ଭୁବନେଶ୍ୱର, ୩୧।୧: ବଢ଼ିଚାଲିଛି ସୁନାର ଚମକ । ସୁନା ଦାମ୍ରେ ଦେଖାଦେଇଥିବା ବୃଦ୍ଧିର ଧାରା ଜାରି ରହିଛି । ହଳଦିଆ ଧାତୁ ଦର ୮୩ ହଜାର ଟଙ୍କା ପାର୍ କରିଛି । ଭୁରାଜନୈତିକ ଅସ୍ଥିରତା ଏବଂ ଅନିଶ୍ଚିତତା ମଧ୍ୟରେ ସୁନାରେ ବଢ଼ିଛି ନିବେଶ । ଏହା ଦରକୁ ଉପରମୁହାଁ କରୁଥିବା ବଜାର ବିଶେଷଜ୍ଞମାନେ କହିଛନ୍ତି । ଶୁକ୍ରବାର ରାଜଧାନୀ ଭୁବନେଶ୍ୱରରେ ୧୦ ଗ୍ରାମ ପିଛା ୨୪ କ୍ୟାରେଟ୍ ସୁନା ଦର ୧୭୦ ଟଙ୍କା ବୃଦ୍ଧି ପାଇ ୮୩,୦୨୦ ଟଙ୍କାରେ ପହଞ୍ଚିଛି । ଅନ୍ୟପକ୍ଷରେ, ୨୨ କ୍ୟାରେଟ୍ ସୁନା ଦର ୧୫୦ ଟଙ୍କା ମହଙ୍ଗା ହୋଇଛି । ଫଳରେ ଏହା ୭୬,୧୦୦ ଟଙ୍କାରେ ପହଞ୍ଚିଛି । ଗତ ୩୦ ଦିନ ଭିତରେ ଭୁବନେଶ୍ୱରରେ ୨୨ କ୍ୟାରେଟ୍ ସୁନା ମୂଲ୍ୟ ୨୩୦୦ ଟଙ୍କା ବଢ଼ିଛି । କିଲୋଗ୍ରାମ ପିଛା ରୁପା ଦର ୨୦୦୦ ଟଙ୍କା ବଢ଼ିଛି । ଫଳରେ ଏହା ୧,୦୬,୦୦୦ ଟଙ୍କା ହୋଇଥିବା ଜଣାପଡ଼ିଛି ।
କେବଳ ଓଡ଼ିଶାରେ ନୁହେଁ, ଜାତୀୟ ସ୍ତରରେ ମଧ୍ୟ ସୁନା ମହଙ୍ଗା ହୋଇଛି । ପ୍ରଥମ ଥର ପାଇଁ ଦିଲ୍ଲୀରେ ସୁନାର ଦାମ୍ ୧୦ ଗ୍ରାମ୍ ପିଛା ଦାମ୍ ୮୩ ହଜାର ୮୦୦ ଟଙ୍କା ସ୍ତରରେ ପହଞ୍ଚିଛି । ସର୍ବଭାରତୀୟ ସରାଫା ସଙ୍ଘ ସୂଚାନୁସାରେ, ରୁପାର କିଲୋପିଛା ଦାମ୍ ୧୧୫୦ ଟଙ୍କା ବୃଦ୍ଧି ପାଇ ୯୪ ହଜାର ୧୫୦ ଟଙ୍କା ହୋଇଛି । ଓଡ଼ିଶାରେ କିନ୍ତୁ, ରୂପା ଦାମ୍ ଜାତୀୟ ହାରଠାରୁ ଯଥେଷ୍ଟ ଉପରେ ରହିଛି । ରୁପା କେଜି ମୂଲ୍ୟ ୨ ହଜାର ଟଙ୍କା ବୃଦ୍ଧି ପାଇ ୧ ଲକ୍ଷ ହଜାର ଟଙ୍କା ହୋଇଛି । ତେବେ ଆମେରିକୀୟ ଡଲାର ଦୁର୍ବଳ ହେବା ଫଳରେ ସୁନା ମୂଲ୍ୟ ବଢ଼ି ସର୍ବାଧିକ ସ୍ତରରେ ପହଞ୍ଚିଛି ।
ସେହିପରି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବାଣିଜ୍ୟ ନୀତି ନେଇ ଅନିଶ୍ଚିତତା ଲାଗିରହିଥିବାବେଳେ ଆମେରିକା ଟ୍ରେଜେରି ୟିଲ୍ଡ କମ୍ ହୋଇଥିବାରୁ ସୁନା ଦାମ୍ ବଢ଼ୁଛି ବୋଲି ବିଶେଷଜ୍ଞମାନେ କହିଛନ୍ତି । ଟ୍ରମ୍ଫଙ୍କ ଶୁଳ୍କ ପ୍ରହାର ଏବଂ ଦେଶ ପ୍ରଥମ ନୀତି ବିଶ୍ୱ ଅର୍ଥନୀତିକୁ କିଭଳି ପ୍ରଭାବିତ କରିବ ତାହାକୁ ନେଇ ମଧ୍ୟ ନିବେଶକମାନେ ଉଦବିଗ୍ନ ରହିଛନ୍ତି । ସମ୍ଭାବ୍ୟ କ୍ଷତିରୁ ବର୍ତ୍ତିବା ଲାଗି ସେମାନେ ସୁନା ଭଳି ସୁରକ୍ଷିତ ସମ୍ପତ୍ତିରେ ନିବେଶ ଜାରି ରଖିଛନ୍ତି । ସେମାନେ ବିପଦ ଥିବା ସମ୍ପତ୍ତିଠାରୁ ଦୂରେଇ ଯାଉଛନ୍ତି । ଆମେରିକାର ଫେଡେରାଲ୍ ରିଜର୍ଭ ସୁଧ ହାର ଅପରିବର୍ତ୍ତିତ ରଖିବା ମଧ୍ୟ ସୁନା ଦାମ୍କୁ ପ୍ରଭାବିତ କରୁଥିବା କୁହାଯାଇଛି ।
