ଭୁବନେଶ୍ୱର, ୩୦/୦୧: ଚଳିତବର୍ଷ ମା’ ସରସ୍ୱତୀଙ୍କ ପୂଜା ଦିନକୁ ନେଇ ରାଜ୍ୟବାସୀଙ୍କ ମଧ୍ୟରେ ଦ୍ୱନ୍ଦ୍ୱ ସୃଷ୍ଟି ହୋଇଛି । କେତେକ ପଞ୍ଜିକା ଓ କ୍ୟାଲେଣ୍ଡର ଅନୁସାରେ ଆସନ୍ତା ୨ତାରିଖ(ରବିବାର)ସରସ୍ୱତୀ ପୂଜା । ହେଲେ ଅସଲି ଖଡ଼ିରତ୍ନ ପଞ୍ଜିକା ଓ କେତେକ ଶାସ୍ତ୍ରଜ୍ଞଙ୍କ ମତରେ ୩ ତାରିଖ (ସୋମବାର) ହେଉଛି ମା’ଙ୍କ ପୂଜା । ପ୍ରୟାଗରାଜରେ ଚାଲିଥିବା ମହାକୁମ୍ଭ ମେଳାରେ ବସନ୍ତ ପଞ୍ଚମୀର ଶାହୀ ସ୍ନାନ ଫେବ୍ରୁଆରୀ ୩ ତାରିଖରେ ହେବ । ତେଣୁ ୩ ତାରିଖ(ସୋମବାର) ହିଁ ବାଗ୍ଦେବୀଙ୍କୁ ଆବାହନ କରିବାର ପ୍ରକୃତ ସମୟ ବୋଲି ସାମନ୍ତ ଚନ୍ଦ୍ରଶେଖର ସ୍ମୃତି ପରିଷଦ ପକ୍ଷରୁ କୁହାଯାଇଛି ।
ବୁଧବାର ସାମନ୍ତ ଚନ୍ଦ୍ରଶେଖର ସ୍ମୃତି ପରିଷଦ, ଭୁବନେଶ୍ୱର ଏବଂ ଭାଗ୍ୟଜ୍ୟୋତି ପ୍ରକାଶନ, କଟକ ତରଫରୁ ସ୍ଥାନୀୟ ଗୀତଗୋବିନ୍ଦ ସଦନରେ ଏନେଇ ଏକ ଆଲୋଚନାଚକ୍ର ହୋଇଥିଲା । ଏଥିରେ ପ୍ରାକ୍ତନ ମୁଖ୍ୟ ଶାସନ ସଚିବ ସହଦେବ ସାହୁ ଅଧ୍ୟକ୍ଷତା କରିଥିଲେ । ଜ୍ୟୋତିର୍ବିଦ୍ୟା ବାଚସ୍ପତି ବୈକୁଣ୍ଠନାଥ ନାୟକ, ପଣ୍ଡିତ ଗୁରୁ ପ୍ରସାଦ ରଥ, ସାମନ୍ତ ଚନ୍ଦ୍ରଶେଖର ପଞ୍ଜିକାର ଗଣକ ଜ୍ୟୋତିର୍ବିଦ୍ୟା ବାରିଧି ଦୋଳଗୋବିନ୍ଦ ପଣ୍ଡା, ମୁକ୍ତିମଣ୍ଡପ ପଣ୍ଡିତ ସଭାର ସଦସ୍ୟ ତଥା ସ୍ତମ୍ଭକାର ଓ ପାଞ୍ଜି ସମୀକ୍ଷକ ପଣ୍ଡିତ ହରିଶଙ୍କର ମିଶ୍ର, ଜ୍ୟୋତିର୍ବିଦ୍ୟା ବାରିଧି ନାରାୟଣ ମଲ୍ଲିକ, ଭାଗ୍ୟଜ୍ୟୋତିର ଶ୍ରୀକ୍ଷେତ୍ର ଓ ପରମେଶ୍ୱରୀ ପଞ୍ଜିକାର ପ୍ରକାଶକ ରଞ୍ଜନ କୁମାର ସେନାପତି ପ୍ରମୁଖ ଆଲୋଚନାରେ ଅଂଶଗ୍ରହଣ କରିଥିଲେ ।
ସେମାନଙ୍କ କହିବା କଥା, ଉଦୟବ୍ୟାପିନୀ ପଞ୍ଚମୀ ତିଥିରେ ସରସ୍ୱତୀ ପୂଜା ବା ବସନ୍ତ ପଞ୍ଚମୀ ପାଳନୀୟ । ପଞ୍ଚମୀ ତିଥି କ୍ଷୟ ହେଉ ନ ଥିଲେ ଉଦୟକାଳକୁ ଚତୁର୍ଥୀ ଥାଇ ପଞ୍ଚମୀ ତିଥିରେ ବା ପୂର୍ବବିଦ୍ଧା ତିଥିରେ ବସନ୍ତ ପଞ୍ଚମୀ କଦାପି ପାଳନୀୟ ନୁହେଁ । ବ୍ରହ୍ମବୈବର୍ତ୍ତ ପୁରାଣରେ ଅଛି- ‘ପଞ୍ଚମୀ ତୁ ସଦା କାର୍ଯ୍ୟା ଷଷ୍ଠୀଯୁକ୍ତା ଚ ନାରଦ । ନ ଚତୁର୍ଥୀଯୁତା କାର୍ଯ୍ୟା ବସନ୍ତୋତ୍ସବ କର୍ମଣି’ । ଅର୍ଥାତ୍ ବସନ୍ତ ପଞ୍ଚମୀ ଷଷ୍ଠୀଯୁକ୍ତା (ପରବିଦ୍ଧା) ହେଲେ ହିଁ ପାଳନ ହୁଏ, କଦାପି ଚତୁର୍ଥୀଯୁକ୍ତା (ପୂର୍ବବିଦ୍ଧା)ରେ ପାଳନ ହୁଏ ନାହିଁ। ପୁନଶ୍ଚ ସ୍ମୃତିଶାସ୍ତ୍ର ଅନୁସାରେ ସୂର୍ଯ୍ୟ ଯେଉଁ ତିଥିରେ ଉଦୟ ହୁଅନ୍ତି, ସେହି ତିଥି ସମସ୍ତ ଦେବପୂଜା ଓ ଅଧ୍ୟୟନ ଆଦି କାର୍ଯ୍ୟରେ ଗ୍ରହଣୀୟ ।
ଫେବ୍ରୁଆରି ୨ ତାରିଖ ରବିବାର ପୂର୍ବାହ୍ଣ ୯ଟା ୧୪ ପର୍ଯ୍ୟନ୍ତ ଚତୁର୍ଥୀ ଅଛି । ପରେ ପଞ୍ଚମୀ ଆରମ୍ଭ ହୋଇ ୩ ତାରିଖ ସୋମବାର ପୂର୍ବାହ୍ଣ ୬ଟା ୫୩ ପର୍ଯ୍ୟନ୍ତ ରହୁଛି । ପାଞ୍ଜିଭେଦରେ ଏହି ସମୟରେ ସାମାନ୍ୟ ଫରକ ଥିଲେ ବି ସବୁ ପାଞ୍ଜିରେ ଉଦୟବ୍ୟାପିନୀ ଓ ଷଷ୍ଠୀଯୁକ୍ତା ପଞ୍ଚମୀ କେବଳ ୩ ତାରିଖ ହିଁ ରହୁଛି । ତେଣୁ ୩ ତାରିଖରେ ପୂଜା ପାଳନୀୟ ବୋଲି ସେମାନେ ମତ ରଖିଥିଲେ ।
