ଖଲ୍ଲିକୋଟ,୧୯।୧ : ଖଲ୍ଲିକୋଟରେ ପୁଣି ଦାଦନ ଦୁଃଖ । ଦୁବାଇରେ ଭେଜିପୁଟ ଗ୍ରାମର ଜଣେ ଦାଦନ ଶ୍ରମିକଙ୍କ ମୃତ୍ୟୁ ଘଟିଛି। ପରିବାର ପ୍ରତିପୋଷଣ ପାଇଁ ଯାଇଥିଲେ ବିଦେଶ ହେଲେ ସେଠାରେ ଚାଲିଗଲା ଜୀବନ । ଏମିତି ଏକ ଦୁଃଖଦ ଘଟଣା ଘଟିଛି ଭେଜିପୁଟ ଗ୍ରାମର ସୌରୀ ନାୟକ ଙ୍କ ପରିବାର ମଧ୍ୟରେ ।
ସୌରୀ ନାୟକଙ୍କ ସାନ ପୁଅ କମଳ କୁମାର ନାୟକ ପରିବାର ପ୍ରତିପୋଷଣ କରିବା ପାଇଁ ଗତ ୧୬ ମାସ ତଳେ ଦୁବାଇ ଯାଇଥିଲେ । ସେଠାରେ ଏକ ଘରୋଇ କମ୍ପାନୀରେ ଶ୍ରମିକ ଭାବେ କାମ କରୁଥିଲେ । ଇତି ମଧ୍ୟରେ ଗାଁ ରେ ରହୁଥିବା କମଳଙ୍କ ସ୍ତ୍ରୀଙ୍କ ଏକ ପୁତ୍ର ସନ୍ତାନ ଜନ୍ମ ହୋଇଥିଲା। ପୁଅକୁ ବର୍ତ୍ତମାନ ୧୦ ମାସ ହୋଇଥିବା ବେଳେ ଆସନ୍ତା ମାର୍ଚ୍ଚ ମାସରେ ପ୍ରଥମ ସ୍ଵନକ୍ଷତ୍ର ପାଳନ ହେବ।ଏଥିପାଇଁ ମାର୍ଚ୍ଚ ମାସ ୩ ତାରିଖ ରେ ଗାଁ କୁ ଆସିବା ପାଇଁ ଟିକେଟ କରିଥିଲେ କମଳ। ପୁଅକୁ ମନ ଭରି ଦେଖିଥାନ୍ତେ ଓ ଜନ୍ମଦିନ ପାଳନ କରିଥାନ୍ତେ। କିନ୍ତୁ ତାଙ୍କର ସେହି ସ୍ବପ୍ନ ପୂରଣ ହେଲାନି। ପୁଅର ମୁହଁ ନ ଦେଖୁଣୁ ଚାଲିଗଲା ଜୀବନ।
ଶନିବାର ରାତିରେ ତାଙ୍କର ମୃତ୍ୟୁ ଘଟି ଥିବା ପରିବାର ଲୋକେ ଜାଣିବା ପରେ ପୁରା ପରିବାର ଦୁଃଖରେ ଭାଙ୍ଗି ପଡିଛନ୍ତି ।କାନ୍ଦ ବୋବାଳିରେ ପୁରା ଘର ଫାଟି ପଡୁଛି। ତେବେ ମୃତ୍ୟୁର କାରଣ ସ୍ପଷ୍ଟ ହୋଇ ନଥିବା ବେଳେ ପୁଅର ଶବକୁ ଜନ୍ମ ମାଟିକୁ ଫେରାଇ ଆଣିବା ପାଇଁ ବାପା ସୌରୀ ନାୟକ ସରକାରଙ୍କ ନିକଟରେ ଆକୁଳ ନିବେଦନ କରିଛନ୍ତି ।
