟେସନର ପ୍ରବେଶ ପଥକୁ ଯିବାକୁ ଥିବା ରାସ୍ତା ନିର୍ମାଣ ସହ ସୌନ୍ଦର୍ଯ୍ୟକରଣ କରାଯିବ । କାର୍, ବାଇକ୍ ପାର୍କିଂ ପାଇଁ ବ୍ୟାପକ ବ୍ୟବସ୍ଥା ରହିବ । ଏବେ ସୁଦ୍ଧା ମୁଖ୍ୟ ପ୍ରବେଶ ପଥରେ ଥିବା କୋଠାର ତଳ ମହଲା ସହ ୪ ମହଲା ଏବଂ କଟକ ରୋଡ୍ ପାଶ୍ୱର୍ର ତଳ ମହଲା ସହ ଦୁଇ ମହଲା ବିଲ୍ଡିଂ କାର୍ଯ୍ୟ ଶେଷ ହୋଇଛି । ଉଭୟ ପାର୍ଶ୍ୱର କାମ ସରିଥିବା ବେଳେ ଏବେ ଆଭ୍ୟନ୍ତରୀଣ କାର୍ଯ୍ୟ ଜାରି ରହିଛି । ଆସନ୍ତା ଅଗଷ୍ଟରୁ ନୂଆ ରୂପରେ ଦେଖିବାକୁ ମିଳିବ ଭୁବନେଶ୍ୱର ରେଳ ଷ୍ଟେସନ ।
