ଛତ୍ରପୁର, ୨୪/୦୧: ଗଞ୍ଜାମ ଜିଲ୍ଲା ଛତ୍ରପୁର ବ୍ଲକର ନୂତନ ବିଡିଓ ଭାବେ ଶୁକ୍ରବାର ଓଏଏସ୍ ସମ୍ୱିତ ସଂଗ୍ରାମଜିତ ସାହୁ ଦାୟିତ୍ୱ ଗ୍ରହଣ କରିଛନ୍ତି । ସେ ୨୦୨୨ ବ୍ୟାଚ୍ର ଓଏଏସ୍ ହୋଇ ଭୁବନେଶ୍ୱର ପର୍ଯ୍ୟଟନ ବିଭାଗରେ ଓଏସଡି ଭାବେ ନିଜ ଦାୟିତ୍ୱ ସମ୍ପାଦନ କରିଥିଲେ । ଏହା ପୂର୍ବରୁ ଛତ୍ରପୁର ଓ ଚିକିଟି ଏନ୍ଏସି କାର୍ଯ୍ୟ ନିର୍ବାହୀ ଅଧିକାରୀ ଭାବେ ନିଜର ଦାୟିତ୍ୱ ସଠିକ ଭାବେ ତୁଲାଇଥିଲେ ।
ପଞ୍ଚାୟତ ପ୍ରତିନିଧି ଓ ବ୍ଲକର ସମସ୍ତ କର୍ମଚାରୀ ନୂତନ ବିଡିଓଙ୍କୁ ପୁଷ୍ପଗୁଚ୍ଛ ପ୍ରଦାନ କରି ସ୍ୱାଗତ କରିଥିଲେ । ଦାୟିତ୍ୱ ଗ୍ରହଣ ଅବସରରେ ସେ ସୌଜନ୍ୟମୂଳକ ସାକ୍ଷାତକାରରେ କହିଛନ୍ତି, ଜନସାଧାରଣଙ୍କ ଅଭିଯୋଗକୁ ପ୍ରାଧାନ୍ୟ ଦେଇ ସରକାରଙ୍କ ସମସ୍ତ ଯୋଜନା ଗୁଡିକ କିପରି ସଫଳ ରୂପାୟନ ହୋଇପାରିବ ତାହାରି ଉପରେ ଅଧିକ ଫୋକସ ରହିବ । ଗଞ୍ଜାମ ଜିଲ୍ଲା ସଦରମହକୁମା ଛତ୍ରପୁର ବ୍ଲକର ସମସ୍ତ ବିକାଶ ଦିଗରେ କାର୍ଯ୍ୟ କରିବି । ଜନସାଧାରଣ, ପଞ୍ଚାୟତ ପ୍ରତିନିଧି ଓ ବ୍ଲକ ପ୍ରଶାସନ ସମନ୍ୱୟ ମଧ୍ୟ ସମସ୍ତ ପଞ୍ଚାୟତରେ ମନରେଗା ଯୋଜନା ଠାରୁ ଆରମ୍ଭ କରି ସମସ୍ତ ଉନ୍ନୟନମୂଳକ ଯୋଜନା ଗୁଡିକୁ ପ୍ରତିଫଳନ କରିବା ପାଇଁ ପ୍ରୟାସ ଜାରି ରଖିବା ତାଙ୍କର ପ୍ରଥମ ଲକ୍ଷ୍ୟ ବୋଲି ସେ କହିଛନ୍ତି ।
ସୂଚନାଥାଉକି, ତତ୍କାଳୀନ ବିଡିଓ ସୁଶାନ୍ତ କୁମାର ବରାଳଙ୍କୁ ଅନ୍ୟ ସ୍ଥାନକୁ ବଦଳି ପରେ ଭାରପ୍ରାପ୍ତ ବିଡ଼ିଓ ଭାବେ ଏବିଡ଼ିଓ ଜୟଶ୍ରୀ ନାୟକ ଦାୟିତ୍ୱ ତୁଲାଉଥିଲେ ।